ប្រមុខរដ្ឋនិងប្រមុខរដ្ឋាភិបាលរបស់ប្រទេស២៨ជាសមាជិករបស់អង្គការអូតង់បានជួបប្រជុំគ្នាកាលពីថ្ងៃទី២០ឧសភានៅទីក្រុងស៊ីកាហ្គោ ក្នុងក្របខណ្ឌនៃកិច្ចប្រជុំកំពូលលើកទី២៥របស់សម្ព័ន្ធភាពយោធានេះដើម្បីពិភាក្សាជាពិសេសពីបញ្ហាអាហ្វហ្គានីស្ថាន។
ពេលបើកកិច្ចប្រជុំកំពូលនោះប្រធានាធិបតីអាមេរិកលោកបារ៉ាក់ អូបាម៉ា គូសបញ្ជាក់ថា អូតង់ប្តេជ្ញាម៉ឺងម៉ាត់ថែរក្សាសន្តិសុខរួមរបស់បណ្តាប្រទេសជាសមាជិក ។ លោកបន្តថា បណ្តាប្រទេសជាសម្ព័ន្ធមិត្តបានបោះទុនវិនិយោគក្នុងសមត្ថភាពថ្មីដើម្បីទប់ទល់នឹងការប្រឈមថ្មីៗនៃសន្តិសុខ ។ បណ្តាប្រទេសជាសមាជិកអូតង់ ក៏ត្រូវរួមសហការផងដែរជាមួយបណ្តាប្រទេសជិតខាងនិងបណ្តាដៃគូដើម្បីពង្រឹងបណ្តាញនៃភាពជាដៃគូសាកលខាងសន្តិសុខ ។
ចំណែកអគ្គលេខាធិការអូតង់លោក ANDERS FOGH RASMUSSEN វិញគូសបញ្ជាក់ថា កិច្ចប្រជុំកំពូលនេះត្រូវបញ្ជាក់ជាថ្មីពីទំនាក់ទំនងស្លាប់រស់រវាងអាមេរិកខាងជើងនិងអឺរ៉ុប ក្នុងសតវត្សទី២១នេះ ។ លោកក៏ថ្លែងផងដែរថា អូតង់ពុំមានចេតនាធ្វើអន្តរាគមន៍នៅស៊ីរីឡើយរួចលោកយល់ថាមធ្យោបាយប្រសើរដើម្បីបញ្ចប់អំពើហិង្សាក្នុងប្រទេសនេះគឺផែនការរបស់លោកកូហ្វីអាណាន់ ។
ពិតណាស់កិច្ចប្រជុំកំពូលអូតង់លើកនេះផ្តោតសំខាន់លើបញ្ហាអាហ្វហ្គានីស្ថាន ខណៈដែលកងទ័ពអាមេរិកនិងអូតង់គ្រោងដកចេញពីប្រទេសនោះនាដំណាច់ឆ្នាំ២០១៤ខាងមុខនេះ ៕
ចែករំលែកព័តមាននេះ