យោងទៅតាមប្រភពព័ត៌មានពីគេហទំព័រ របស់យូហ្វា ចេញផ្សាយកាលពីថ្ងៃអាទិត្យទី២០ ឧសភា ឆ្នាំ២០១២ បានឱ្យដឹងថា លោកម័រថិន អូលសិន គ្រូបង្វឹកក្រុមជម្រើសជាតិដាណឺម៉ាក បានសម្រេចកោះហៅកីឡាករចាំទីក្លឹប Man Utd Anders Lindegaard ចូលមកលេងឱ្យក្រុមជម្រើសជាតិសម្រាប់ការប្រកួតយូរ៉ូ ២០១២ ដែលរៀបចំធ្វើឡើងដោយសហម្ចាស់ផ្ទះប៉ូឡូញ-អ៊ុយក្រែន ។
លោកអូលសិន បាននិយាយថា បន្ទាប់ពីធ្វើការហ្វឹកហាត់រួមគ្នាអស់រយៈពេល៣ថ្ងៃ ខ្ញុំគ្មានអ្វីសង្ស័យទៅទៀតទេ ចំពោះបញ្ហារបួសរបស់កីឡាករចាំទីវ័យ២៨ឆ្នាំរូបនេះ ដូច្នេះខ្ញុំត្រូវតែដាក់ឈ្មោះរបស់គាត់ចូលក្នុងបញ្ជីក្រុមជម្រើសជាតិ ។ រួមជាមួយនឹងការកោះហៅកីឡាករចាំទីរបស់ក្លឹប Man Utd គ្រូបង្វឹកសញ្ជាតិដាណឺម៉ាក រូបនេះ ក៏បានកោះហៅកីឡាករខ្សែការពារ Jannik Vestergaar មកពីក្លឹប Hoffenheim និងកីឡាករខ្សែប្រយុទ្ធ Nicklas Pedersen មកពីក្លឹប Groningen ។
គួររំលឹកដែរថា កីឡាករចាំទី Anders Lindegaard ជាកីឡាករចាំទីបម្រុងរបស់ក្លឹប Man Utd ។ លោកមិនបានបង្ហាញវត្តមានឱ្យក្លឹបនេះចាប់តាំងពីខែមករាមកម៉្លេះ ដោយសារបញ្ហារបួសក ជើង តែឥឡូវនេះលោកបានជាសះស្បើយរួចហើយ ៕
ចែករំលែកព័តមាននេះ