ក្រុមហ្វាតាហ៍និងក្រុមហាម៉ាស់ ជាក្រុមប៉ាឡេស្ទីនធំ២ដែលប្រកួតប្រជែងគ្នាបានចុះហត្ថលេខាកាលពីថ្ងៃទី២០ឧសភាក្នុងទីក្រុងគែរ ប្រទេសអេហ្ស៊ីបលើកិច្ចព្រមព្រៀងមួយដោយយោងតាមកិច្ចព្រមព្រៀងនោះប្រមុខអាជ្ញាធរជាតិប៉ាឡេស្ទីន លោកម៉ាមូដអាប់បាស់ និងបន្តតំណែងហើយបង្កើតរដ្ឋាភិបាលបណ្តោះអាសន្នមួយ ។
លោកអាសហ្សាម អាល់ អាម៉ាដ មន្ត្រីម្នាក់របស់ក្រុមហ្វាតាហ៍ និយាយថា កិច្ចព្រមព្រៀងនេះនឹងអាចឱ្យគណៈកម្មាធិការបោះឆ្នោតកណ្តាល CEC ធ្វើប្រតិបត្តិការនៅជ្រោយហ្គាហ្សាដែលស្ថិតក្រោមការត្រួតត្រារបស់ក្រុមហាម៉ាស់ មុនដំណាច់ខែឧសភានេះ ។
លោកអាល់អាម៉ាដ ពន្យល់ថាកិច្ចព្រមព្រៀងថ្មីនេះគឺក្នុងគោលបំណងអនុវត្តកិច្ចព្រមព្រៀងក្រុងដូហា ដែលចុះហត្ថលេខាកាលពីខែកុម្ភៈ កន្លងមកនេះ ។ កិច្ចព្រមព្រៀងក្រុងដូហា គ្រោងបង្កើតរដ្ឋាភិបាលបណ្តោះអាសន្នមួយដឹកនាំដោយលោកអាប់បាស់ដែលរដ្ឋាភិបាលនោះត្រូវទទួលបន្ទុករៀបចំការបោះឆ្នោត ។លោកអាប់បាស់ ធ្លាប់បានថ្លែងថា លោកបដិសេធមិនបង្កើតរដ្ឋាភិបាលមួយឡើយបើក្រុមហាម៉ាស់មិនអនុញ្ញាតឱ្យCECធ្វើប្រតិបត្តិការនៅជ្រោយហ្គាហ្សា ។
ជាមួយការចុះហត្ថលេខាលើកិច្ចព្រមព្រៀងទីក្រុងគែរក្រុមប៉ាឡេស្ទីនសំខាន់ទាំង២បានជំនះឧបសគ្គសំខាន់លើមាគ៌ាឆ្ពោះទៅបញ្ចប់ជម្លោះជាមួយគ្នា ៕
ចែករំលែកព័តមាននេះ