រាជធានីភ្នំពេញ ៖ លោកមៀម ស៊ីសារ៉ា ប្រធានសហព័ន្ធកីឡាប្រដាល់ក្បាច់បុរាណខ្មែរប្រចាំប្រទេសបារាំង បានធ្វើការអំពាវនាវដល់កីឡាករប្រដាល់កម្ពុជាទាំងអស់ដែលទៅប្រកួតនៅក្រៅប្រទេស ត្រូវតែមានការអនុញ្ញាតពីសហព័ន្ធកីឡាប្រដាល់កម្ពុជាសិន និយាយរួមទាល់តែមានការដឹងឮពីសហព័ន្ធកីឡាប្រដាល់កម្ពុជា បើពុំនោះទេ អាចនឹងចាញ់បោកគេមិនខានឡើយ ព្រោះថាក្នុងពេលថ្មីៗនេះមានកីឡាករបឺត ខាំម្នាក់ហើយដែលគេនាំយកទៅប្រកួតនៅប្រទេសបារាំងហើយត្រូវគេក្បត់កិច្ចសន្យាប្រគល់ប្រាក់ឱ្យមិនគ្រប់ចំនួន ។
លោកមៀម ស៊ីសារ៉ា បានឱ្យដឹងថា កីឡាករបឺត ខាំ នៅក្លិបសាលវ័ន្តកីឡា ត្រូវបានមេខ្យល់ម្នាក់ជាជនជាតិបារាំងឈ្មោះ PHILIPE SEBIR ដែលមានប្រពន្ធខ្មែរនាំទៅប្រកួតនៅទីក្រុងប៉ារីសប្រទេសបារាំងកាលពីខែមីនាកន្លងមក ហើយគេបានសន្យាថា ប្រកួតម្តងទទួលបានតម្លៃខ្លួន៨០០ដុល្លារសហរដ្ឋអាមេរិក ហើយបឺតខាំជួបប្រកួតបាន២លើក ។ ប៉ុន្តែទីបំផុតគេមិនត្រឹមតែប្រគល់ប្រាក់ឱ្យតែពាក់កណ្តាល(៨០០ដុល្លារ)ប៉ុណ្ណោះទេ ថែមទាំងមិនរវល់អើពើចំពោះការហូបចុកទៀតផង មុននឹងគេបញ្ជូន បឺត ខាំ ត្រឡប់មកស្រុកខ្មែរវិញ ។ លោកបានបន្ថែមទៀតថា មូលហេតុដែលគេធ្វើបែបនេះគឺដោយសារតែគេខឹងបឺត ខាំ ប្រកួតចាញ់គេទាំង២លើក ។
លោកមៀម ស៊ីសារ៉ា បានបញ្ជាក់ថា មូលហេតុដែលបឺតខាំប្រកួតចាញ់គេនេះគឺដោយសារមិនមែនប្រកួតជាលក្ខណៈក្បាច់ខ្មែរបុរាណនោះឡើយ តែជាការប្រកួតលក្ខណៈ Kick Boxing ប្រើដៃនិងប្រើជើង ប៉ុន្តែមិនឱ្យប្រើជង្គង់ទេ ។ ការប្រកួតបែបនេះតាមពិតយើងមិនអាចឈ្នះគេបានឡើយ ព្រោះថាក្បាច់បុរាណខ្មែរយើងមានប្រើកែងនិងជង្គង់ទើបជាក្បាច់បុរាណខ្មែរពិតប្រាកដ ។ លោកគិតថា ការបញ្ជូនកីឡាករខ្មែរ គ្រូប្រដាល់ខ្មែរទៅក្រៅប្រទេសគឺជារឿងល្អបំផុត ព្រោះយើងមានឱកាសបានធ្វើការផ្សព្វផ្សាយសិល្បៈវប្បធម៌ជាតិខ្មែរ ជាពិសេសក្បាច់គុនបុរាណខ្មែរឱ្យគេបានស្គាល់នៅពាសពេញពិភពលោក ។ ប៉ុន្តែផ្ទុយទៅវិញកីឡាករបឺត ខាំ ដែលទៅតាមគេលើកនេះមិនបានផ្សព្វផ្សាយក្បាច់គុនបុរាណខ្មែរឡើយ បានន័យថា គឺជាការប្រកួតដើម្បីបំពេញផលប្រយោជន៍របស់គេប៉ុណ្ណោះ ។
លោកមៀម ស៊ីសារ៉ា បានឱ្យដឹងទៀតថា សហព័ន្ធកីឡាប្រដាល់កម្ពុជា និងសហព័ន្ធកីឡាប្រដាល់ក្បាច់បុរាណខ្មែរប្រចាំប្រទេសបារាំងបានចុះកិច្ចសន្យាព្រមព្រៀងគ្នារួចហើយ ក្នុងនោះគឺមានការឯកភាពគ្នាជាច្រើនចំណុច ក្នុងន័យថា កីឡាករខ្មែរនៅប្រទេសកម្ពុជា និងកីឡាករខ្មែរនៅប្រទេសបារាំងខាងណាទៅប្រកួតនៅខាងណាទាល់តែមានការដឹងឮពីសហព័ន្ធទាំង២ ទើបបាន បូករួមទាំងការផ្តល់តម្លៃខ្លួនផងដែរ គឺមានការកំណត់ច្បាស់លាស់ ។ ម្យ៉ាងទៀតសហព័ន្ធកីឡាប្រដាល់ក្បាច់បុរាណខ្មែរនៅបារាំងមានតួនាទីយ៉ាងសំខាន់ក្នុងការចូលរួមចំណែកផ្សព្វផ្សាយសិល្បៈវប្បធម៌ក្បាច់គុនបុរាណខ្មែរឱ្យបានទូលំទូលាយបំផុត និងចូលរួមការពារថែរក្សាវប្បធម៌ដ៏ល្អផូរផង់របស់ខ្មែរយើងឱ្យបានគង់វង្សមិនត្រូវយកក្បាច់គុនរបស់គេមកលាយឡំនោះឡើយ ។
លោកឧត្តមសេនីយ៍តែម ម៉ឺន ប្រធានសហព័ន្ធកីឡាប្រដាល់កម្ពុជាបានមានប្រសាសន៍ដែរថា ចំពោះកីឡាករបឺត ខាំ លោកបានហៅគេឱ្យមកចុះកិច្ចសន្យារួចហើយ និងថែមទាំងព្រមានខ្លាំងៗទៀតថាមិនឱ្យមានលើកក្រោយទៀតទេ ហើយបើសិនជាមានម្តងទៀតលោកនឹងលុបឈ្មោះចេញពីបញ្ជីកីឡាប្រដាល់មិនខានឡើយ ។ ការដែលលោកនិយាយបែបនេះមិនសំដៅតែបឺត ខាំនោះទេ គឺគ្រប់កីឡាករប្រដាល់ទាំងអស់តែម្តង ៕
ចែករំលែកព័តមាននេះ