ជើងឯកប្រណាំងម៉ូតូ Grand Prixពិភពលោកសញ្ជាតិអូស្ត្រាលីខាស៊ី ស្តូន័របានធ្វើឱ្យបណ្តាអ្នកគាំទ្រភ្ញាក់ផ្អើលជាខ្លាំងខណៈកាលពីថ្ងៃទី១៧ឧសភាគេបានប្រកាសថា នឹងលាឈប់ពីការប្រណាំងនៅឆ្នាំដំណាច់នេះដោយមូលហេតុគ្រួសារ។ ស្ថិតនៅក្នុងវ័យ២៦ឆ្នាំ ស្តូន័របានយកឈ្នះជើងឯកការប្រណាំងចំនួន៣៥លើកក្នុងអាជីពហើយបច្ចុប្បន្នកំពុងនាំមុខនៅលើតារាងជើងឯកពិភពលោកបន្ទាប់ពីបានឈ្នះជើងឯក២លើកក្នុងឆ្នាំនេះ។ សេចក្តីប្រកាសរបស់គេបានកើតមានឡើងអំឡុងសន្និសីទសារព័ត៌មានមួយនៅមុនការប្រណាំង French Grand Prixនៅប្រទេស បារាំងថ្ងៃទី២០ ឧសភា ។
កីឡាករក្រុមហុងដារូបនេះបាននិយាយថា៖«បន្ទាប់ពីគិតអស់រយៈពេលយ៉ាងយូរ ព្រមទាំងពិភាក្សាជាច្រើនលើកជាមួយក្រុមគ្រួសាររួចមក ខ្ញុំបានសម្រេចចិត្តលាឈប់ការប្រណាំងនៅចុងរដូវកាលនេះតែម្តង។ ក្រោយពីទទួលបានជោគជ័យយ៉ាងត្រចះត្រចង់សមតាមបំណងខ្លួនឯង ខ្ញុំក៏លែងមានមហិច្ឆតាចង់បន្តការប្រណាំងទៀតទេ ហើយខ្ញុំគិតថា វាជារឿងល្អដែលត្រូវលា ឈប់»។
ស្តូន័រដែលជាជើងឯកពិភពលោកក្នុងឆ្នាំ២០០៧ផងនោះបានក្លាយទៅជាឪពុករបស់ក្មេងម្នាក់កាលពីខែកុម្ភៈដើមឆ្នាំនេះ ពោលគឺបន្ទាប់ពីភរិយារបស់គេនាង អាឌ្រីយ៉ាណាកើតបានកូនស្រីម្នាក់។ ក្នុងពេលជាមួយគ្នានោះគេបានទាត់ចោលការនិយាយដែលថា មានប្រពន្ធនឹងធ្វើឱ្យការប្រណាំងរបស់គេធ្លាក់ចុះ។
ស្តូន័របាននិយាយថា៖«គេនិយាយឱ្យខ្ញុំថា នៅពេលដែលខ្ញុំរៀបការ នោះការប្រណាំងរបស់ខ្ញុំនឹងធ្លាក់ចុះ។ ប៉ុន្តែនៅឆ្នាំដំបូងដែលខ្ញុំរៀបការនោះ ខ្ញុំបែរជាឈ្នះជើងឯកពិភពលោកទៅវិញ។ នៅពេលដែលខ្ញុំដឹងថា មានកូន ខ្ញុំក៏បានយកឈ្នះជើងឯកពិភពលោកម្តងទៀត។ ទស្សនៈខ្ញុំផ្ទាល់មិនគិតថា មានកូនឬប្រពន្ធធ្វើឱ្យការប្រណាំងធ្លាក់ចុះទេ»។ ស្តូន័របានចូលរួមប្រណាំងម៉ូតូ Grand Prix ក្នុងឆ្នាំ២០០៦ដោយពេលនោះគេបើកបរឱ្យក្រុមហុងដា ។ តែក្នុងឆ្នាំ២០០៧ គេបានផ្លាស់មកក្រុម Ducatiហើយបានយកឈ្នះជើងឯកពិភពលោកក្នុងឆ្នាំនោះ។ ក្រៅពីជើងឯកពិភពលោក គេនៅបានយកឈ្នះជើងឯកក្នុង៩កម្មវិធីប្រណាំងផ្សេងទៀត។ ឆ្នាំទៅមិញ គេបានផ្លាស់មកក្រុមហុងដាវិញ ហើយដណ្តើមបានជើងឯកពិភពលោកជាលើកទី២បូករួមនឹងជើងឯក៩កម្មវិធីផ្សេងទៀតផងដែរ។
ទាក់ទិននឹងការប្រកាសលាឈប់នេះ ក្រុមហុងដាបញ្ជាក់ថា៖«ស្តូន័រនិយាយថា ២០១២គឺជាឆ្នាំចុងក្រោយរបស់គេ។ សង្ឃឹមថានៅឆ្នាំនេះគេនឹងធ្វើបានលទ្ធផលល្អដូចជាលើកមុនៗ ទៀត »៕
ចែករំលែកព័តមាននេះ