ជំងឺកញ្ជ្រឹល គឺជាជំងឺមួយប្រភេទដែលឆ្លងតាមរយៈទឹកមាត់ ហើយជំងឺនេះតែងតែកើតចំពោះកុមារដែលមានអាយុចម្លោះពី៦ខែទៅ១០ឆ្នាំ ។ ជំងឺនេះក៏អាចកើតមាននៅលើមនុស្សពេញវ័យបានផងដែរ ប្រសិនបើលោកអ្នកមិនធ្លាប់កើតជំងឺកញ្ជ្រឹលនេះពីមុនមក ឬអ្នកដែលគ្មានប្រព័ន្ធការពារប្រឆាំងជាមួយនឹងមេរោគកញ្ជ្រឹល ។
លោកវេជ្ជបណ្ឌិត ហុង សុខឃាង ឯកទេសផ្នែកជំងឺកុមារនៃមន្ទីរពេទ្យកុមារជាតិបានប្រាប់កោះសន្តិភាពឱ្យដឹងថា ជំងឺកញ្ជ្រឹលគឺជាជំងឺមួយប្រភេទដែលឆ្លងតាមរយៈទឹកមាត់ ដោយការនិយាយទាក់ទងគ្នាពីកុមារម្នាក់ទៅកុមារម្នាក់ទៀត ឬក៏ឆ្លងតាមរយៈការប៉ះពាល់អ្នកជំងឺ ។ ជំងឺនេះបង្កឡើងដោយវីរុសម្យា៉ងដែលបង្កទៅជាគ្រុនក្តៅលើកុមារ ដែលមានសីតុណ្ហភាពពី៣៩ទៅ៤០អង្សាសេ ហើយការក្តៅខ្លួនខ្លាំងបែបនេះអាចបណ្តាលឱ្យកុមារប្រកាច់ ។
ជាមួយគ្នានេះវាក៏អាចមានរោគសញ្ញាលាយឡំផ្សេងទៀតដូចជា ក្អក កណ្តាស់ ហៀរសម្បោរ ភ្នែកឡើងក្រហម បន្ទប់មកមានអាការក្តៅខ្លួនខ្លាំង ហើយក៏លេចចេញស្នាមកន្តួលក្រហមនៅលើស្បែកដែលពីដំបូងមានលេចចេញនៅលើថ្ងាស និងផ្នែកខាងក្រោយត្រចៀក បន្ទាប់មកស្នាមកន្តួលក្រហមនេះវារាលដាលពេញខ្លួនរហូតទៅដល់ចុងដៃចុងជើង ស្នាមកន្តួលទាំងនេះក៏បានបាត់វិញនៅពេលជំងឺកញ្ជ្រឹលនេះមានសភាពធូរស្បើយ ។
លោកវេជ្ជបណ្ឌិត បានបន្ថែមទៀតថា ជាទូទៅជំងឺកញ្ជ្រឹលភាគច្រើនមិនបង្កឱ្យមានផលប៉ះពាល់ធ្ងន់ធ្ងរនោះទេ វាអាចជាសះស្បើយទៅវិញដោយគ្មានបន្សល់ផលវិបាកអ្វីទាំងអស់ ។ ប៉ុន្តែមានមួយចំនួនតូចអាចមានផលវិបាកធ្ងន់ធ្ងរដូចជា អាចកើតមានជំងឺរលាកសួត ដែលជួនកាលធ្វើឱ្យមានបញ្ហាធ្ងន់ធ្ងររហូតអាចប៉ះពាល់ដល់អាយុជីវិតបង្កឱ្យទៅជារលាកខួរក្បាល ដោយសារមេរោគកញ្ជ្រឹលនេះផងដែរ ប៉ុន្តែមានតិចតួចបំផុត ។ អត្រានៃការស្លាប់ដោយសារជំងឺរលាកខួរក្បាលដែលបង្កឡើងដោយមេរោគកញ្ជ្រឹលនេះអាចមានរហូតទៅដល់១០ភាគរយ ពេលខ្លះជំងឺនេះក៏អាចបន្សល់ទុកជាផលវិបាកដូចជា ពិការភ្នែក ថ្លង់ វៀចមាត់ជាដើម ។ ក្រៅពីនេះអាចមានរលាកក្រដាសត្រចៀក រលាកផ្លូវដង្ហើម ។
លោកវេជ្ជបណ្ឌិត បន្ថែមទៀតថា ចំពោះជំងឺកញ្ជ្រឹលនេះ ប្រសិនបើកើតក្នុងករណីធម្មតានោះការព្យាបាលអាចព្យាបាលនៅផ្ទះដោយខ្លួនឯងបានដោយគ្រាន់តែផ្តល់ថ្នាំបញ្ចុះកម្តៅដល់កូនរបស់លោកអ្នកនៅក្នុងកម្រិតត្រឹមត្រូវទៅតាមអាយុ និងទម្ងន់ ប៉ុន្តែក៏ត្រូវទទួលការណែនាំពីគ្រូពេទ្យផងដែរ ចៀសវាងការប្រើប្រាស់ថ្នាំដោយគ្មានការណែនាំពីគ្រូពេទ្យ។ ជាពិសេសសម្រាប់លោកអ្នកដែលជាឪពុកម្តាយគួរតែធ្វើការតាមដានរាល់សកម្មភាព កម្តៅកូនរបស់លោកឱ្យបានទៀតទាត់ ត្រូវឱ្យកុមារផឹកទឹកឱ្យបានច្រើនប្រសិនបើខ្វះជាតិទឹក ត្រូវផ្តល់វិតាមីន A ដើម្បីកាត់បន្ថយអាត្រានៃការស្លាប់ដោយសារជំងឺកញ្ជ្រឹលនេះ ។
ជាងនេះទៅទៀតប្រើសិនបើកូនរបស់លោកអ្នកមានអាការក្តៅខ្លួនខ្លាំង ឬក៏មានអាការលាប់កញ្ជ្រឹលឡើងវិញនោះ គួរតែប្រញាប់នាំកូនទៅជួបគ្រូពេទ្យជាបន្ទាន់ ដើម្បីចៀសវាងកើតមានបញ្ហាធ្ងន់ធ្ងរ ដែលអាចឈានទៅដល់ពិការឬក៏បាត់បង់អាយុជីវិត ។ ជាងនេះទៅទៀតនោះនៅពេលទារកកើតមកភ្លាមលោកអ្នកត្រូវនាំពួកគេទៅតែចាក់វ៉ាក់សាំងការពារជំងឺកញ្ជ្រឹលកុំបីខាន៕
ចែករំលែកព័តមាននេះ