យោងទៅតាមប្រភពព័ត៌មានដេលី ម៉េល ចេញផ្សាយកាលពីថ្ងៃចន្ទទី២១ ឧសភា ឆ្នាំ២០១២ បានឱ្យដឹងថា ក្រុមអ្នកគាំទ្ររាប់ម៉ឺននាក់បានចេញមកឈរត្រៀបត្រាតាមដងវិថីនានាក្នុងទីក្រុងឡុង ដើម្បីអបអរសាទរការដង្ហែក្បួនពានរង្វាន់យូហ្វាឆេមពានលីករបស់ក្លឹប Chelsea ដែលបានយកឈ្នះ Bayern ដោយលទ្ធផល 4-3 ទាត់បាលប៉េណាល់ទី កាលពីរាត្រីថ្ងៃសៅរ៍ទី១៩ ឧសភា ឆ្នាំ២០១២ កន្លងមកនេះ។
នៅក្នុងការដង្ហែក្បួនគេបានឃើញវត្តមានកីឡាករចនធៀរី ជិះរថយន្ត ពណ៌ខៀវអត់ដំបូលជាមួយមិត្តរួមក្រុមដោយស្រែកបន្ទរជ័យជម្នះរបស់ខ្លួនលាយឡំជាមួយនឹងសំឡេងរបស់អ្នកគាំទ្រដែលមើលទៅហាក់ដូចជាសប្បាយខ្លាំងណាស់ ។កីឡាករខ្សែប្រយុទ្ធសញ្ជាតិកូតឌ័រវ័រដ្រកបាបានដើរអមជាមួយនឹងរថយន្ត ហើយបានទទួលការថើបពីអ្នកគាំទ្រតាមដងផ្លូវនៅភាគខាងលិចទីក្រុងឡុង។
កីឡាករដ្រកបា បានស្រែកប្រាប់អ្នកគាំទ្រថា នេះគឺជាសមិទ្ធផលរបស់យើងទាំងអស់គ្នាដែលបានមកដោយលំបាកខ្លាំងណាស់ ។ លោកបានបន្តទៀតថា ខ្ញុំខិតខំតស៊ូលំបាកអស់រយៈពេល៨ឆ្នាំ ហើយមិត្តរួមក្រុមខ្លះទៀតបានចំណាយពេលវេលាយូរជាងនេះ ទម្រាំយើងមានឱកាសលើកពានយូហ្វាឆេមពានលីកលើកទី១ ។
ចំណែកឯអ្នកគាំទ្រវិញបានគ្រវីទង់ជាតិដែលមានស្លាកសញ្ញាក្លឹប Chelsea និងទង់អនុស្សាវរីយ៍ ព្រមទាំងពាក់ម៉ាស់មុខរូបលោករូប៊ើតូ ម៉ាតេអូ គ្រូបង្វឹកក្លឹប Chelsea ដើម្បីសម្តែងនូវគុណូបការៈដល់រូបលោកដែលដឹកនាំក្លឹប Chelsea ឱ្យបានទទួលជើងឯកក្របខណ្ឌយូហ្វាឆេមពានលីកឆ្នាំ២០១២នេះ ៕
ចែករំលែកព័តមាននេះ