រាជធានីភ្នំពេញ ៖ នគរបាលប៉ុស្តិ៍រដ្ឋបាលផ្សារកណ្តាលទី១ កាលពីរសៀលថ្ងៃទី២៧ កញ្ញា បានកោះហៅក្រុមអ្នករត់ម៉ូតូកង់បីមកប្រជុំនៅមាត់ទន្លេ ស្ថិតក្នុងសង្កាត់ផ្សារកណ្តាលទី១ ខណ្ឌដូនពេញ ដើម្បីចូលរួមបង្ក្រាបបទល្មើស។លោកអនុសេនីយ៍ទោ នូ ទូច នាយប៉ុស្តិ៍នគរបាលរដ្ឋបាលផ្សារកណ្តាលទី១ថ្លែងថា យោងតាមបទបញ្ជារបស់គណៈស្នងការនគរបាលរាជធានីភ្នំពេញ និងតាមការចង្អុលបង្ហាញពីអធិការខណ្ឌដូនពេញ បានឱ្យប៉ុស្តិ៍នគរបាលរដ្ឋបាលចលនាបងប្អូនអ្នករត់ម៉ូតូកង់បីឱ្យចូលរួមការពារសន្តិសុខសណ្តាប់ធ្នាប់ជាពិសេសការបង្ក្រាបមុខសញ្ញាឆក់ប្លន់ជនបរទេសដែលធ្វើដំណើរកម្សាន្តតាមម៉ូតូកង់បីនៅក្នុងរាជធានីភ្នំពេញ ។
ជាមួយគ្នានេះ ក៏សុំឱ្យអ្នករត់ម៉ូតូកង់បីតាមដានឃ្លាំមើលជនសង្ស័យជួញដូរគ្រឿងញៀនដល់ភ្ញៀវបរទេសដែលស្នាក់នៅតាមសណ្ឋាគារ និងផ្ទះសំណាក់ ជាពិសេសនៅ តាមក្លឹបកម្សាន្តពេលយប់ ។លោកវរសេនីយ៍ទោឈឹម វ៉ាន់នី អធិការរងនគរបាលខណ្ឌដូនពេញ ដែលបានចូលរួមសំ ណេះសំណាលនាឱកាសនោះ បានមានមតិផ្តាំផ្ញើដល់បងប្អូនអ្នករត់ម៉ូតូកង់បីថា ដើម្បីការពារសន្តិសុខសណ្តាប់ធ្នាប់នៅរាជធានីភ្នំពេញ ដោយឡែកនៅក្នុងភូមិសាស្ត្រខណ្ឌដូនពេញ ទាមទារសុំឱ្យអ្នករត់ម៉ូតូកង់បីត្រូវតែចូលរួមបង្ក្រាបបទល្មើសដោយរាយការណ៍ជាសម្ងាត់ ឬបង្ក្រាបជាក់ស្តែងតាមដែលអាចធ្វើទៅបាន ។
កន្លងមក មានអ្នករត់ម៉ូតូកង់បីបានឃាត់ខ្លួនចោរឆក់កាបូបភ្ញៀវបរទេសដែលជិះម៉ូតូកង់បីកម្សាន្តជូនដល់សមត្ថកិច្ច ហើយក៏បានទទួលរង្វាន់លើកទឹកចិត្តផងដែរ ។ លោកអធិការរងបន្តថា ពេលនេះសុំឱ្យបន្តចូលរួមសហការបង្ក្រាបជនល្មើសដើម្បីរក្សាសន្តិសុខសណ្តាប់ធ្នាប់ឱ្យបានល្អ ព្រោះនៅពេលដ៏ខ្លីខាងមុខនេះរាជធានីភ្នំពេញមានការរៀបចំបើកកិច្ចប្រជុំកំពូលអាស៊ាន ដែលមានភ្ញៀវបរទេសយ៉ាងច្រើនមកពីគ្រប់ប្រទេសចូលមកកម្ពុជា ។ យើងសង្ឃឹមថា បងប្អូនអ្នករត់ម៉ូតូកង់បីទាំងអស់នឹងចូលរួមរក្សាសន្តិសុខសណ្តាប់ធ្នាប់ ជាពិសេសការបង្ក្រាបបទល្មើសឆក់ ប្លន់ និងជួញដូរថ្នាំញៀន ៕
ចែករំលែកព័តមាននេះ