Barcelona ជាក្លឹបយក្សក្នុងក្របខណ្ឌបាល់ទាត់ La Liga អេស្ប៉ាញ ត្រៀមបង្កើតមជ្ឈមណ្ឌលហ្វឹកហ្វឺនបាល់ទាត់ក្នុងប្រទេសឥណ្ឌា ក្នុងគោលបំណងពង្រីកសាលាហ្វឹកហ្វឺនបាល់ទាត់នៅទូទាំងពិភពលោក ដោយមានទិសដៅហ្វឹកហ្វឺនយុវវ័យជាង១០.០០០នាក់ ក្នុងរយៈពេល៣ឆ្នាំខាងមុខ ។
ក្លឹប Barcelona ជាក្លឹបឆ្នើមនៅអេស្ប៉ាញ ត្រៀមបង្កើតសាលាហ្វឹកហាត់បាល់ទាត់ក្នុងទីក្រុងញូវដេលី ប្រទេសឥណ្ឌា ហើយជាលើកដំបូងនៅក្នុងប្រទេសឥណ្ឌា មានមជ្ឈមណ្ឌលហ្វឹកហាត់បាល់ទាត់ Barcelona ជាអ្នកគ្រប់គ្រង រួមទាំងយល់ព្រមទទួលកុមារអាយុពី៦ដល់១៤ឆ្នាំចូលហ្វឹកហាត់ ។
សាលាហ្វឹកហាត់ក្នុងក្រុងញូវដេលី ត្រៀមសាងសង់នៅចុងឆ្នាំនេះ និងមានគម្រោងដំណើរការពង្រីកសាខានៅតាមទីក្រុងផ្សេងៗ ដូចជាក្រុងបុមបៃ បានហ្គាល័រ ហ្គាលហ្គាតតា ហ្គោអា ពូន និងអាមេដាបាត ។នាយកមជ្ឈមណ្ឌលហ្វឹកហាត់បាល់ទាត់នៃក្លឹប Barcelona លោកហ្សេប៊ី ម៉ាសេ ថ្លែងថា «គម្រោងនេះគឺជាផ្នែកមួយក្នុងគម្រោងការពិភពលោកដែលយើងផ្តោតជាសំខាន់ ។ ពួកយើងសង្ឃឹមយ៉ាងមុតមាំថានឹងបណ្តុះបណ្តាលកីឡាករបាល់ទាត់វ័យជំទង់ជាង១០.០០០នាក់ ក្នុងរយៈពេល៣ឆ្នាំខាងមុខ ។ យើងនឹងបង្ហាត់បង្រៀនពីសារសំខាន់ និងគុណភាពដែលចាំបាច់ដល់ការក្លាយជាគ្រូបង្វឹក និងកីឡាករដល់កុមារតាំងពីអាយុនៅតិច» ៕
ចែករំលែកព័តមាននេះ