អ្នកនាំពាក្យរបស់លោកកូហ្វីអាណាន់ បេសកជនពិសេសរបស់អ.ស.ប និងរបស់សម្ព័ន្ធអារ៉ាប់សម្រាប់ស៊ីរីថ្លែងកាលពីថ្ងៃទី១៥ ឧសភា ថា ពុំមានអ្នកសង្កេតការណ៍អ.ស.បណាម្នាក់ត្រូវរបួសឡើយ ក្នុងការផ្ទុះគ្រាប់បែកមួយសំដៅលើក្បួនរថយន្តអ.ស.ប ក្នុងតំបន់ខាន់សៃខូន ស្ថិតនៅចន្លោះក្រុងហាម៉ានិងក្រុងអុីដលីបភាគខាងជើងស៊ីរី ។
ក្នុងសេចក្តីថ្លែងការណ៍មួយលោកអាម៉ាដ ហ្វាវា៉ហ្ស៊ី និយាយថា ការវាយប្រហារដោយគ្រឿងផ្ទុះសំដៅលើក្បួនរថយន្ត៤គ្រឿងរបស់អ.ស.ប ដោយបញ្ជាក់ថា រថយន្ត៣គ្រឿងរបស់អ.ស.បរងការខូចខាត ក៏ប៉ុន្តែពុំមានបុគ្គលិកអ.ស.បណាម្នាក់ត្រូវរបួសឡើយ។
មុននេះម៉ាស៊ីនឃោសនាផ្លូវការស៊ីរីរាយការណ៍ថា គ្រឿងផ្ទុះបានវាយប្រហារលើក្បួនរថយន្តរបស់អ.ស.ប បណ្តាលឱ្យអ្នកសង្កេតការណ៍២នាក់ ត្រូវរបួសហើយរថយន្ត២គ្រឿងរងការខូចខាត។ កងទ័ពស៊ីរីបានធ្វើអន្តរាគមន៍ហើយបានប៉ះទង្គិចគ្នាជាមួយបណ្តាក្រុមប្រដាប់អាវុធហើយអាចជួយពួកអ្នកសង្កេតការណ៍ទៅកាន់តំបន់មានសន្តិសុខមួយ ។
ការវាយប្រហារនេះជា ការវាយប្រហារលើកទី៤ហើយសំដៅលើពួកអ្នកសង្កេតការណ៍អ.ស.ប ចាប់តាំងពីពួកគេមកដល់ពីខែមេសាមក ។ មុននេះប្រមុខបេសកកម្មអ្នកសង្កេតការណ៍អ.ស.ប នៅស៊ីរីថ្លែងថា ចំនួនអ្នកសង្កេតការណ៍យោធាអ.ស.ប មកដល់ថ្ងៃនេះឡើងដល់២០០នាក់ហើយ ៕
ចែករំលែកព័តមាននេះ