កីឡាករស្លូវ៉ាគី Peter Saganបានធ្វើឱ្យអ្នកគាំទ្ររំភើបជាខ្លាំងបន្ទាប់ពីរូបគេយកឈ្នះការប្រណាំងកម្មវិធី Tour of California ៣ដំណាក់ជាប់ៗគ្នា។ ការប្រណាំងក្នុងដំណាក់ទី៣នេះបានបញ្ចប់នៅទីក្រុង Livermoreសហរដ្ឋអាមេរិកកាលពីថ្ងៃទី១៥ឧសភា។
Saganដែលជាអ្នកជិះកង់ឱ្យក្រុមLiquigas-Cannondaleបានយកឈ្នះដំណាក់ដែលមានចម្ងាយផ្លូវ១៨៥,៥គីឡូម៉ែត្រដោយការប្រណាំងចេញដំណើរពីទីក្រុង San Joseឆ្ពោះទៅកាន់ទីក្រុង Livermoreសហរដ្ឋអាមេរិក។ Saganបានបញ្ចប់ដំណាក់នេះដោយប្រើអស់ថិរវេលា៤ម៉ោង៥០នាទីនិង៤៩វិនាទីយកឈ្នះកីឡាករអូស្ត្រាលី Heinrich Hausslerជិះឱ្យក្រុមGarmin-Barracudaនិងឈ្នះកីឡាករបែលហ្ស៊ិក Tom Boonenរបស់ក្រុម Omega Pharma-Quickstepដែលទាំង២នាក់បានប្រើថិរវេលាច្រើនជាងកីឡាករ Saganស្មើៗគ្នា ។
ថ្លែងបន្ទាប់ពីទទួលបានជ័យជម្នះកីឡាករវ័យ២២ឆ្នាំ Saganបញ្ជាក់ថា៖«ជ័យជម្នះលើកនេះពិតជាធ្វើឱ្យខ្ញុំរំភើបខ្លាំងណាស់។ ខ្ញុំសប្បាយចិត្តរកអ្វីផ្ទឹមដែលបានឈ្នះការប្រណាំងក្នុងដំណាក់នេះ។ សូមថ្លែងអំណរគុណដល់មិត្តរួមក្រុមទាំងឡាយដែលបានជួយជ្រោមជ្រែងដល់ខ្ញុំ។ ទោះជាយ៉ាងណាក្តីការប្រណាំងនេះពិតជាពិបាកខ្លាំងដ្បិតវាមានការជិះឡើងភ្នំក្នុងចម្ងាយផ្លូវ វែង»។ ជ័យជម្នះក្នុងដំណាក់នេះពិតជាមានន័យខ្លាំងណាស់ដ្បិតវាបានជួយឱ្យរូបគេនាំមុខនៅលើតារាងថិរវេលាសរុបទៀតផង។
បន្ទាប់ពីបញ្ចប់៣ដំណាក់មកនេះ Saganប្រើអស់ថិរវេលាតិចជាងគេគឺ១៤ម៉ោង ៣៤នាទីនិង៥៤វិនាទីស្ថិតនៅលំដាប់លើគេនិងគ្រងអាវកាក់ពណ៌លឿង។ ស្ថិតនៅលំដាប់ទី២គឺកីឡាករអូស្ត្រាលី Heinrich Hausslerដែលបានប្រើថិរវលាច្រើនជាង១២វិនាទី។ ចំណែកកីឡាករអាមេរិក Jeffry Louderស្ថិតនៅលំដាប់ទី៣បន្ទាប់ពីប្រើពេលច្រេើនជាង Sagan ២៤វិនាទី។ ការប្រណាំងកង់កម្មវិធី Tour of Californiaឆ្នាំនេះមាន៨ដំណាក់និងមានចម្ងាយផ្លូវសរុប១១៨៤,១គីឡូម៉ែត្រ។
ដោយឡែកដំណាក់ទី៤ដែលជាដំណាក់បន្តមានចម្ងាយផ្លូវ២០៩,៦គីឡូម៉ែត្រដោយការប្រណាំងចាប់ចេញដំណើរពីទីក្រុង Sonoraទៅកាន់ទីក្រុង Clovisរដ្ឋកាលីហ្វ័រនីញ៉ាសហរដ្ឋអាមេរិក ៕
ចែករំលែកព័តមាននេះ