ទីភ្នាក់ងារអវកាសសហព័ន្ធរុស្ស៊ី ROSCOSMOS រាយការណ៍ថា យានអវកាសរុស្ស៊ី SOYOUZ TMA-O4M ជាមួយអវកាសយានិក៣នាក់ជិះក្នុងនោះ ត្រូវបានបាញ់បង្ហោះចេញពីទីតាំងបាញ់បង្ហោះបៃកូនួរ ប្រទេសកាហ្សាក់ស្ថានកាលពីថ្ងៃទី១៥ ឧសភា។
យានអវកាសនោះត្រូវបានបាញ់បង្ហោះនាវេលាម៉ោង៧ព្រឹកម៉ោងនៅក្រុងមូស្គូ ជាមួយអវកាសយានិករុស្ស៊ី២នាក់លោកហ្គេនណាឌីប៉ា ដាល់កា និងលោកស័រហ្គេយ រឺវីន ព្រមទាំងអវកាសយានិករបស់ NASA លោកJOE ACABA ។
ក្រោយពីចូលទៅកាន់ក្នុងតារាវិថី យានអវកាសនោះត្រូវទៅភ្ជាប់ជាមួយស្ថានីយអវកាសអន្តរជាតិISS នាវេលាម៉ោង៨និង៣៩នាទីម៉ោងនៅក្រុងមូស្គូ ។ នេះជាការធ្វើដំណើរទៅកាន់ទីអវកាសលើកទី៤របស់មេបញ្ជាការក្រុម លោកប៉ាដាល់កា និងការឡើងទៅកាន់ទីអវកាសលើកដំបូងរបស់វិស្វករខាងបរិស្ថាន លោកវឺវីន ។
លោក ACABA ដែលធ្លាប់ទៅកាន់ទីអវកាសលើកដំបូងកាលពីឆ្នាំ២០០៩នោះនឹងប្រារព្ធខួបកំណើតគំរប់៤៥ឆ្នាំរបស់លោកនៅទីអវកាសនាព្រឹកថ្ងៃទី១៧ឧសភា ក្រោយយានអវកាសនោះទៅភ្ជាប់ជាមួយស្ថានីយ ISS ។ការបាញ់បង្ហោះយានអវកាសរបស់រុស្ស៊ីនេះ ត្រូវពន្យារពេលដល់ទៅ២ខែ ក្រោយការធ្លាយខ្យល់ដែលរកឃើញត្រង់ទ្វារចូលក្នុងយាននោះ៕
ចែករំលែកព័តមាននេះ