កីឡាករលំដាប់ទី៤ពិភពលោកសញ្ជាតិអង់គ្លេសអ៊ែនឌី មូរ៉េកាលពីថ្ងៃទី១៥ឧសភាបានយកឈ្នះកីឡាករអាហ្សង់ទីន David Nalbandianក្នុងលទ្ធផលពិន្ទុ ៦-១,៤-៦និង៧-៥ឆ្លងផុតជុំទី២កម្មវិធី Internazionali BNL d’Italiaដោយក្តីរីករាយ។ ជ័យជម្នះនៅទីក្រុងរ៉ូមនេះគឺជាកាដូខួបកំណើត២៥ឆ្នាំរបស់គេផងដែរ ។
មូរ៉េដែលកាលពីឆ្នាំទៅមិញបានឆ្លងចូលដល់ត្រឹមតែវគ្គពាក់កណ្តាលផ្តាច់ព្រ័ត្រនោះបានយកឈ្នះការប្រកួតលើកនេះយ៉ាងត្រដាបត្រដួសជាពិសេសក្នុងសិតទី២ដែលគេបានចាញ់ពិន្ទុ Nalbandian ទាំងស្រុង។ មូរ៉េបានប្រើពេលអស់២ម៉ោងនិង៣៧នាទីទើបអាចបញ្ចប់ការប្រកួតបាន។ សម្រាប់ពួកគេទាំងពីរនាក់ វាជាការជួបគ្នាលើកដំបូងហើយនៅលើតារាងប្រកួតដីឥដ្ឋ។
ថ្លែងបន្ទាប់ពីឈ្នះការប្រកួត មូរ៉េបញ្ជាក់ថា៖«ខ្ញុំសប្បាយចិត្តខ្លាំងណាស់ដែលបានឈ្នះការប្រកួតលើកនេះ។ ជ័យជម្នះលើកនេះបានឆ្លុះបញ្ចាំងពីការប្រកួតរបស់ខ្ញុំពីរបីសប្តាហ៍កន្លងទៅនេះ។ វាពិតជាមិនមានអារម្មណ៍ល្អ នៅពេលដែលយើងមិនអាចវាយកូនបាល់បានច្រើននោះ។ សង្ឃឹមថា ការប្រកួតរបស់ខ្ញុំនឹងចាប់ផ្តើមល្អឡើងវិញចាប់ពីថ្ងៃនេះតទៅ »។
ឯកីឡាករ Nalbandian ការបរាជ័យលើកនេះបានធ្វើឱ្យគេអស់សង្ឃឹមជាខ្លាំង។ កាលពីឆ្នាំ២០០៤ គេធ្លាប់បានឈានចូលដល់វគ្គផ្តាច់ព្រ័ត្រនៅទីនេះ។ កីឡាករលំដាប់ទី១ពិភពលោក ណូវ៉ាក់ យ៉ូកូវិចក៏បានឡើងទៅជុំទី៣ក្នុងថ្ងៃជាមួយគ្នានោះដែរក្រោយពីរូបគេបានយកឈ្នះកីឡាករអូស្ត្រាលីBernard Tomicក្នុងលទ្ធផល៦-៣និង៦-៣។
ឯលទ្ធផលនៃការប្រកួតគូផ្សេងទៀតមានដូចជា កីឡាករអេស្ប៉ាញ David Ferrerយកឈ្នះកីឡាករមិត្តរួមជាតិខ្លួន Fernando Verdasco ក្នុងលទ្ធផល ៦-៣និង៧-៦ ខណៈកីឡាករបារាំងJo-Wilfried Tsongaយកឈ្នះកីឡាករ Viktor Troickiក្នុងលទ្ធផល ៦-៣និង៦-២។
ចំណែកលទ្ធផលនៃការប្រកួតផ្នែកនារីវិញ កីឡាការិនីការពារជើងឯកម៉ារីយ៉ា សារ៉ាប៉ូវ៉ាបានប្រើពេលអស់ជិត២ម៉ោង១៥នាទីទើបអាចយកឈ្នះកីឡាការិនីអាមេរិក Christina McHaleក្នុងលទ្ធផល៧-៥និង៧-៥។ សម្របពេលជាមួយគ្នានោះដែរ កីឡាការិនីឆែកប៉េត្រា គ្វីតូវ៉ាបានយកឈ្នះកីឡាការិនីរុស្ស៊ី Anastasia Pavlyuchenkovaក្នុងលទ្ធផល៧-៥និង៦-៤។ ថ្លែងប្រាប់ទីភ្នាក់ងារព័ត៌មាន AFP គ្វីតូវ៉ាបញ្ជាក់ថា៖«ខ្ញុំទទួលស្គាល់ថា នៅមុនការប្រកួតខ្ញុំភ័យបុកពោះបន្តិចដែរដ្បិតអីខ្ញុំធ្លាប់បរាជ័យក្រោមថ្វីដៃនាងកាលពីការជួបគ្នាចុងក្រោយរបស់ពួកយើង។ ខ្ញុំមានអារម្មណ៍មិនល្អសោះ តែពេលនេះ ខ្ញុំសប្បាយចិត្តដែលបានឈ្នះការប្រកួតនេះ។
ខ្ញុំនៅត្រូវការពេលច្រើនទៀតដើម្បីរៀនសូត្រពីបច្ចេកទេសប្រកួតនៅលើតារាងដីឥដ្ឋ។ យើងមិនអាចឈរនៅចម្ងាយ២ម៉ែត្រពីគំនូសខ្សែវាយសឺវីសទេ»៕
ចែករំលែកព័តមាននេះ