ខេត្តកំពង់ចាម ៖ មានការភ្ញាក់ផ្អើលមួយបានកើតឡើងពេញភូមិរកាពរប្រាំទី១ ឃុំរកាពរប្រាំ ស្រុកត្បូងឃ្មុំ កាលពីវេលាម៉ោង១ និង២០នាទីរសៀលថ្ងៃទី២៩ វិច្ឆិកា បន្ទាប់ពីអ្នកច្រូតស្មៅបានប្រទះឃើញសពមនុស្សស្រីមិនស្គាល់អត្តសញ្ញាណម្នាក់សល់តែគ្រោងឆ្អឹង និងមានអាយុប្រមាណក្រោម២៥ឆ្នាំ ត្រូវបានគេកប់នៅក្នុងដីចម្ការដំឡូងរបស់ឈ្មោះឈី រី ។ ក្រោយពីការប្រទះឃើញសពនេះ កម្លាំងសមត្ថកិច្ចជំនាញស្រុកក៏បានចុះទៅពិនិត្យភ្លាមៗផងដែរ ។
លោកអនុសេនីយ៍ទោ ម៉ឹង រ៉ៃយ៉ា នាយផ្នែកនគរបាលយុត្តិធម៌នៃអធិការដ្ឋានស្រុកត្បូងឃ្មុំប្រាប់ឱ្យដឹងថា នៅវេលារសៀលថ្ងៃទី២៩ វិច្ឆិកា នោះមានប្រជាពលរដ្ឋបានរាយការណ៍មកលោកនាយប៉ុស្ដិ៍រដ្ឋបាលឃុំរកាពរប្រាំថា បានប្រទះឃើញគ្រោងឆ្អឹងសាកសពនៅក្នុងដីចម្ការដំឡូងមួយកន្លែងក្នុងឃុំរកាពរប្រាំដោយសារតែឆ្កែ កាយដីលេចលលាដ៍ក្បាល ហើយជះក្លិនស្អុយទើបដឹងរួចក៏មានការរាយការណ៍ជាបន្តបន្ទាប់មកអធិការដ្ឋានខណ្ឌ ។ ក្រោយពីទទួលបានព័ត៌មាននេះ លោកវរសេនីយ៍ត្រីហ៊ាង ហ៊ត់ អធិការនគរបាលស្រុកត្បូងឃ្មុំ បានចាត់ឱ្យរូបលោកដឹកនាំកម្លាំងចុះទៅពិនិត្យសពនោះ ឃើញមានសក់វែង ពាក់អាវទ្រនាប់ និងខោខ្លីត្រឹមជង្គង់ ពណ៌ក្រហម និងស្បៃពណ៌ខៀវក្រមៅ ទើបសន្និដ្ឋានថា ជាមនុស្សស្រីអាចមានអាយុប្រហែល២៥ឆ្នាំ តែមិនដឹងអត្តសញ្ញាណ ឬមានទីលំនៅនៅទីណាទេ ។ ប្រជាពលរដ្ឋរស់នៅភូមិរកាពរប្រាំទី១ បាននាំគ្នាមកមើលជាហូរហែដែរ តែមិនមាននរណាម្នាក់បាត់បង់សមាជិកទេ ម្យ៉ាងទៀតដោយសារតែក្លិនស្អុយផងនោះ សមត្ថកិច្ចមិនបានគាស់លើកឡើងមកលើទេ គឺបានរក្សាទុកនៅកន្លែងនោះជាបណ្ដោះអាសន្ន ។
លោកអនុសេនីយ៍ទោម៉ឹង រ៉ៃយ៉ា បញ្ជាក់ថា សាកសពមនុស្សស្រីដែលមិនស្គាល់អត្តសញ្ញាណខាងលើនេះអាចត្រូវជនមួយក្រុមដឹកតាមមធ្យោបាយណាមួយយកក៏កប់ នៅត្រង់ផ្នែកកណ្ដាលនៃដីចម្ការដំឡូងរបស់ឈ្មោះរី មានជម្រៅប្រហែលជាកន្លះម៉ែត្រប៉ុណ្ណោះ ។ ករណីនេះអាចសន្និដ្ឋានជាជំហ៊ានដំបូងថា ជាអំពើឃាតកម្មណាមួយ ហើយជនល្មើសមានបំណងបំបិទភស្ដុតាងទើបយកសពមកកប់បែបនេះ ។ តាមការសន្និដ្ឋានប្រហែលជាកប់នៅក្នុងអំឡុងរដូវបុណ្យភ្ជុំ កន្លងមក ព្រោះសពរលួយសាច់អស់តែនៅធុំក្លិនស្អុយ ។
មន្រ្តីប៉ូលិសបានអំពាវនាវថា ប្រសិនបើក្រុមគ្រួសារណាមានបាត់មនុស្សដែលមានភិនភាគដូចខាងលើ សូមមកទាក់ទងនៅអធិការដ្ឋាននគរបាលស្រុកត្បូងឃ្មុំនឹងទទួលបានព័ត៌មានពិស្ដារជាក់ជាមិនខានឡើយ ហើយអាថ៌កំបាំងនៃការស្លាប់នេះពិតជាបានវែកមុខនៅពេលណាដែលអត្តសញ្ញាណសាកសពត្រូវបានដឹង ៕
ចែករំលែកព័តមាននេះ