ពួកអ្នកគាំទ្រចលនាអនាគតដែលប្រឆាំងនឹងរដ្ឋអំណាចស៊ីរីនិងពួកអ្នកគាំទ្រគណបក្សចរន្តអារ៉ាប់ដែលគាំទ្រប្រធានាធិបតីស៊ីរីលោកបាចា អាល់អាសាដបានប៉ះទង្គិចគ្នាកាលពីព្រឹកថ្ងៃទី២១ឧសភានៅក្រុងបៃរូត រដ្ឋធានីលីបង់ បណ្តាលឱ្យមនុស្សស្លាប់២នាក់ ហើយ១៨នាក់ទៀតត្រូវរបួស ។
ការប៉ះទង្គិចគ្នាបានផ្ទុះឡើងនាវេលាម៉ោង៣ទៀបភ្លឺដោយអំពើហិង្សានេះទាក់ទិនដល់ការស្លាប់របស់ប្រមុខសាសនារបស់ពួកស៊ុននីតម្នាក់កាលពីថ្ងៃទី២០ឧសភា ដោយសារកងទ័ពលីបង់នៅភាគខាងជើងប្រទេសដែលបង្កឱ្យមានភាពតានតឹងមួយក្នុងប្រទេសដែលកើតការប៉ះទង្គិចគ្នារវាងសហគមន៍នានាបណ្តាលឱ្យមនុស្សស្លាប់១០នាក់រយៈពេលប៉ុន្មានថ្ងៃចុងក្រោយនេះ។
ការប៉ះទង្គិចគ្នាកើតមានរវាងបណ្តាមនុស្សរបស់ចលនាអនាគតជាចលនារបស់ពួកស៊ុននីត ដែលមានភាគច្រើនហើយដឹកនាំដោយលោកសាអាដ ហារីរី ប្រមុខពួកប្រឆាំងលីបង់ ដែលប្រទូស្តរ៉ាយនឹងក្រុងដាម៉ាស់ និងបណ្តាមនុស្សគណបក្សចរន្តអារ៉ាប់ជាគណបក្សស៊ុននីតដែរ តែគាំទ្រលោកបាចា អាល់អាសាដ ។ ការប៉ះទង្គិចគ្នានោះកើតមានក្នុងសង្កាត់តារីក ដែលមានពួកស៊ុននីតភាគច្រើននាភាគខាងលិចក្រុងបៃរូតដែលមានទីស្នាក់ការរបស់គណបក្សចរន្តអារ៉ាប់ ។ អគារទីស្នាក់ការគណបក្សនេះរងការវាយប្រហារ រួចម៉ូតូជាច្រើនសិបគ្រឿងត្រូវដុតបំផ្លាញ ចំណែករថយន្តជាច្រើនគ្រឿងត្រូវបែកកញ្ចក់ ៕
ចែករំលែកព័តមាននេះ