ប្រទេសប៉ាគីស្ថានកាលពីថ្ងៃទី៣កក្កដាបានទទួលយកការសុំទោសរបស់សហរដ្ឋអាមេរិក លើការវាយប្រហារតាមអាកាសចុងក្រោយរបស់អូតង់កាលពីខែវិច្ឆិកា លើប៉ុស្តិ៍ត្រួតពិនិត្យ២កន្លែងនៅតាមព្រំដែនជាមួយអាហ្វហ្គានីស្ថាន បណ្តាលឱ្យស្លាប់ទាហានប៉ាគីស្ថាន២៤នាក់ដែលញ៉ាំងឱ្យទំនាក់ទំនងរវាងប្រទេសទាំង២ធ្លាក់ចុះទាបបំផុត ។
សារព័ត៌មានក្នុងស្រុក DUNYA រាយការណ៍ថា ការសុំទោសធ្វើដោយរដ្ឋមន្ត្រីការបរទេសអាមេរិកលោកស្រីហុីលឡារីគ្លីនតុនចំពោះរដ្ឋមន្ត្រីការបរទេសប៉ាគីស្ថានពេលជួបសន្ទនាគ្នាតាមទូរស័ព្ទត្រូវបានទទួលយកក្នុងឱកាសនៃកិច្ចប្រជុំរបស់គណៈកម្មាធិការការពារនៃគណៈរដ្ឋមន្ត្រីដែលប្រព្រឹត្តទៅកាលពីយប់ថ្ងៃទី៣កក្កដា ។
ក្រោយការសុំទោសនេះ ប៉ាគីស្ថានប្រកាសប្រាប់សហរដ្ឋអាមេរិកពីការសម្រេចរបស់ខ្លួនបើកផ្លូវផ្គត់ផ្គង់តាមជើងគោកកាត់ប្រទេសខ្លួនឱ្យដល់កងទ័ពអូតង់នៅអាហ្វហ្គានីស្ថានវិញ ។ ពួកតាលីបង់ប៉ាគីស្ថានបានគំរាមភ្លាមៗថានឹងវាយប្រហារលើក្បួនដឹកជញ្ជូនទាំងឡាយរបស់អូតង់។
ផ្លូវផ្គត់ផ្គង់ទាំងឡាយត្រូវបិទដោយប៉ាគីស្ថានជាការសងសឹកចំពោះការស្លាប់ទាហានរបស់ខ្លួន២៤នាក់ដោយសារការវាយប្រហារច្រឡំរបស់អូតង់កាលពីខែវិច្ឆិកា ។លោកស្រីគ្លីនតុន ពេលជួបសន្ទនាជាមួយរដ្ឋមន្ត្រីការបរទេសប៉ាគីស្ថានលោកស្រីហុីណា រ៉ាបបានីខា បានថ្លែងពីការសុំទោសនេះ ។ លោកស្រីមានប្រសាសន៍ថា លោកស្រីខានិងរូបខ្ញុំទទួលស្គាល់ពីការច្រឡំដែលនាំឱ្យស្លាប់ទាហានប៉ាគីស្ថានច្រើននាក់ ។
យើងមានការស្រងាកចិត្តចំពោះការបាត់បង់របស់កងទ័ពបា៉គីស្ថានហើយយើងសន្យារួមសហការគ្នាយ៉ាងជិតស្និទ្ធជាមួយប៉ាគីស្ថាននិងអាហ្វហ្គានីស្ថានដើម្បីកុំឱ្យការច្រឡំបែបនេះកើតមានជាថ្មីទៀត ។
លោកស្រីខាថ្លែងទៅកាន់លោកស្រីគ្លីនតុន ថាផ្លូវទាំងឡាយកំពុងបើកឡើងវិញ ៕
ចែករំលែកព័តមាននេះ