នាងឆ័ររីល ខូល តារាចំរៀង និងកីឡាករអេចឈ្លី ខូល ខ្សែការពារក្រុមជំរើសជាតិអង់គ្លេសអតីតជាប្តីប្រពន្ធផ្លូវការតាមការកាត់ក្តីរបស់តុលាការអង់គ្លេស កាលពីថ្ងៃទី៣ កញ្ញា កន្លងមក។
ក្រោយពីមានការបែកបាក់គ្នា ព្រោះភាគីបុរសលួចទៅមានសហាយស្មន់ជាមួយនារីផ្សេងអស់រយៈពេលជាច្រើនខែ នៅទីបំផុតនាងឆ័ររីល ខូល តារាចំរៀងដ៏សិចស៊ីចាប់ផ្តើមដោះស្រាយជាមួយកីឡាករអេចឈ្លីខូល អតីតប្តីរួចរាល់ហើយ បន្ទាប់ពីនាងសំរេចចិត្តប្តឹងលែងលះដោយមិនទាមទារប្រាក់សំណងនោះទេ។
កាលពីអំឡុងពេលមុននេះ នាងឆ័ររីល អាយុ២៦ឆ្នាំ មានការប្រញាប់ប្រញាល់ឱ្យដោះស្រាយលើរឿងលែងលះនេះបានសំរេចនៅមុនពេលការប្រកួតបាល់ទាត់ពិភពលោក២០១០ នៅអាហ្វ្រិកខាងត្បូង ប៉ុន្តែកីឡាករខ្សែការពារក្លឹបឆែលស៊ីបានអូសបន្លាយពេល និងស្នើសុំឱ្យដំណើរការរឿងរ៉ាវខាងលើចប់ក្រោយការប្រកួតបាល់ទាត់ពិភពលោកដោយផ្តល់នូវហេតុផលថា ខ្លួនកំពុងតាំងសម្មាធិឱ្យល្អដើម្បីលេងឱ្យក្រុមជំរើសជាតិអង់គ្លេស។
កាលពីថ្ងៃទី៣ កញ្ញា កន្លងមក តុលាការអង់គ្លេសបានអនុម័តលើលិខិតលែងលះរបស់នាងឆ័ររីល និងកីឡាករខូល ជាផ្លូវការធ្វើឱ្យអ្នកទាំង២លែងជាគូមេត្រីនឹងគ្នាបន្តទៀត។ ស្របពេលជាមួយគ្នានេះតាមប្រភពពីជំនិតរបស់នាងឆ័ររីល បញ្ជាក់ប្រាប់កាសែតដឹសាន់របស់អង់គ្លេសថា «នាងឆ័ររីល និងកីឡាករអេចឈ្លី ខូល មិនអាចរស់នៅរួមគ្នាបន្តទៀត និងមិនមានការប្រឈមមុខគ្នាទៀតទេ ហើយបញ្ជូនតំណាងរបស់ពួកគេឱ្យដំណើរការក្នុងរឿងខាងលើ»៕
ចែករំលែកព័តមាននេះ