រាជធានីភ្នំពេញ ៖ បុរសជនជាតិហ្វ៊ីលីពីន២នាក់ដែលស្នាក់នៅផ្ទះជួលជាមួយគ្នាបានកើតមានទំនាស់រហូតឈានទៅចាក់សោបន្ទប់ រួចប្រើហិង្សាវាយ និងចាក់គ្នាទៅវិញទៅមករហូតដល់របួសទាំងសងខាងដួលសន្លប់ក្នុងថ្លុកឈាម ។
ការប្រទុស្តរ៉ាយគ្នាឯងនេះបានកើតឡើងកាលពីវេលាម៉ោង៦និង៣០នាទីល្ងាចថ្ងៃទី២៩ វិច្ឆិកា នៅបន្ទប់ជួលលេខ២០៣ ជាន់ទី២ ផ្ទះលេខ២៣៤D ផ្លូវលេខ២៦១ សង្កាត់ទឹកល្អក់ទី២ ខណ្ឌទួលគោក ។ ទាក់ទិនការទាស់ទែងខ្វែងគំនិតឈានទៅប្រើហិង្សាដាក់គ្នានេះ គេពុំដឹងពីមូលហេតុអ្វីពិតប្រាកដឡើយ ។ ប៉ុន្តែបើតាមការសាកសួរជំហានដំបូងគេសង្ស័យថា ជនបរទេសទាំងពីរនាក់ស្រឡាញ់ភេទដូចគ្នា ហើយមានការប្រចណ្ឌគ្នា ក៏ក្លាយជាជម្លោះចាក់សោបន្ទប់វាយ និងចាក់គ្នារបួសរៀងខ្លួន ។ ជនទាំងពីរនាក់បានប៉ូលិសហៅរថយន្តដឹកបញ្ជូនទៅកាន់មន្ទីរពេទ្យព្រះកុសុមៈ ។
ជនជាតិហ្វ៊ីលីពីនទាំងពីរ ម្នាក់ឈ្មោះ RODEL HERHANDEZ RAMOS អាយុ៣៨ឆ្នាំ រងរបួសកន្លាក់ដៃខាងឆ្វេង និងម្នាក់ទៀតឈ្មោះ LIVAG MITCHELTAPHIO អាយុ២៨ឆ្នាំ រងរបួសស្មាឆ្វេង និងក្លៀកស្តាំ ។ អ្នកទាំងពីរមកប្រទេសកម្ពុជាបានប្រមាណជាង១ខែហើយ ក្នុងនាមជាភ្ញៀវទេសចរ និងដើម្បីរកការងារធ្វើផងដែរ ។
តាមសម្តីឈ្មោះជុក វុទ្ធី ភេទប្រុស អាយុ២១ឆ្នាំ ជាអ្នកមើលការខុសត្រូវផ្ទះជួលបានឱ្យដឹងថា នៅវេលាម៉ោង៦និង៣០នាទីថ្ងៃទី២៩ វិច្ឆិកា ម្ចាស់ផ្ទះជួលឈ្មោះទី សំណាង ភេទប្រុស អាយុ៣៣ឆ្នាំ ដែលបានចុះទៅតាមខេត្តបានទូរស័ព្ទប្រាប់គេថា ឱ្យទៅមើលជនជាតិហ្វ៊ីលីពីនទាំងពីរនាក់នោះផង កំពុងឈ្លោះគ្នា ។ គេបញ្ជាក់ថា បានជាម្ចាស់ផ្ទះជួលទៅឯខេត្ត ហើយដឹងថាពួកគេឈ្លោះគ្នានោះ ព្រោះជនជាតិបរទេស២នាក់បានទូរស័ព្ទទៅម្ចាស់ផ្ទះឱ្យទៅយកពួកគេទៅមន្ទីរពេទ្យផង ។
លោកជុក វិទ្ធី បានឱ្យដឹងទៀតថា ភ្លាមៗនោះ ខ្លួននិងបងប្អូនម្ចាស់ផ្ទះបានទៅមើលក៏ឃើញជនជាតិបរទេសម្នាក់អង្គុយ និងម្នាក់ទៀតដេកក្នុងថ្លុកឈាម ហើយបានទាក់ទងហៅប៉ូលិសប៉ុស្តិ៍ចុះទៅកន្លែងកើតហេតុនាំគ្នាវាយផ្តាច់សោទ្វារចូល និងហៅរថយន្តសាមុយបញ្ជូនទៅកាន់មន្ទីរពេទ្យព្រះកុសុមៈ ។ ដោយសារតែបន្ទប់ផ្ទះជួលស្ថិតនៅជាន់ទី២ ហើយច្រកចូល និងកាំជណ្តើរចុះឡើងមានទំហំប្រមាណ០,៦០ម៉ែត្រទៅ០,៧០ម៉ែត្រ ធ្វើឱ្យប៉ូលិស និងបុគ្គលិកពេទ្យមានការលំបាកក្នុងការជួយសង្គ្រោះដោយនាំគ្នាដាក់កន្សែងពោះគោសែងចុះម្នាក់ម្តងៗ ដោយចំណាយពេល១ម៉ោងទើបអាចយកចេញបញ្ជូនទៅកាន់មន្ទីរពេទ្យបាន ។
នៅក្នុងបន្ទប់ដោយសារមានការប្រវាយប្រតប់គ្នាឃើញប្រឡាក់សុទ្ធតែឈាមដែលជនបរទេសទាំងពីរនាក់វាយ និងចាក់គ្នារហូតដល់ខ្សោះខ្លួនដួលសន្លប់ ព្រមទាំងមានកូនកាំបិតចុងស្រួចបាក់ និងប្រឡាក់សុទ្ធតែឈាម ។
តាមប្រភពព័ត៌មានឱ្យដឹងថា ជនជាតិហ្វ៊ីលីពីនទាំងពីរនាក់បានមកជួលបន្ទប់នោះស្នាក់នៅតាំងពីថ្ងៃទី១៧ តុលា ឆ្នាំ២០១២ ក្នុងតម្លៃ១ខែ៦០ដុល្លារ ដែលការរស់នៅតែពីរនាក់នេះប្រៀបដូចប្តីប្រពន្ធ ។
នៅក្នុងមន្ទីរពេទ្យតាមការសាកសួរឈ្មោះ LIVAG MITCHELTAPHIO បានឱ្យដឹងថា កាលពីយប់ថ្ងៃទី ២៨ វិច្ឆិកា ខ្លួនត្រូវ RODEL HERHANDEZ RAMOS ដែលជាមិត្តភក្តិបានបបួលខ្លួនទៅក្លិប តែខ្លួនពុំព្រមទៅជាមួយទេក៏ទៅដើរលេងបាត់១យប់ ។ លុះព្រឹកឡើងត្រឡប់មកវិញត្រូវរករឿងទៀតក៏មានទំនាស់គ្នាតែម្តង ហើយខ្លួនក៏ទៅបាត់វិញ ។ លុះល្ងាចថ្ងៃទី២៩ វិច្ឆិកា ពេលត្រឡប់មកវិញក៏មានរឿងទៀត ទើបក្លាយជាជម្លោះវាយគ្នាបណ្តាលឱ្យរងរបួសតែម្តង ។ ការវាយតប់គ្នារវាងបុរសហ្វ៊ីលីពីនទាំងពីរនាក់នេះ ត្រូវបានគេដាក់ការសង្ស័យថា ផ្តើមចេញពីរឿងប្រចណ្ឌ ដែលបុរសជនជាតិហ្វ៊ីលីពីនទាំងពីររូបបានស្រឡាញ់ភេទដូចគ្នា ៕
ចែករំលែកព័តមាននេះ