ខេត្តមណ្ឌលគិរី ៖ ព្រៃឈើដ៏មានតម្លៃដែលសេសសល់តិចតួច នៅតែប្រឈមមុខនឹងការកាប់បំផ្លាញយ៉ាងធ្ងន់ធ្ងរបំផុតពីសំណាក់អ្នកមានឥទ្ធិពលមួយចំនួន ដែលកាប់ទន្ទ្រានយកដីធ្វើជាកម្មសិទ្ធិផ្ទាល់ខ្លួន ដោយពុំមានខ្លាចរអានឹងច្បាប់ឡើយ និងគ្មានមនសិការជួយរក្សាទុកដើមឈើកម្រនានា ដើម្បីជាប្រយោជន៍ទៅថ្ងៃក្រោយនោះទេ ។ ជាក់ស្តែង ដីព្រៃបម្រុងទុករបស់សង្កាត់រដ្ឋបាលព្រៃឈើសែនមនោរម្យ ស្ថិតនៅភូមិឡៅកា សង្កាត់សុខដុម ក្រុងសែនមនោរម្យ កំពុងត្រូវរងនូវការកាប់បំផ្លាញយ៉ាងអនាធិបតេយ្យ ហើយក៏ពុំបានរំខានដល់សមត្ថកិច្ច ឬក៏មន្ត្រីជំនាញដែលមានភារកិច្ចទប់ស្កាត់ឬបង្ក្រាបឡើយ ។
បើតាមប្រភពព័ត៌មានឱ្យដឹងថា ការកាប់ព្រៃឈើនៅចំណុចខាងលើគឺជាទង្វើខុសច្បាប់ ព្រោះកន្លែងនោះជាដីរបស់រដ្ឋ និងជាព្រៃបម្រុងទុកជាអចិន្ត្រៃយ៍ផងដែរ ដែលគ្រប់គ្រងដោយលោកអ៊ុំ វណ្ណសុភ័ក្រ នាយផ្នែករដ្ឋបាលព្រៃឈើសែនមនោរម្យ ដោយមានលោកពង់ វីរៈ នាយសង្កាត់រដ្ឋបាលព្រៃឈើ ជាអ្នកមើលការខុសត្រូវ ។ ប្រភពដដែលបន្តថា ដីព្រៃដែលកំពុងរងការកាប់ទន្ទ្រានដោយបំពានពីសំណាក់ជនខិលខូចនោះ មានចំនួនប្រហែលជាង១០ហិកតា ហើយ និងមានបីទីតាំង ។ ចំណែកឈើដែលពួកគេបានកាប់ ត្រូវបានប្រមូលគរលើគ្នា រួចដុតចោលដោយពុំមានការស្តាយស្រណោះបន្តិចណាសោះ ខណៈដើមឈើទាំងនោះសុទ្ធតែមានទំហំធំៗអាយុរាប់សិបឆ្នាំទៅហើយ ។ ការកាប់បំផ្លាញព្រៃឈើយកដីទាំងនោះគឺសុទ្ធតែដើម្បីផលប្រយោជន៍បុគ្គលតែប៉ុណ្ណោះ ហើយប្រសិនបើពួកគេពុំមានខ្នងបង្អែក ឬអ្នកធំនៅពីក្រោយទេ ច្បាស់ជាពុំហ៊ានឡើយ ។
ការកាប់ទន្ទ្រានដីព្រៃឈើរដ្ឋដូចជាករណីខាងលើនេះ គឺផ្ទុយស្រឡះពីអនុសាសន៍ដ៏ខ្ពង់ខ្ពស់របស់សម្តេចប្រមុខរាជរដ្ឋាភិបាលកម្ពុជា ដែលតែងយកចិត្តទុកដាក់ក្នុងការរក្សាការពារនូវទ្រព្យសម្បត្តិធម្មជាតិឱ្យនៅគង់វង្សជានិរន្តរ៍តទៅ តែបែរជាមន្ត្រីដែលមានភារកិច្ចទទួលខុសត្រូវលើតំបន់របស់ខ្លួន នាំគ្នាឆ្លើយថា មិនដឹងទៅវិញ?
លោកកែប កត់ នាយខណ្ឌរដ្ឋបាលព្រៃឈើមណ្ឌលគិរីបានឱ្យដឹងតាមទូរស័ព្ទថា នៅពេលនេះយើងកំពុងចាត់កម្លាំងឱ្យចុះស្រាវជ្រាវរកឈ្មោះអ្នកប្រព្រឹត្ត ដើម្បីចាត់ការទៅតាមផ្លូវច្បាប់ ។ លោកក៏បានឱ្យដឹងដែរថា បានជាមានការកាប់ទន្ទ្រានយកដីព្រៃដ៏ច្រើននេះ គឺជនឱកាសនិយមទាំងនោះបាននាំគ្នាឆ្លៀតពេលសម្រាកពិធីបុណ្យអុំទូក អកអំបុក និងសំពះព្រះខែ កាលពីប៉ុន្មានថ្ងៃមុននេះ ក៏ទៅកាប់ព្រៃវាតទីយកដីធ្វើជាកម្មសិទ្ធិផ្ទាល់ខ្លួនតែម្តង ។
មានការកត់សម្គាល់ថា នៅខេត្តមណ្ឌលគិរីកំពុងកើតមានបទល្មើសព្រៃឈើយ៉ាងពេញបន្ទុក ជាពិសេសគឺការកាប់ទន្ទ្រានយកដីព្រៃជាកម្មសិទ្ធិផ្ទាល់ខ្លួននេះ ។ មានការស្តីបន្ទោសថា នៅពេលក្រុមកាប់ឈើអនាធិបតេយ្យទាំងនោះ ទើបតែចូលកាប់ដំបូងបន្តិចបន្តួច មិនទៅធ្វើការណែនាំ ឬឱ្យបញ្ឈប់សកម្មភាពទេ ។ លុះនៅពេលព័ត៌មានត្រូវបែកធ្លាយ ទើបនាំគ្នានិយាយថា កំពុងចាត់វិធានការ ។ ក្នុងករណីបែបនេះ បើពុំមានកាឃុបឃិតគ្នាទេ ច្បាស់ជាពុំអាចធ្វើទៅបានឡើយ ។
លោកនាយផ្នែករដ្ឋបាលព្រៃឈើសែនមនោរម្យក៏ដូចជាលោកនាយសង្កាត់រដ្ឋបាលព្រៃឈើសែនមនោរម្យ ដែរកោះសន្តិភាពពុំអាចសុំការបំភ្លឺបានទេ នៅថ្ងៃទី៣០ វិច្ឆិកា ព្រោះទូរស័ព្ទមិនចូល ។
ប្រជាពលរដ្ឋកំពុងទន្ទឹងរង់ចាំមើលថា តើជនដែលបានប្រព្រឹត្តល្មើសច្បាប់ព្រៃឈើខាងលើ នឹងត្រូវឃាត់ខ្លួនបានដែរឬអត់ ហើយនិងត្រូវមានទោសបែបណា ។ បើអត់ចាត់ការទេ ការកាប់អនាធិបតេយ្យនឹងបន្តកើតមានទៀតមិនខាន ក្រោមភ្នែកអស់លោកមេព្រៃ ៕
ចែករំលែកព័តមាននេះ