ប្រភពពី AFP បានផ្សាយឱ្យដឹងថា រិចឆ័រមុន (Richemont) ម្ចាស់ស្លាកយីហោមុខទំនិញល្អរបស់ស្វ៊ីសបានបង្ហើបពីប្រាក់ចំណេញប្រចាំឆ្នាំថាបានកើនឡើងខ្ពស់ ខណៈពេលបរិមាណនៃតម្រូវការទំនិញប្រភេទនាឡិកា និងគ្រឿងពេជ្រ នៅក្នុងភូមិភាគអាសីុគ្មានការធ្លាក់ចុះ ។
Richemont ផ្សាយឱ្យដឹងថា ប្រាក់ចំណេញក្នុងឆ្នាំសារពើពន្ធបញ្ចប់កាលពីថ្ងៃទី៣១ មីនា កន្លងមក បានកើនឡើង៤៣% មានតម្លៃប្រហែល១.៥០០លានអឺរ៉ូ ។ ចំណែកប្រាក់ចំណេញពីដំណើរការជំនួញកើនខ្ពស់៥១% ឬប្រហែល២.០០០លានអឺរ៉ូ ខណៈពេលចំនួនការលក់ឡើងខ្ពស់២៩% ឬមានតម្លៃប្រហែល៨.៩០០លានអឺរ៉ូ ។
ក្រុមហ៊ុនខាងលើ បានបញ្ជាក់ឱ្យដឹងថា អាសីុប៉ាសីុហ្វិក គឺជាភូមិភាគដែលមានសក្តានុពលខ្ពស់ក្រោយពីមានការរីកចម្រើនដ៏រឹងមាំអស់រយៈពេលជាច្រើនឆ្នាំកន្លងមក និងបច្ចុប្បន្នក្លាយជាតំបន់លក់ទំនិញប្រហែល៤២% ។
លោកយ៉ូហាន រូភើត ប្រធានក្រុមហ៊ុនថ្លែងថា «យើងត្រេកអរនឹងបញ្ជាក់ថា Richemont ទទួលជោគជ័យលើការរីកលូតលាស់ផ្នែកលក់ »។ ប្រធានក្រុមហ៊ុនបានបញ្ជាក់បន្តទៀតថា បច្ចុប្បន្នមានការទទួលស្គាល់ពីស្ថានភាពសេដ្ឋកិច្ចមិនប្រាកដប្រជានៅតំបន់អឺរ៉ុប ។ សម្រាប់និន្នាការទៅថ្ងៃអនាគតរបស់ក្រុមហ៊ុន គឺការបើកហាងថ្មីនិងសង្កត់ធ្ងន់លើទីផ្សារដែលមានការរីកចម្រើនស្ថិតនៅទីតាំងតំបន់ទេសចរណ៍សំខាន់ៗ ៕
ចែករំលែកព័តមាននេះ