កីឡាករលំដាប់ទី២ពិភពលោកសញ្ជាតិស្វ៊ីសរ៉ូជើ ហ្វេដឺរ័រកាលពីថ្ងៃពុធទី១៦ឧសភាបានយកឈ្នះកីឡាករអាហ្សង់ទីន Carlos Berlocqក្នុងលទ្ធផល២សិតទល់នឹងសូន្យ ៦-៣និង៦-៤ឆ្លងផុតជុំទី២កម្មវិធី Internazionali BNL d’Italiaដោយក្តីរីករាយ។ ការប្រកួតក្នុងជុំទី២នេះរៀបចំធ្វើនៅទីក្រុងរ៉ូម ប្រទេសអ៊ីតាលី ។
ហ្វេដឺរ័រដែលបានឈានចូលដល់វគ្គផ្តាច់ព្រ័ត្រនៅទីនេះក្នុងឆ្នាំ២០០៣និង២០០៦នោះបានយកឈ្នះការប្រកួតលើកនេះយ៉ាងងាយស្រួល។ ក្នុងពេលប្រកួតគេមិនបានផ្តល់ឱកាសឱ្យកីឡាករ Berlocqវាយបកបានទេ។ ពេលនេះ ហ្វេដឺរ័រ កំពុងតែព្យាយាមដណ្តើមយកពានជើងឯកនៅទីនេះជាលើកទី១ឱ្យខាងតែបាន។
ថ្លែងបន្ទាប់ពីទទួលបានជ័យជម្នះ គេបានបញ្ជាក់ថា ៖«ខ្ញុំសប្បាយចិត្តខ្លាំងណាស់ដែលបានឆ្លងផុតជុំនេះ។ ខ្ញុំបានឆ្លងផុតជុំទី១ដោយមិនបាច់ប្រកួត។ នោះជាសំណាងមួយ។ យើងនៅមានកម្មវិធីប្រកួតជាច្រើនទៀត។ ដូច្នេះនេះគឺជាការចាប់ផ្តើមនៃជ័យជម្នះក្នុងកម្មវិធីលើកក្រោយ»។
នៅជុំបន្ទាប់ហ្វេដឺរ័រនឹងជួបប្រកួតជាកីឡាករអេស្ប៉ាញ Juan Carlos Ferreroដែលជាជើងឯកកម្មវិធីនេះកាលពី១១ឆ្នាំមុន។
Stanislas Wawrinkaកីឡាករមិត្តរួមជាតិរបស់ហ្វេដឺរ័រក៏បានឡើងទៅជុំទី៣ផងដែរបន្ទាប់ពីគេយកឈ្នះកីឡាករស៊ែប៊ី Janko Tipsarevicក្នុងលទ្ធផល៦-៣និង៦-១ ខណៈកីឡាករអុីតាលី Andreas Seppiបានធ្វើឱ្យអ្នកគាំទ្រមិត្តរួមជាតិខ្លួនហ៊ោកញ្ជ្រៀវក្រោយពីខ្លួនបានបំបាក់កីឡាករអាមេរិក John Isnerក្នុងលទ្ធផល២-៦,៧-៦និង៧-៥ ។
Tomas Berdychដែលជាដៃគូប្រកួតដ៏ស្វិតស្វាញរបស់ហ្វេដឺរ័រនៅក្នុងវគ្គផ្តាច់ព្រ័ត្រ Madrid Openក៏បានឡើងទៅជុំបន្តផងដែរបន្ទាប់ពីរូបគេបានយកឈ្នះកីឡាករប៉ូឡូញ Lukas Kubot ក្នុងលទ្ធផល៦-៤និង៦-១ ។
នៅពេលមុននេះ កីឡាករលំដាប់ទី១ពិភពលោក ណូវ៉ាក់ យ៉ូកូវិចក៏បានឡើងទៅជុំទី៣ផងដែរក្រោយពីរូបគេបានយកឈ្នះកីឡាករអូស្ត្រាលី Bernard Tomicក្នុងលទ្ធផល៦-៣និង៦-៣។
ឯលទ្ធផលនៃការប្រកួតគូផ្សេងទៀតមានដូចជា កីឡាករអេស្ប៉ាញ David Ferrerយកឈ្នះកីឡាករមិត្តរួមជាតិខ្លួន Fernando Verdasco ក្នុងលទ្ធផល ៦-៣និង៧-៦ ខណៈកីឡាករបារាំងJo-Wilfried Tsongaយកឈ្នះកីឡាករ Viktor Troickiក្នុងលទ្ធផល ៦-៣និង៦-២។ កីឡាករអាហ្សង់ទីន Juan Monacoយកឈ្នះកីឡាករឆែក Radek Stepanក្នុងលទ្ធផល ៦-៤និង៦-២ ខណៈកីឡាករអេស្ប៉ាញ Marcel Granollersយកឈ្នះកីឡាករម្ចាស់ផ្ទះFabio Fogniniក្នុងលទ្ធផល ៦-៣និង៦-៤។
ចំណែកលទ្ធផលនៃការប្រកួតផ្នែកនារីវិញ កីឡាការិនីការពារជើងឯកម៉ារីយ៉ា សារ៉ាប៉ូវ៉ាបានប្រើពេលអស់ជិត២ម៉ោង១៥នាទីទើបអាចយកឈ្នះកីឡាការិនីអាមេរិក Christina McHaleក្នុងលទ្ធផល៧-៥និង៧-៥។ សម្របពេលជាមួយគ្នានោះដែរ កីឡាការិនីឆែកប៉េត្រា គ្វីតូវ៉ាបានយកឈ្នះបានយកឈ្នះកីឡាការិនីរុស្ស៊ី Anastasia Pavlyuchenkovaក្នុងលទ្ធផល៧-៥និង៦-៤។
កីឡាការិនីប៉ូឡូញ Agnieszka Radwanska ត្រូវបានបំបាក់ដោយកីឡាការិនីឆែក Petra Cetkovskaក្នុងលទ្ធផល ៦-៤,៤-៦និង៦-១។ ឯនាងការ៉ូលីន វ៉ូនីអាកគីក៏មានវាស នាដូចជានាងRadwanskaដែរ ខណៈបរាជ័យក្រោមថ្វីដៃកីឡាការិនីអេស្ប៉ាញ Anabel Medina Garriguesក្នុងលទ្ធផល៦-៤និង៤-០ ។
កីឡាការិនីអាមេរិកស៊េរីណា វីលៀមដែលទើបតែបានឈ្នះពានជើងឯក Madrid Openសប្តាហ៍កន្លងទៅក៏បានចូលរួមក្តីរីករាយនឹងជ័យជម្នះរបស់ខ្លួនផងដែរ។ នាងបានយកឈ្នះកីឡាការិនីរុស្ស៊ី Nadia Petrovaក្នុងលទ្ធផល៤-៦,៦-២និង៦-៣ស្របពេលដែលកីឡាការិនីអូស្ត្រាលីសាម៉ាន់ថា ស្តូសួបំបាក់កីឡាការិនីអុីតាលី Sara Erraniក្នុងលទ្ធផល ៦-៣និង៧-៥ ៕
ចែករំលែកព័តមាននេះ