កីឡាករអេស្ប៉ាញដានី ប៉េដ្រូហ្សាបានធ្វើឱ្យមានចំណាប់អារម្មណ៍ជាថ្មីពីបណ្តាអ្នកស្នេហាវិស័យកីឡាប្រណាំងម៉ូតូGrand Prixបន្ទាប់ពីរូបគេបានយកឈ្នះការប្រណាំងបណ្តោះអាសន្នកម្មវិធី French Grand Prixនៅទីលានប្រណាំងក្រុង Le Mansស្ថិតនៅភាគខាងលិចប្រទេសបារាំងកាលពីសៅរ៍ទី១៩ខែឧសភា ។
ប៉េដ្រូហ្សាដែលជាអ្នកបើកបរឱ្យក្រុមហុងដាបានយកឈ្នះការនាំមុខបណ្តោះអាសន្នជាលើកទី២០ក្នុងអាជីពបន្ទាប់ពីបញ្ចប់ការប្រណាំងក្នុងថិរវេលា១នាទីនិង៣៣.៦៣៨វិនាទីប្រជែងយកឈ្នះកីឡាករមិត្តរួមក្រុមសញ្ជាតិអូស្ត្រាលីខាស៊ី ស្តូន័រដែលបានបញ្ចប់ការប្រណាំងក្នុងចំណាត់ថ្នាក់ទី២។ ស្តូន័រប្រើអស់ថិរវេលា១នាទីនិង៣៣.៩៤១វិនាទីគឺ០.៣០៣វិនាទីយឺតជាងកីឡាករប៉េដ្រូហ្សា។ ចំណាត់ថ្នាក់ទី៣បានទៅលើកីឡាករជើងខ្លាំងមកពីអ៊ីតាលី Andrea Dovizioso។ Doviziosoដែលបើកបរឱ្យក្រុមយ៉ាម៉ាហាបានបញ្ចប់ការប្រណាំងក្នុងថិរវេលា១នាទីនិង៣៣.៩៧៦វិនាទី។
កីឡាករអេស្ប៉ាញម្នាក់ទៀតចច ឡូរេនហ្សូ ដែលជាអ្នកបើកបរឱ្យក្រុមយ៉ាម៉ាហាដែរនោះ បានបញ្ចប់ការប្រណាំងដោយប្រើអស់ថិរវេលា១នាទីនិង៣៤.១០៤វិនាទីគឺ០.៤៦៦វិនាទីយឺតជាងជាងកីឡាករប៉េដ្រូហ្សានិងតាមពីក្រោយដោយកីឡាករអង់គ្លេស Cal Crutchlowរបស់ក្រុម Tech 3 Yamahaដែលបញ្ចប់ការប្រណាំងក្នុងលំដាប់ទី៥។ កីឡាករអាមេរិក Ben Spiesរបស់ក្រុម យ៉ាម៉ាហាបានប្រើអស់ថិរវេលា១នាទីនិង៣៤.៦៦៩វិនាទីស្ថិតក្នុងលំដាប់ទី៦តាមពីក្រោយដោយកីឡាករជើងខ្លាំងរបស់អ៊ីតាលី វ៉ាឡឹនទីណូ រ៉ូស៊ីដែលបញ្ចប់ការប្រណាំងក្នុងចំណាត់ថ្នាក់លេខ៧។ ឯកីឡាករអាមេរិក Nicky Haydenបញ្ចប់ការប្រណាំងស្ថិតក្នុងចំណាត់ថ្នាក់ទី១១។ កីឡាកររូបនេះបានប្រើអស់ថិរវេលា១នាទីនិង៣៥.២៩១វិនាទីយឺតជាងកីឡាករប៉េដ្រូហ្សា១.៦៥៣វិនាទី។
ថ្លែងបន្ទាប់ពីទទួលបានជោគជ័យ ប៉េដ្រូហ្សាបានបញ្ជាក់ថា៖«វាជាចុងសប្តាហ៍ដ៏ស្រស់ត្រកាលមួយ។ ស្អែកគឺជាថ្ងៃប្រកួតប្រជែងយ៉ាងស្វិតស្វាញបំផុត។
ខ្ញុំគិតថា វាច្បាស់ជាមានការប្រដេញគ្នាយ៉ាងខ្លាំងក្លាបំផុត។ ការប្រណាំងក្នុងថ្ងៃនេះក្រុមរបស់យើងទាំងមូលបានធ្វើការងារជាមួយគ្នាបានយ៉ាងល្អបំផុត ជាពិសេសម៉ូតូប្រណាំងហាក់ពុំមានបញ្ហាចោទអ្វីទេ»។ គេបានបន្តថា៖«ខ្ញុំពិតជាសប្បាយចំពោះលទ្ធផលលើកនេះ។ ខ្ញុំបានសម្រុកទៅមុខយ៉ាងខ្លាំងទើបដណ្តើមបានការនាំមុខ តែយ៉ាងណាដល់ផ្លូវបត់ខ្ញុំបន្ថយល្បឿនបន្តិចដែរ» ។
សម្រាប់កីឡាករវ័យ២៦ឆ្នាំប៉េដ្រូហ្សា នេះគឺជាលើកទី៣៨ហើយក្នុងអាជីពជាអ្នកប្រណាំងដែលរូបគេឈ្នះការនាំមុខបណ្តោះអាសន្ន តែបើនិយាយតែក្នុងប្រភេទម៉ូតូ Grand Prix វិញ វាគឺជាជ័យជម្នះលើកទី២០ ៕
ចែករំលែកព័តមាននេះ