កីឡាករហូឡង់ Robert Gesinkបានក្លាយជាម្ចាស់ពានជើងឯកកម្មវិធី Tour of Californiaក្រោយពីរូបគេបាននាំមុខលើតារាងថិរវេលាសរុបក្នុងដំណាក់ផ្តាច់ព្រ័ត្រដែលរៀបចំធ្វើកាលពីថ្ងៃអាទិត្យទី២០ឧសភា ។ ការប្រណាំងក្នុងដំណាក់នេះបញ្ចប់នៅទីក្រុង Los Angelesរដ្ឋកាលីហ្វ័រនីញ៉ាសហរដ្ឋអាមេរិក។
Gesinkដែលជាអ្នកជិះកង់ឱ្យក្រុមRabobank Cycling Teamបានយកឈ្នះជើងឯកនៃកម្មវិធីប្រណាំងដែលមានចម្ងាយផ្លូវសរុប ១១៨៤,១គីឡូម៉ែតមាន៨ដំណាក់ដោយប្រើអស់ថិរវេលារួម ៣០ម៉ោង ៤២នាទីនិង៣២វិនាទី ។ ចំ ណាត់ថ្នាក់លេខ២បានទៅលើកីឡាករអាមេរិក David Zabriskieរបស់ក្រុម Garmin – Barracudaដែលបានប្រើអស់ថិរវេលារួមច្រើនជាង Gesink ៤៦វិនាទី ។ ឯចំណាត់ថ្នាក់លេខ៣បានទៅកីឡាករអាមេរិកដដែល។ Thomas Danielsonដែលជាមិត្តរួមក្រុមរបស់David Zabriskieប្រើថិរវេលារួមច្រើនជាង Gesink ៥៤វិនាទី ។
សម្រាប់កីឡាករវ័យ ២៥ឆ្នាំ Gesink នេះគឺជាជោគជ័យលើកទី១របស់គេហើយចាប់តាំងពីរូបគេបានរងគ្រោះថ្នាក់បាក់ជើងក្នុងពេលហ្វឹកហាត់កាលពី៨ខែមុន ។ កាលពីខែកញ្ញាឆ្នាំ ២០១០ គេបានជួបរឿងអកុសលចំនួន២លើកបន្តបន្ទាប់គ្នានោះគឺបាក់ជើង ៤កំណាត់និងឪពុកស្លាប់។ ក្នុងឆ្នាំនោះ Gesinkក៏បានទៅចូលរួមការប្រណាំង Tour de Franceផងដែរ តែគេដណ្តើមបានត្រឹមចំណាត់ថ្នាក់លេខ៥ប៉ុណ្ណោះ ។
គេបានបញ្ជាក់ថា៖« នៅពេលដែលអ្នកមានពេលវេលាល្អនឹងទទួលបានជ័យជម្នះ នោះជាគោលដៅរបស់យើងគ្រប់គ្នា»។
ចំណែកដំណាក់ទី៨ដែលជាដំណាក់ផ្តាច់ព្រ័ត្រ ជ័យជម្នះបានទៅលើកីឡាករស្លូវ៉ាគី Peter Sagan។
Saganដែលជិះកង់ឱ្យក្រុម Liquigas-Cannondaleបានយកឈ្នះដំណាក់មានចម្ងាយផ្លូវ៧២គីឡូម៉ែត្រដែលការប្រណាំងធ្វើនៅជុំវិញទីក្រុង Los Angelesរដ្ឋកាលីហ្វ័រនីញ៉ាសហរដ្ឋអាមេរិក។ Saganបានបញ្ចប់ដំណាក់នេះដោយប្រើអស់ថិរវេលា១ម៉ោង២៧នាទីនិង៣៦វិនាទីយកឈ្នះកីឡាករបែលហ្ស៊ិក Tom Boonenជិះឱ្យក្រុម Omega Pharma-Quickstepនិងឈ្នះកីឡាករអាល្លឺម៉ង់ Gerald Ciolekរបស់ក្រុម Omega Pharma-Quickstepដែលអ្នកទាំង២ប្រើថិរវេលាស្មើគ្នា ។ Saganបាននិយាយថា៖«នៅគីឡូម៉ែត្រចុងក្រោយក្នុងដំណាក់នេះពិតជាគ្រោះថ្នាក់ខ្លាំងណាស់ ជាពិសេសនៅផ្លូវកាច់ជ្រុង តែវាល្អវិញ ដែលយើងបានជិះកាត់វាដល់៦លើក»។
សូមបញ្ជាក់ថាការប្រណាំងកង់កម្មវិធី Tour of Californiaឆ្នាំនេះមាន៨ដំណាក់និងមានចម្ងាយផ្លូវសរុប១១៨៤,១គីឡូម៉ែត្រ។ ការប្រណាំងចាប់ផ្តើមពីថ្ងៃទី១៣ខែឧសភានៅទីក្រុង Santa Rosa។ ដោយឡែកដំណាក់ទី៨ដែលជាដំណាក់ផ្តាច់ព្រ័ត្រមានចម្ងាយផ្លូវ៧២គីឡូម៉ែត្រដោយការប្រណាំងធ្វើឡើងជុំវិញទីក្រុង Los Angelesរដ្ឋកាលីហ្វ័រនីញ៉ាសហរដ្ឋអាមេរិក ៕
ចែករំលែកព័តមាននេះ