រាជធានីភ្នំពេញ ៖ ជនសង្ស័យម្នាក់ ក្នុងចំណោមបក្សពួកចំនួន២នាក់ត្រូវប្រជាពលរដ្ឋចាប់ខ្លួនបាន កាលពីវេលាម៉ោង៧និង៣០នាទីយប់ថ្ងៃទី១៣ កុម្ភៈ ២០១៣ ។ ខណៈពេលដែលជននេះជិះម៉ូតូម៉ាកសេ១២៥ ស៊េរី២០១១ ឡើងតែម២០១៣ មួយគ្រឿងធ្វើសកម្មភាពឆក់កាបូបពីស្រ្តីម្នាក់នៅចំណុចផ្លូវលេខ៥៩៨ ខាងកើតរង្វង់មូលខាំកូស៊ីធី ស្ថិតក្នុងភូមិទួលគោក សង្កាត់ទួលសង្កែ ខណ្ឌឫស្សីកែវ បានសម្រេចហើយជិះគេចជង្ហុកជួបគ្រោះថ្នាក់ចរាចរណ៍បុកជាមួយម៉ូតូមួយគ្រឿងទៀត។
នៅក្នុងសកម្មភាពនេះ បណ្តាលឱ្យស្រ្តីម្ចាស់កាបូបដួលម៉ូតូរងរបួសរលាត់ដៃជើង។ ទោះបីជាយ៉ាងណាកាបូបត្រូវស្រ្តីជាម្ចាស់ដកហូតបានមកវិញហើយទៅបាត់ពុំបានដាក់ពាក្យបណ្តឹងឡើយ ។
ជនសង្ស័យដែលត្រូវចាប់ខ្លួនឈ្មោះអ៊ុង ភារម្យ ភេទប្រុស អាយុ១៨ឆ្នាំ មានលំនៅផ្ទះលេខ៣៧ ផ្លូវលេខ៦១៦ សង្កាត់បឹងកក់ទី២ ខណ្ឌទួលគោក។ ចំណែកម្នាក់ទៀតរត់រួចឈ្មោះសីហា ហៅស្រស់ អាយុ១៩ឆ្នាំ។
តាមសាក្សីបានឱ្យដឹងថា នៅមុនពេលកើតហេតុជនសង្ស័យមានគ្នាចំនួន២នាក់ជិះម៉ូតូម៉ាកសេ១២៥ ស៊េរី២០១១ ឡើងតែម២០១៣ មួយគ្រឿងធ្វើសកម្មភាពឆក់កាបូបពីស្រ្តីម្នាក់ជិះម៉ូតូម៉ាកស្គូពី នៅចំណុចផ្លូវលេខ៥៩៨ នៅក្បែរផ្សាងិនអានខាងកើតវង្វង់មូលខាំកូស៊ីធី ក្នុងសង្កាត់ទួលសង្កែបានសម្រេច។ នៅក្នុងសកម្មភាពនេះបណ្តាលឱ្យស្រ្តីម្ចាស់កាបូបដួលត្រឡប់ត្រឡិនរងរបួសរលាត់ដៃជើង។ ពេលឆក់បាន ហើយជនសង្ស័យបានជិះគេចជង្ហុកជ្រុលទៅបុកម៉ូតូមួយគ្រឿងទៀតដួលគាប់ជួនពេលនោះស្រ្តីម្ចាស់កាបូបស្រែកចោរៗ ហើយត្រូវបានប្រជាពលរដ្ឋចាប់ខ្លួនបានម្នាក់។ ចំណែកម្នាក់ទៀតបានរត់គេចខ្លួនចោលម៉ូតូ។ ជនសង្ស័យដែលត្រូវចាប់ខ្លួនរួមទាំងម៉ូតូត្រូវប៉ូលិសបញ្ជូនទៅកាន់ប៉ុស្តិ៍នគរបាលរដ្ឋបាលទួលសង្កែ ដើម្បីសាកសួរ៕
ចែករំលែកព័តមាននេះ