លោក Frank Warrenអ្នករៀបចំការប្រកួតរបស់កីឡាករឌីរ៉េក ស៊ីសូរ៉ានិយាយថា មានសំបុត្រទស្សនាការប្រកួតរវាងកីឡាកររបស់ខ្លួននិងដេវីដ ហេប្រមាណជាង២ម៉ឺនច្បាប់ត្រូវបានលក់ដាច់អស់។ ថ្លែងប្រាប់វិទ្យុ BBC លោកWarrenបានបញ្ជាក់ថា ៖«យើងបានលក់ដាច់អស់សំបុត្រជាង២ម៉ឺនច្បាប់។ ទីកន្លែងប្រកួតរបស់យើងអាចដាក់អ្នកទស្សនាបានចំនួន៤ម៉ឺននាក់។ ខ្ញុំជឿថា ការចាប់អារម្មណ៍នេះកើតមានក្រោយពីពួកគេមានជម្លោះនឹងគ្នាក្នុងពេលកន្លងមក»។
កីឡាករប្រដាល់ទម្ងន់ធ្ងន់របស់ប្រទេសអង់គ្លេស២រូបគឺដេវីដ ហេនិងឌីរ៉េក ស៊ីសូរ៉ានឹងឡើងសាកកណ្តាប់ដៃគ្នានៅលើសង្វៀនក្លឹបបាល់ទាត់ West Ham ស្ថិតនៅក្នុងទីក្រុងឡុងប្រទេសអង់គ្លេសក្រោមអាជ្ញាប័ណ្ណសហព័ន្ធកីឡាប្រដាល់របស់ប្រទេសលុចហ្សំបួរ ។
នេះអាចចាត់ទុកថា ជាលើកដំបូងដែលកីឡាករអង់គ្លេសប្រកួតនៅលើទឹកដីខ្លួនក្រោមអាជ្ញាប័ណ្ណប្រទេសដទៃ។ នេះក៏ព្រោះតែពួកគេទាំង២នាក់ត្រូវបានក្រុមប្រឹក្សាកីឡាប្រដាល់អង់គ្លេសដកហូតអាជ្ញាប័ណ្ណបន្ទាប់ពីវាយតប់គ្នានៅក្រៅសង្វៀននៅអាល្លឺម៉ង់។
ស៊ីសូរ៉ាត្រូវបានដកហូតរអាជ្ញាប័ណ្ណប្រកួតក្នុងខែមីនា ខណៈដេវីដ ហេមិនមានអាជ្ញាប័ណ្ណក៏ព្រោះតែគេប្រកាសចូលនិវត្តន៍កាលពីឆ្នាំទៅមិញ ។ លោក Warrenបន្តថា៖«ខ្ញុំតែងតែយល់ថា នេះគឺជាការប្រកួតមួយដែលបណ្តាអ្នកគាំទ្រវិស័យកីឡាប្រដាល់ចង់ឃើញ។ ស៊ីសូរ៉ាមិនត្រូវបានហាមមិនឱ្យប្រកួតនោះទេ ហើយគ្រប់ៗគ្នាបានមើលរំលងចំណុចនោះ»។ ស៊ីសូរ៉ាបានប្តឹងឧទ្ធរណ៍រួចជាស្រេចហើយប្រឆាំងនឹងការដកហូតអាជ្ញាប័ណ្ណរបស់ខ្លួន ប៉ុន្តែពាក្យបណ្តឹងរបស់គេនោះត្រូវពន្យារពេលជំនុំជម្រះដល់ខែកក្កដា។
លោក Warren ប្រាប់វិទ្យុ BBCទៀតថា៖«សវនាការត្រូវបានពន្យារដល់ខែកក្កដា ដូច្នេះស៊ីសូរ៉ានឹងត្រូវស្ថិតនៅក្រៅសង្វៀនរយៈពេល៦ខែ ហើយប្រសិនជាគេជាកីឡាករបាល់ទាត់វិញគឺស្មើនឹងការអវត្តមាន២៤ប្រកួត ។ ស៊ីសូរ៉ាបានបាត់បង់ទឹកប្រាក់តម្លៃខ្លួនអស់ពាក់កណ្តាល ពោលគឺចាប់តាំងពីការប្រកួតជាមួយវីតាលី ឃ្លីតស្កូមក»។ លោកសង្កត់ធ្ងន់ថា៖«ទោះជាយ៉ាងណាក្តីនេះគឺជាការប្រកួតដែលធំជាងគេបង្អស់ប្រចាំឆ្នាំ។ វាជាការប្រកួតដែលត្រឹមត្រូវតាមច្បាប់ ហើយវានឹងដំណើរការទៅមុខតាមគម្រោង »។
ការជួបប្រកួតគ្នារវាងដេវីដ ហេនិងឌីរ៉េក ស៊ីសូរ៉ាគឺអាចចាត់ទុកថាជាការប្រកួតក្នុងប្រភេទទម្ងន់ធ្ងន់ដ៏ធំបំផុតលើកទី២នៅក្នុងប្រទេសអង់គ្លេសបន្ទាប់ពីការជួបគ្នាលើកទី១រវាងឡេណុក ឡេវីសនិងហ្វ្រ៊ែង ប្រ៊ូណូកាលពីឆ្នាំ១៩៩៣ ។
ដេវីដ ហេមានឯតទគ្គកម្មប្រកួត២៧លើក ក្នុងនោះឈ្នះ២៥លើក ចាញ់២ ធ្លាប់ផ្តួលដៃគូឱ្យសន្លប់ចំនួន ២៣លើក។ ចំណែកស៊ីសូរ៉ាវិញធ្លាប់ប្រកួត ១៨លើក ឈ្នះ១៥លើកចាញ់៣ មិនដែលស្មើ និងធ្លាប់ឈ្នះដោយផ្តួលដៃគូឱ្យសន្លប់បានចំនួន ៩លើក ៕
ចែករំលែកព័តមាននេះ