រាជធានីភ្នំពេញ ៖ ម៉ូតូគុបជ្រុង ពណ៌ស្លែ និងម៉ូតូវីវ៉ា ពណ៌ខ្មៅ បានបុកគ្នាបណ្តាលឱ្យដួលរងរបួសទាំងសងខាងកាលពីវេលាម៉ោង៤ និង២៣នាទីទៀបភ្លឺថ្ងៃទី១៦ ឧសភា នៅមុខរិទ្ធីយ៉ាម៉ាស្សា និងស្ទឺម កែងផ្លូវលេខ៣៦០ និងផ្លូវលេខ១៦៣ ស្ថិតក្នុងភូមិ៦ សង្កាត់ទួលស្វាយព្រៃទី១ ខណ្ឌចំការមន ។
ប្រភពព័ត៌មាននៅកន្លែងកើតហេតុឱ្យដឹងថា ម៉ូតូគុបជ្រុង ពណ៌ស្លែ បើកដោយយុវជនម្នាក់តាមផ្លូវលេខ៣៦០ ពីកើតទៅលិច ឯម៉ូតូវីវ៉ា ពណ៌ខ្មៅ ជិះគ្នា២នាក់ បើកតាមផ្លូវលេខ១៦៣ ពីជើងទៅត្បូង លុះពេលមកដល់ចំណុចខាងលើក៏បានបុកគ្នាបណ្តាលឱ្យម៉ូតូគុបជ្រុងប៉ើងទៅលើចិញ្ចើមផ្លូវ ហើយអ្នកបើកបរសន្លប់មួយសន្ទុះទើបដឹងខ្លួនវិញ ។ រីឯម៉ូតូវីវ៉ាដួលទៅលើចិញ្ចើមផ្លូវបណ្តាលឱ្យអ្នកបើកបរដួលបោកក្បាល និងអ្នកជិះពីក្រោយបាក់ជើងខាងឆ្វេង ។
អ្នករងគ្រោះជិះម៉ូតូគុបជ្រុងឈ្មោះឈិត សេងហាក់ អាយុ២២ឆ្នាំ ជានិស្សិត ស្នាក់នៅផ្ទះជួលក្នុងសង្កាត់បឹងកេងកងទី៣ ខណ្ឌចំការមន ។ចំណែកម្ចាស់ម៉ូតូវីវ៉ា ជាអ្នកជិះពីក្រោយឈ្មោះហ៊ុយ ពុធកីឡា ភេទប្រុស អាយុ១៩ឆ្នាំ មានស្រុកកំណើតនៅខេត្តកំពង់ធំ របួសបាក់ជើងឆ្វេង និងអ្នកបើកម៉ូតូរបួសក្បាលបានរត់គេចទៅបាត់ ។ ក្រោយពេលកើតហេតុ ជនរងគ្រោះទាំងពីរនាក់បានទូរស័ព្ទហៅបងប្អូនទៅជួយអន្តរាគមន៍ ពេលតំណាងទាំងសងខាងទៅដល់បានលើកម៉ូតូយកទៅផ្ទះរៀងខ្លួន និងយកជនរងគ្រោះទៅព្យាបាលដោយមិនចាំបាច់មានអ្នកណាសងអ្នកណាទេ ៕
ចែករំលែកព័តមាននេះ