កីឡាករដាណឺម៉ាក Lars Ytting Bakទទួលបានក្តីរីករាយជាលើកដំបូងក្នុងកម្មវិធី Tour of Italyឬ Giro d’Italiaក្រោយពីរូបគេយកឈ្នះដំណាក់ទី១២កាលពីថ្ងៃពុធទី១៧ខែសភា ។ ការប្រណាំងក្នុងដំណាក់នេះបានបញ្ចប់នៅទីក្រុង Sestri Levanteប្រទេសអ៊ីតាលី ។
Ytting Bakដែលជិះកង់ឱ្យក្រុម Lotto Belisol Teamបានយកឈ្នះដំណាក់មានចម្ងាយផ្លូវ១៥៧គីឡូម៉ែតចេញដំណើរពីទីក្រុង Seravezzaឆ្ពោះទៅកាន់ទីក្រុង Sestri Levanteប្រទេសអ៊ីតាលីដោយប្រើអស់ថិរវេលា៣ម៉ោង៥៨នាទីនិង៥៥វិនាទីយកឈ្នះកីឡាករបារាំង Sandy Casarជិះឱ្យក្រុម FDJ-Big Matនិងឈ្នះកីឡាករកូស្តារីកា Andrey Amador Bakkazakovaរបស់ក្រុម Movistar Teamដែលអ្នកទាំង២ប្រើថិរវេលាច្រើនជាងYtting Bak ១១វិនាទីស្មើៗគ្នា។
ថ្លែងបន្ទាប់ពីទទួលបានជ័យជម្នះ Ytting Bakបញ្ជាក់ថា៖«នេះជាជ័យជម្នះលើកទី១របស់ខ្ញុំ។ អាចយកឈ្នះមួយដំណាក់នៃ Tour of Italyគឺជារឿងដ៏ល្អបំផុតសម្រាប់រូបខ្ញុំ ។ ខ្ញុំសប្បាយចិត្តខ្លាំងណាស់ដែលបានយកឈ្នះនៅក្នុងដំណាក់នេះ»។ ទោះជាយ៉ាងណាក្តីជ័យជម្នះលើកនេះមិនទាន់អាចជួយឱ្យកីឡាករ Ytting Bakនាំមុខនៅលើតារាងថិរវេលាសរុបបានទេដ្បិតកីឡាករអេស្ប៉ាញ Joaquim Rodriguez ដែលបញ្ចប់ដំណាក់ក្នុងលំដាប់ទី២៩នោះសន្សំពេលវេលាបានយ៉ាងល្អបំផុតបន្តគ្រងអាវកាកា់ពណ៌លឿងក្នុងនាមជាអ្នកនាំមុខគេជាដដែល ។
ឆ្លងកាត់ការប្រណាំងអស់១២ដំណាក់មកនេះ Rodriguezប្រើថិរវេលាសរុបតិចជាងគេបំផុតគឺ៥១ម៉ោង១៩នាទីនិង៨វិនាទីនាំមុខកីឡាករកាណាដា Ryder Hesjedalដែលប្រើថិរវេលាច្រើនជាង១៧វិនាទី។ ឯកីឡាករបារាំង Sandy Casar ដែលជិះឱ្យក្រុម FDJ-Big Matស្ថិតនៅលំដាប់ទី៣បន្ទាប់ពីបានប្រើថិរវេលាច្រើនជាងRodriguez ២៦វិនាទី ។សម្រាប់កីឡាករវ័យ៣៣ឆ្នាំ Rodriguezនេះគឺជាលើកទី១ហើយដែលរូបគេនាំមុខនៅលើតារាងថិរវេលាសរុប៣ដំណាក់បន្តបន្ទាប់គ្នា ។
ការប្រណាំងកម្មវិធី Tour of Italyឬ Giro d’Italiaឆ្នាំនេះមាន២១ដំណាក់និងមានចម្ងាយផ្លូវសរុប៣៤៧៦គីឡូម៉ែត្រ។ ដោយឡែកដំណាក់ទី១៣ដែលជាដំណាក់បន្តមានចម្ងាយផ្លូវ១២១គីឡូម៉ែត្រដោយការប្រណាំងចាប់ចេញដំណើរពីទីក្រុង Savonaទៅកាន់ទីក្រុង Cervereប្រទេសអ៊ីតាលី ៕
ចែករំលែកព័តមាននេះ