កីឡាករលីយ៉ូណេល ម៉េសស៊ី ខ្សែប្រយុទ្ធជនជាតិអាហ្សង់ទីន របស់ក្លឹបBarcelona ក្លាយជាម្ចាស់រង្វាន់ស្បែកជើងមាស ពីសមិទ្ធផលដ៏លេចធ្លោស៊ុតបញ្ចូលទីចំនួន៥០គ្រាប់ក្នុងក្របខណ្ឌបាល់ទាត់La Liga អេស្ប៉ាញ ក្នុងរដូវកាល២០១១-២០១២ នាំមុខកីឡាករគ្រីស្ទៀណូ រ៉ូណាល់ដូ ខ្សែបម្រើជនជាតិព័រទុយហ្គាល់ ប្រចាំក្លឹបReal Mardrid ។
ទោះបីជាការប្រកួតលើកចុងក្រោយនៃរដូវកាលកីឡាករម៉េសស៊ី មិនអាចរកគ្រាប់បាល់ក្នុងការស៊ុតបញ្ជូលទីឱ្យក្លឹបBetis កាលពីថ្ងៃទី១៣ ឧសភា ក៏ដោយ ប៉ុន្តែខ្សែប្រយុទ្ធម្ចាស់បាល់មាស ឬ«Ballon d’or» ចំនួន៣ជំនាន់ ស្ថិតក្នុងតំណែងលេខ១ស៊ុតបញ្ជូលទីបាន៥០គ្រាប់នៅពេលចប់រដូវកាលនេះ ខណៈពេលកីឡាកររ៉ូណាល់ដូ ស៊ុតបញ្ចូលទីបាន១គ្រាប់ ក្នុងការប្រកួតលើកចុងក្រោយជួបជាមួយក្លឹបMalaga តាមពីក្រោយដោយមានគ្រាប់បាល់សរុបចំនួន៤៦គ្រាប់ ស្ថិតក្នុងលំដាប់ទី២ ។
សម្រាប់តំណែងខ្សែប្រយុទ្ធលំដាប់ទី៣ នៅតំបន់អឺរ៉ុបបានទៅលើកីឡាកររ៉ូប៊ីនវ៉ាវ ពើស៊ី ខ្សែប្រយុទ្ធក្រុមជម្រើសជាតិហូឡង់របស់ក្លឹប Arsenal ស៊ុតបញ្ចូលទីបាន៣០គ្រាប់ ចំណែកលំដាប់ទី៤ បានទៅលើកីឡាករក្លាស យេន អ៊ុនតេឡារបស់ក្លឹបSchalke មានចំនួន២៩គ្រាប់និងកីឡាករស្លាតាន អីុប្រាហ៊ីម៉ូវិច ស្ថិតក្នុងលំដាប់ទី៥ ស៊ុតបញ្ចូនទីឱ្យក្លឹបAC Milan បាន២៨គ្រាប់ ៕
ចែករំលែកព័តមាននេះ