សហរដ្ឋអាមេរិកនិយាយកាលពីថ្ងៃទី១៤ឧសភាកន្លងមកនេះថា ពុំមានគម្រោងដាក់ពង្រាយជាថ្មីនូវអាវុធនុយក្លេអ៊ែរ តាក់ទិកក្នុងប្រទេសកូរ៉េខាងត្បូងឡើយ ។
អ្នកនាំពាក្យរបស់ក្រសួងការបរទេសអាមេរិក លោកស្រីវិកតូរីយ៉ា នូឡែន ក្នុងសន្និសីទសារព័ត៌មានមួយថ្លែងថាដូចលោកអ្នកជ្រាបហើយនយោបាយរបស់យើងនៅតែគាំទ្រដល់ការរំសាយនុយក្លេអ៊ែរនៅឧបទ្វីបកូរ៉េ ហើយយើងគ្មានគម្រោងណាមួយផ្លាស់ប្តូរនយោបាយនោះទេ ។ លោកស្រីអះអាងបែបនេះជាការឆ្លើយតបចំពោះសំណួរមួយលើការធ្វើវិសោធនកម្មដែលអនុម័តកាលពីសប្តាហ៍មុនដោយគណៈកម្មការ កងទ័ពរបស់សភាអាមេរិក ហើយដែលអាចអនុញ្ញាតឱ្យមានការដាក់ពង្រាយអាវុធនុយក្លេអ៊ែរតាក់ទិកកូរ៉េខាងត្បូង ។
សមាជិកសភាកូរ៉េខាងត្បូងនៃគណបក្សSAENURI ដែលកាន់អំណាច លោកCHUNG MONG-JOON ដែលគ្រប់គ្រងតំណែងនេះ៧អាណត្តិមកហើយរួចទើបប្រកាសឈរឈ្មោះបេក្ខជនប្រធានាធិបតីថ្លែងកាលពីសប្តាហ៍មុនថា ប្រទេសរបស់លោកនឹងត្រូវទទួលអាវុធនុយក្លេអ៊ែរអាមេរិកថ្មីដើម្បីប្រឈមមុខនឹងការគំរាមកំហែងនុយក្លេអ៊ែរពីសំណាក់កូរ៉េខាងជើង ។
ពួកអ្នកសង្កេតការណ៍យល់ថា ក្រុងព្យុងយ៉ាងអាចធ្វើការសាកល្បងនុយក្លេអ៊ែរលើកទី៣នាពេលខាងមុខឆាប់ៗនេះ ។ អាមេរិកបានដកអាវុធនុយក្លេអ៊ែរតាក់ទិករបស់ខ្លួនចេញពីកូរ៉េខាងត្បូងកាលពីឆ្នាំ១៩៩១ក្នុងក្របខណ្ឌនៃការកាត់បន្ថយគ្រឿងសព្វាវុធ ក៏ប៉ុន្តែចាប់តាំងពីពេលនោះមកតែងអះអាងជាប់ពីការសន្យាការពារប្រទេសជាសម្ព័ន្ធមិត្តនេះក្នុងនោះរួមទាំងការគំរាមកំហែងដោយអាវុធនុយក្លេអ៊ែរផង ។
សហរដ្ឋអាមេរិកមានទាហានប្រមាណជា២៨.៥០០នាក់នៅកូរ៉េខាងត្បូងចាប់តាំងពីសង្គ្រាមកូរ៉េឆ្នាំ១៩៥០ ហើយបញ្ចប់ក្នុងឆ្នាំ១៩៥៣មក ៕
ចែករំលែកព័តមាននេះ