Matteo Rabottiniទទួលបានក្តីរីករាយជាលើកដំបូងនៅក្នុងអាជីពក៏ដូចជាក្នុងរដូវកាលក្រោយពីបានយកឈ្នះដំណាក់ទី១៥ប្រណាំងកង់កម្មវិធី Tour of Italyឬ Giro d’Italiaកាលពីថ្ងៃអាទិត្យទី២០ខែសភា ។ ការប្រណាំងក្នុងដំណាក់នេះបញ្ចប់នៅទីក្រុង Lecco/Pian dei Resinelliប្រទេសអ៊ីតាលី ។
Rabottiniដែលជិះកង់ឱ្យក្រុម Farnese Vini – Selle Italiaបានយកឈ្នះដំណាក់មានចម្ងាយផ្លូវ១៧២គីឡូម៉ែត្រចេញដំណើរពីទីក្រុង Busto Arsizioឆ្ពោះទៅកាន់ទីក្រុង Lecco/Pian dei Resinelliប្រទេសអុីតាលីដោយប្រើអស់ថិរវេលា៥ម៉ោង១៥នាទីនិង៣០វិនាទីយកឈ្នះកីឡាករមកពីអេស្ប៉ាញJoaquim Rodriguez Oliver ជិះឱ្យក្រុម Katusha Teamដែលប្រើថិរវេលាស្មើគ្នានិងឈ្នះកីឡាករអេស្ប៉ាញម្នាក់ទៀតAlberto Losada Alguacilរបស់ក្រុម Katusha Teamដែលប្រើថិរវេលាច្រើនជាង ២៣វិនាទី។
ថ្លែងបន្ទាប់ពីទទួលបានជ័យជម្នះ Rabottiniបញ្ជាក់ដោយក្តីរីករាយថា៖«ឈ្នះការប្រជែងគ្នាលើកំណាត់ផ្លូវឡើងទួលគឺជារឿងមិនគួរឱ្យជឿ។ នៅពេលដែលកីឡាករ Rodriguezតាមប្រកិតក្រោយខ្ញុំុ ៗបានបាត់បង់អស់នូវក្តីសង្ឃឹមក្នុងការទទួលបានជ័យជម្នះ តែខ្ញុំបានបង្អាក់ការរុលទៅមុខរបស់គេជាមួយនឹងបច្ចេកទេសដ៏ល្អ។ ដូចជាកីឡាករផ្សេងទៀតដែរ ខ្ញុំមកប្រណាំងនៅទីនេះដោយសង្ឃឹមថាយកឈ្នះយ៉ាងហោចណាស់មួយដំណាក់។ ពេលខ្ញុំធ្វើបានហើយ នេះគឺជាថ្ងៃដ៏អស្ចារ្យមួយនៅក្នុងជីវិតរបស់ខ្ញុំ »។
ទោះជាយ៉ាងនេះក្តី ជ័យជម្នះលើកនេះមិនទាន់អាចជួយឱ្យកីឡាករ Rabottiniនាំមុខនៅលើតារាងថិរវេលាសរុបបានទេដ្បិតកីឡាករអេស្ប៉ាញ Joaquim Rodriguez ដែលបញ្ចប់ដំណាក់ក្នុងលំដាប់ទី២នោះសន្សំពេលវេលាបានយ៉ាងល្អបំផុតក្លាយជាអ្នកគ្រងអាវកាក់ពណ៌លឿងក្នុងនាមជាអ្នកនាំមុខគេ។
បន្ទាប់ពីបញ្ចប់ការប្រណាំងអស់១៥ដំណាក់មកនេះ Rodriguezប្រើថិរវេលាសរុបតិចជាងគេបំផុតគឺ៦៥ម៉ោង១១នាទីនិង៧វិនាទីនាំមុខកីឡាករកាណាដា Ryder Hesjedalរបស់ក្រុម Garmin – Barracudaដែលប្រើថិរវេលាច្រើនជាង៣០វិនាទី។ ឯកីឡាករម្ចាស់ផ្ទះIvan Bassoជិះឱ្យក្រុម Liquigas-Cannondaleស្ថិតនៅលំដាប់ទី៣បន្ទាប់ពីបានប្រើថិរវេលាច្រើនជាងRodriguez ១នាទីនិង២២វិនាទី ។
ការប្រណាំងកម្មវិធី Tour of Italyឬ Giro d’Italiaឆ្នាំនេះមាន២១ដំណាក់និងមានចម្ងាយផ្លូវសរុប៣៤៧៦គីឡូម៉ែត្រ។ ដោយឡែកដំណាក់ទី១៦ដែលជាដំណាក់បន្តមានចម្ងាយផ្លូវ១៧៤គីឡូម៉ែត្រដោយការប្រណាំងចាប់ចេញដំណើរពីទីក្រុង Limone sul Gardaទៅកាន់ទីក្រុង Falzes/Pfalzenប្រទេសអុីតាលី ៕
ចែករំលែកព័តមាននេះ