កីឡាករប្រដាល់អាមេរិក Lamont Petersonបានទាត់ចោលការអំពាវនាវរបស់អាមៀ ខាន់ដែលថាសូមឱ្យរូបគេបោះបង់ខ្សែក្រវាត់ស្ថាប័ន WBAនិង IBFចោល។ ការអំពាវនាវបែបនេះរបស់អាមៀ ខាន់បានកើតមានឡើងបន្ទាប់ Petersonបរាជ័យនៅក្នុងការធ្វើពិសោធរកសារធាតុញៀនក្នុងពេលថ្មីៗនេះក្តី ។
Petersonនិងអាមៀ ខាន់គ្រោងនឹងជួបប្រកួតគ្នាជាលើកទី២នៅថ្ងៃទី១៩ឧសភា ប៉ុន្តែត្រូវបានលុបចោលទៅវិញក្រោយពីPetersonបរាជ័យក្នុងពេលធ្វើពិសោធរកសារធាតុញៀនមុនការប្រកួត។ Petersonអះអាងថា គេប្រើសារធាតុ Testosteroneក្នុងមូលហេតុវេជ្ជសាស្ត្រ ហើយគេសង្ឃឹមថា សវនាការមួយនឹងផ្តល់ជាភស្តុតាងថា រូបគេគ្មានបំណងលួចបន្លំទេ។
ថ្លែងប្រាប់វិទ្យុ BBC កីឡាករ ស្បែកខ្មៅរូបនេះបញ្ជាក់ថា ៖«សូមទុកឱ្យគណៈកម្មការជាអ្នកសម្រេច។ ដរាបណានៅមិនទាន់មានការសម្រេចអ្វីមួយពីគណៈកម្មការនោះទេ ខ្ញុំនៅតែជាជើងឯក»។ គណៈកម្មការកីឡារដ្ឋនេវ៉ាដាគ្រោងនឹងបើកកិច្ចប្រជុំមួយដើម្បីពិភាក្សាលើករណីកីឡាករ Petersonនៅថ្ងៃទី១៣ខែមិថុនា ។
កីឡាករស្បែកខ្មៅ Peterson អះអាងទៀតថា ខ្លួនប្រើប្រាស់ថ្នាំនោះទៅតាមវេជ្ជបញ្ជារបស់វេជ្ជបណ្ឌិត ហើយពិតជាមិនបានដឹងថា ការព្យាបាលដោយប្រើថ្នាំនេះធ្វើឱ្យគេធ្លាក់ពេលធ្វើពិសោធប្រកួតទេ។ គេបន្តថា៖«ប្រសិនជារបៀបដែលខ្ញុំធ្វើគឺជាអ្វីដែលធ្វើឱ្យមានបញ្ហាដល់ទឹកនោម តើខ្ញុំអាចនិយាយអ្វីបានទៀត ខ្ញុំបានធ្វើឱ្យមានកំហុសមួយ។ អ្វីដែលខ្ញុំអាចនិយាយបាននៅពេលនេះគឺ ការសូមទោសចំពោះបណ្តាអ្នកគាំទ្រ។ តែខ្ញុំយល់ថា មិនត្រូវនោះទេដែលមនុស្សមួយចំនួននិយាយថា ខ្ញុំបានព្យាយាមលួចបន្លំនោះ»។
គេបានបន្ថែមថា៖«ខ្ញុំមិនដែលមានគំនិតចង់លួចបន្លំឡើយ។ ខ្ញុំមិនពេញចិត្តទាល់តែសោះនៅពេលដឹងថាកីឡាករណាម្នាក់លួចបន្លំ តែយ៉ាងណា នេះគ្រាន់តែពាក្យសម្តីតែម្ខាងរបស់ខ្ញុំប៉ុណ្ណោះ»។Petersonធ្លាប់ប្រកួតបានចំនួន ៣២លើក ក្នុងនោះឈ្នះ៣០លើក ចាញ់១ ស្មើ១ ធ្លាប់ផ្តួលដៃគូឱ្យសន្លប់បានចំនួន១៥លើក ៕
ចែករំលែកព័តមាននេះ