ម៉ារីយ៉ា សារ៉ាប៉ូវ៉ាបានសម្តែងក្តីរីករាយជាខ្លាំងបន្ទាប់ពីបានយកឈ្នះពានជើងឯកកម្មវិធី Internazionali BNL d’Italia២ឆ្នាំបន្តបន្ទាប់គ្នា។ ជ័យជម្នះលើកទី២នេះកើតមានឡើងក្រោយពីនាងបំបាក់កីឡាការិនីជើងខ្លាំងរបស់ចិនលីណានៅវគ្គផ្តាច់ព្រ័ត្រក្នុងលទ្ធផល៤-៦,៦-៤និង៧-៦ ។ ការប្រកួតក្នុងវគ្គនេះរៀបចំធ្វើនៅទីក្រុងរ៉ូម ប្រទេសអុីតាលីកាលពីថ្ងៃទី២០ខែឧសភា ។
សម្រាប់សារ៉ាប៉ូវ៉ាដែលជាកីឡាការិនីលំដាប់ទី២ពិភពលោក នេះគឺពានជើងឯកលើកទី២៦ហើយនៅក្នុងអាជីពរបស់ខ្លួន។ ការប្រកួតនេះផ្អាកអស់ជាង២ម៉ោងបន្ទាប់ពីមានភ្លៀងធ្លាក់ជោកជាំ។
នាងបានថ្លែងថា៖«នេះជាការមួយមិនល្អ។គ្មានអ្នកណាម្នាក់ក្នុងចំណោមពួកយើងអាចគ្រប់គ្រងវាបានទេ។ ដូច្នេះលើកនេះពិតជាគ្មានអ្នកចាញ់ទេ»។
កាលពីប្រកួតក្នុងក្របខណ្ឌធំ French Openឆ្នាំ២០១១ សារ៉ាប៉ូវ៉ាបានចាញ់ក្រោមថ្វីដៃនាងលីណាធ្លាក់ចេញពីវគ្គពាក់កណ្តាលផ្តាច់ព្រ័ត្រ។ ចាប់ពីពេលនោះមក ពួកគេទាំងពីរនាក់មិនដែលបានជួបប្រកួតជាមួយគ្នាឡើយ។ នេះជាលើកទី១ហើយដែលពួកគេបានជួបគ្នា ហើយជ័យជម្នះលើកនេះក៏ជាការសងសឹកមួយផងដែរសម្រាប់សារ៉ាប៉ូវ៉ា។ ដោយឡែកសម្រាប់ការប្រកួតនៅលើទីលានដីឥដ្ឋវិញ នេះគឺជាពានលើកទី២ហើយ។
កាលពីខែមេសាកន្លងមក កីឡាការិនីរុស្ស៊ីរូបនេះបានយកឈ្នះពានជើងឯកប្រកួតលើទីលានដីឥដ្ឋលើកទី១របស់ខ្លួននៅទីក្រុង Stuttgartប្រទេសអាល្លឺម៉ង់។ ចំណែកលទ្ធផលនៃការប្រកួតផ្នែកបុរសវិញរវាងកីឡាករអេស្ប៉ាញរ៉ាហ្វាអែល ណាដាល់និងកីឡាករស៊ែប៊ីណូវ៉ាក់ យ៉ូកូវិចនៅមិនទាន់ដឹងនៅឡើយទេខណៈមានការពន្យារពេលការប្រកួតរបស់ពួកគេបន្ទាប់ពីរំខានដោយភ្លៀង ។
នេះជាការជួបគ្នាក្នុងវគ្គផ្តាច់ព្រ័ត្រលើកទី៣២ហើយរវាងណាដាល់និងយ៉ូកូវិច។ ក្នុងចំនួននៃការជួបគ្នាទាំងអស់នេះ ណាដាល់ទទួលបានលទ្ធផលល្អជាងយ៉ូកូវិចគឺ ១៧ទល់នឹង ១៤៕
ចែករំលែកព័តមាននេះ