កងទ័ពស៊ីរីកាលពីថ្ងៃទី១៦ឧសភាបានធ្វើប្រតិបត្តិការក្នុងតំបន់ជាច្រើនរបស់ប្រទេស ពិសេសក្នុងខេត្តដឺរ៉ាអា និងខេត្តអ៊ីលីប ព្រមទាំងនៅទីក្រុងហូម ។ប្រធានាធិបតីស៊ីរីលោកបាចាអាល់អាសាដ អះអាងក្នុងបទសម្ភាសន៍មួយជាមួយទូរទស្សន៍រុស្ស៊ីថាការបោះឆ្នោតសភាកាលពីថ្ងៃទី៧ឧសភាដោយពួកប្រឆាំងធ្វើពហិការមានអ្នកចូលរួមបោះឆ្នោតដល់ទៅ៥១,២៦%បង្ហាញថា ពលរដ្ឋស៊ីរីគាំទ្ររបបរបស់លោកប្រឈមមុខនឹងពួកប្រឆាំងព្រមទាំងពួកភេរវករ ។
យោងតាមតួលេខរបស់អង្គការសិទ្ធិមនុស្សស៊ីរីOSDH លំអៀងទៅពួកប្រឆាំងថាការបង្ក្រាបនិងការប្រយុទ្ធគ្នាកាលពីថ្ងៃទី១៦ឧសភា បណ្តាលឱ្យស្លាប់មនុស្ស២៧នាក់ទៀតទោះបីជាមានវត្តមានរបស់អ្នកសង្កេតការណ៍អ.ស.ប ទទួលបន្ទុកត្រួតពិនិត្យបទឈប់បាញ់គ្នាពេលនេះឡើងដល់ជាង២០០នាក់រួចហើយក្តី ។
លោកអាសាដបានចោទប្រកាន់ពួកប្រឆាំងថា ទទួលអាវុធនិងទឹកប្រាក់ពីប្រទេសក្រៅ ផ្សេងៗ ។ លោកបរិហារថា បណ្តាប្រទេសលោកខាងលិចនិយាយតែពីអំពើហិង្សារបស់រដ្ឋាភិបាលតែពុំដែលនិយាយមួយមាត់ឡើយពីពួកភេរវករ ។ លោករិះគន់ជាពិសេសដល់ប្រទេសបារាំងដោយលោកសំដែងក្តីសង្ឃឹមថាបារាំងនឹងធ្វើការត្រិះរិះពិចារណាជាថ្មីជាមួយនឹងប្រធានាធិបតីថ្មី។
លោកអាល់អាសាដបន្តថា លោកកូហ្វីអាណាន់ នឹងមកកាន់ស៊ីរីក្នុងខែនេះហើយខ្ញុំនឹងស្នើឱ្យលោកធ្វើការពន្យល់នានា ៕
ចែករំលែកព័តមាននេះ