រាជធានីភ្នំពេញ៖ប្តីប្រពន្ធដែលទើបរៀបអាពាហ៍ពិពាហ៍បានចំនួន៩ថ្ងៃបានជួបគ្រោះថ្នាក់ចរាចរណ៍ដោយជិះម៉ូតូបុកជាមួយម៉ូតូមួយគ្រឿងទៀត បណ្តាលឱ្យបុរសជាប្តីរបួសធ្ងន់ប្រពន្ធរបួសស្រាល ដោយឡែក អ្នកបើកបរម៉ូតូម្ខាងទៀតនិងអ្នករួមដំណើរក៏រងរបួសដែរ ។គ្រោះថ្នាក់នេះកើតឡើង កាលពីវេលាម៉ោង៧និង៥០នាទីយប់ថ្ងៃទី១៨ ឧសភា នៅតាមផ្លួវភ្នំពេញ-ហាណូយ ស្ថិតក្នុងភូមិពោងពាយ សង្កាត់ភ្នំពេញថ្មី ខណ្ឌសែនសុខ ។
បុរសរងគ្រោះឈ្មោះ សុខ សិរី អាយុ២៦ឆ្នាំជាអ្នកបើកបរមានលំនៅក្នុងភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ រងរបួសធ្ងន់និងស្រ្តីជាប្រពន្ធឈ្មោះ តេង ស អាយុ២០ឆ្នាំ រងរបួសស្រាល ។ ចំណែកភាគីម៉ូតូម្ខាងទៀត រងរបួសចំនួន២នាក់ម្នាក់ឈ្មោះ ចំរើន ភេទប្រុស អាយុ៥០ឆ្នាំ រងរបួសធ្ងន់ និងអ្នករួមដំណើរឈ្មោះ អ៊ុក ចាន់លីន ភេទស្រី អាយុ៤៨ឆ្នាំ រងរបួសស្រាល ទាំងពីរនាក់មានទីលំនៅក្នុងភូមិអណ្តូង សង្កាត់ក្រាំងធ្នង់ ខណ្ឌពោធិ៍សែនជ័យ ។
តាមសាក្សីដែលឃើញហេតុការណ៍ឱ្យដឹងថា គ្រោះថ្នាក់ចរាចរណ៍នេះកើតឡើងរវាងម៉ូតូម៉ាកឌ្រីមសេ១២៥ ពណ៌ខ្មៅ ជិះដោយ២នាក់ប្តីប្រពន្ធ បុកជាមួយម៉ូតូសេ១០០កូរ៉េ ពណ៌ក្រហម ជិះគ្នា២នាក់ក្នុងទិសដៅបញ្ច្រាសគ្នា បណ្តាលឱ្យមនុស្សចំនួន៤នាក់រងរបួសក្នុងនោះធ្ងន់២ ស្រាល២ ត្រូវរថយន្តមកដឹកទៅកាន់មន្ទីរពេទ្យឯកជន ។
តាមស្រ្តីជាប្រពន្ធឈ្មោះ តេង ស ឱ្យដឹងថាពួកខ្លួនពីរនាក់ប្តីប្រពន្ធ ទើបតែរៀបការកាលពីថ្ងៃទី៩ ឧសភា ។ មុនពេលកើតហេតុ រូបនាងត្រូវប្តីឌុបទៅលេងឪពុកមា នៅភូមិស្លែងរលើង សង្កាត់ទឹកថ្លា ហើយធ្វើដំណើរតាមផ្លូវភ្នំពេញ-ហាណូយ ក្នុងគោលបំណងត្រឡប់ទៅផ្ទះវិញ ។ នៅពេលធ្វើដំណើរមកដល់កន្លែងកើតហេតុ ស្រាប់តែមានម៉ូតូសេ១០០កូរ៉េមួយគ្រឿងធ្វើដំណើរបញ្ច្រាសគ្នា បើកគេចជង្ហុកមកបុកម៉ូតូរបស់នាងតែម្តង ៕
ចែករំលែកព័តមាននេះ