ប្រភពពីទីភ្នាក់ងារព័ត៌មានបរទេស កាលពីថ្ងៃទី១៩ ឧសភា កន្លងមក ផ្សាយឱ្យដឹងថា នាងអេលីន ណ័រដេហ្គ្រេន ជនជាតិស៊ុយអែត អតីតប្រពន្ធលោកថៃហ្គ័រ វូដ កីឡាករវាយកូនហ្គោលពិភពលោក ជនជាតិអាមេរិក បានលេចឮព័ត៌មានក្នុងប្រព័ន្ធវេបសាយថា នាងឈប់សេពគប់ជាមួយលោកជេមីឌីងមេន គូស្នេហ៍ថ្មីជាអ្នកជំនួញហើយ ។
តាមរបាយការណ៍ពី«ភីផលម៉ាហ្គាហ្ស៊ីន»ជាទីភ្នាក់ងារព័ត៌មានដ៏ល្បីឈ្មោះរបស់អាមេរិក បានគូសបញ្ជាក់យោងតាមសម្តីមិត្តភក្តិរបស់នាងណ័រដេហ្គ្រេន ថា«នាងអេលីន ណេរដេហ្គ្រេន ប្រាប់ថា លោកជេមីជាបុរសឆ្នើម និងពួកគេនៅតែជាមិត្តនឹងគ្នា ប៉ុន្តែយើងគិតថា វាហាក់ដូចជាឆាប់ពេកសម្រាប់នាងណ័រដេហ្គ្រេន ដែលស្មោះស្ម័គ្រលើនរណាម្នាក់ក្រោយពីទើបលែងលះ» ។ មិត្តភក្តិនាងម្នាក់ផ្សេងទៀតបានប្រាប់ទីភ្នាក់ងារព័ត៌មានខាងលើថា «នាងណ័រដេហ្គ្រេន អាយុ៣២ឆ្នាំ ត្រូវការបុរសមានលក្ខណៈប្រាកដប្រជាសម្រាប់កូន២នាក់របស់នាង » ។
លោកជេមី ឌីងមេន ជាកូនប្រុសរបស់លោកមហាសេដ្ឋីម៉ៃឃើល ឌីងមេន ដែលកាលពីមុននេះមានដំណឹងថា មានភាពល្អូកល្អិននឹងនាងប្រ៊ីដជេត មុយណាហាន អតីតគូស្នេហ៍លោក ថុម ប្រេឌី កីឡាករបាល់ឱបអាមេរិកដ៏ល្បីឈ្មោះ ។ ចំណែកនាងណ័រដេហ្គ្រេន មានកូន២នាក់ជាមួយអតីតអ្នកវាយកូនហ្គោលលំដាប់ទី១ នៅលើលោក ប៉ុន្តែពួកគេទាំង២នាក់ បានលែងលះគ្នា កាលពីឆ្នាំ២០១០ ៕
ចែករំលែកព័តមាននេះ