ឯកអគ្គរាជទូតអង់គ្លេសអះអាងពីការជួយដល់កម្ពុជាលើផ្នែកអប់រំ
បញ្ចូលអត្ថបទ ៖ ស្រីណា កោះ
ថ្ងៃសៅរ៏ ទី១៦ ខែមិថុនា ឆ្នាំ២០១២ ម៉ោង ០៩:០០
កោះសន្តិភាព
ទិដ្ឋភាពពិធីប្រជុំ
ខេត្តបាត់ដំបង ៖ លោកMark Gooding ឯកអគ្គរាជទូតចក្រភពអង់គ្លេសប្រចាំប្រទេសកម្ពុជាបានជួបសិស្ស-និស្សិតកម្ពុជាចំនួន១២០នាក់នៅបណ្ណាល័យនៃសាកលវិទ្យាល័យបញ្ញាសាស្ត្រក្នុងខេត្តបាត់ដំបងកាលពីរសៀលថ្ងៃទី១២ មិថុនា ឆ្នាំ២០១២ ដោយមានការចូលរួមពីលោកជីវ រដ្ឋា ព្រឹទ្ធបុរសមហាវិទ្យាល័យសេដ្ឋកិច្ចនិងពាណិជ្ជសាស្ត្រនៃសាកលវិទ្យាល័យបញ្ញាសាស្ត្រកម្ពុជា និងសាស្ត្រាចារ្យ បុគ្គលិកទាំងអស់ ។
លោកជីវ រដ្ឋា បានលើកឡើងពីការរីកចម្រើនរបស់និស្សិតសាកលវិទ្យាល័យបញ្ញាសាស្ត្រក្នុងខេត្តបាត់ដំបងដែលមានការសិក្សាគ្រប់មុខវិជ្ជាទាំងអស់ និងកំពុងជំរុញពង្រឹងបន្ថែមទៀតជាមួយប្រទេសជាដៃគូ ។ លោកMark Gooding បានធ្វើបទបង្ហាញអំពីប្រវត្តិចក្រភពអង់គ្លេស តាំងពីសម័យមុនៗ រហូតមកដល់បច្ចុប្បន្នមានការរីកចម្រើនគ្រប់វិស័យ សំខាន់ទំនាក់ទំនងល្អជាមួយបណ្តាប្រទេសលើសាកលលោក។ដោយឡែកជាមួយកម្ពុជា ប្រទេសអង់គ្លេស បានទទួលសិស្សពីកម្ពុជាទៅបន្តការសិក្សាប្រមាណជាង២០០នាក់ នាពេលបច្ចុប្បន្ន ហើយពេលនេះបានមកជួបផ្ទាល់ជាមួយសិស្ស និស្សិតកំពុងសិក្សានៅទីនេះ និងជាការចូលរួមក្នុងការរំលឹកខួប៦០ឆ្នាំ របស់ម្ចាស់ក្សត្រីអេលីហ្សាបែត ផងដែរ ។
លោកឯកអគ្គរាជទូតបន្តទៀតថា ក្នុងបេសកកម្មមកកាន់ខេត្តបាត់ដំបងនេះគឺមកប្រគល់ដីដែលដោះមីនរួចឱ្យទៅប្រជាជនកម្ពុជាបានបង្កបង្កើនផល ព្រោះនៅទីនេះមានជំនួយយ៉ាងច្រើនពីប្រជាជនអង់គ្លេសជួយដល់ប្រទេសកម្ពុជា និងជួយពង្រឹងសហគមន៍បន្ថែមទៀតរវាងអង់គ្លេសនិងកម្ពុជា ។ អង់គ្លេសនឹងជួយជំរុញជាបន្តទៀតលើវិស័យអប់រំសិក្សាធិការ ព្រោះបានឃើញសិស្សនិស្សិតនៅទីនេះមានការព្យាយាមប្រឹងប្រែងខ្លាំងណាស់ក្នុងការរៀនសូត្រ។ ជាមួយនេះនឹងបន្តជួយដល់សាលាក្តីខ្មែរក្រហមដែលកំពុងដំណើរការនិងបន្តការគាំទ្រការពារកុមារដែលងាយរងគ្រោះនិងជួបឧបសគ្គផ្សេងៗនៅកម្ពុជា ៕
