សារព័ត៌មានបរទេស កាលពីថ្ងៃទី១៦ ឧសភា ផ្សាយឱ្យដឹងថា ធនាគារកណ្តាលនៃចក្រភពអង់គ្លេស«Bank of England» ត្រៀមប្រកាសកែសម្រួលកាត់បន្ថយទិសដៅការរីកចម្រើនផ្នែកសេដ្ឋកិច្ចរបស់អង់គ្លេស ដោយរំពឹងថា ការរីកចម្រើនផ្នែកសេដ្ឋកិច្ចក្នុងឆ្នាំនេះ អាចស្ថិតនៅ០,៧៥% ។
របាយការណ៍បញ្ជាក់ថា លោកសឺម័រវីន ឃីង ទេសាភិបាលធនាគារកណ្តាល របស់អង់គ្លេសត្រៀមប្រកាសកាត់បន្ថយទិសដៅអត្រាការរីកលូតលាស់ផ្នែកសេដ្ឋកិច្ចរបស់ប្រទេសក្នុងឆ្នាំនេះ នៅសល់ប្រហែល០,៧៥% ពីទិសដៅចាស់មានប្រហែល១,២% ដែលធ្លាប់បានព្យាករទុកកាលពី៣ខែមុន ។
បណ្តាអ្នកវិភាគគូសបញ្ជាក់ថា មូលហេតុសំខាន់ដែលធ្វើឱ្យធនាគាររបស់អង់គ្លេសត្រូវបន្ថយទិសដៅការរីកលូតលាស់ផ្នែកសេដ្ឋកិច្ច ព្រោះអត្រាអតិផរណាសាច់ប្រាក់នៅក្នុងប្រទេសនៅមិនទាន់ធ្លាក់ចុះ តាមរយៈការព្យាករទុក ដោយសង្កេតឃើញតាមរយៈតួលេខការចំណាយរបស់អ្នកបរិភោគ ឬអ្នកប្រើប្រាស់នៅក្នុងខែមីនា កន្លងមក កើនខ្ពស់ប្រហែល៣,៥% ផ្ទុយពីការរំពឹងទុកពីមុន ដែលបញ្ជាក់ថា ការចំណាយសម្រាប់អ្នកបរិភោគ នឹងធ្លាក់ចុះនៅសល់ប្រហែល២% ខណៈពេលស្ថានភាពសេដ្ឋកិច្ចបច្ចុប្បន្នមិនទាន់មានលក្ខណៈល្អប្រសើរ ៕
ចែករំលែកព័តមាននេះ