ខេត្តបាត់ដំបង ៖ រថយន្តដឹកអ្នកដំណើររបស់ក្រុមហ៊ុន«រិទ្ធិមុនី»បានបុកគូទអេស្កាវ៉ាទ័រពីក្រោយពេញទំហឹង ខណៈធ្វើដំណើរស្របទិសគ្នា បណ្ដាលឲ្យមនុស្សម្នាក់ស្លាប់ ឯអ្នកបើកនិងអ្នកដំណើរជិត១០នាក់ទៀតរងរបួសធ្ងន់និងស្រាល ។ ហេតុការណ៍នេះកើតឡើងកាលពីវេលាម៉ោង៥និង៣០នាទីល្ងាចថ្ងៃទី១៤ ឧសភា នៅលើផ្លូវជាតិលេខ៥ ក្នុងភូមិកំពង់ព្រះ ឃុំកំពង់ព្រះ ស្រុកសង្កែ ។
មន្រ្តីប៉ូលិសចរាចរឲ្យដឹងថា រថយន្តដឹកអ្នកដំណើរនេះបុកអេស្កាវ៉ាទ័រពីក្រោយ ក្នុងទិសដៅស្របទិសគ្នាពីកើតទៅលិច ខណៈរថយន្តបើកក្នុងល្បឿនលឿន ។ រថយន្តក្រុងបុកគ្រឿងចក្រអេស្កាវ៉ាទ័រនោះធ្លាក់ពីផ្លូវជាតិ ខណៈរថយន្តខូចខាតទាំងស្រុងផ្នែកខាងមុខ និងបណ្ដាលឲ្យព្រូរថយន្តឈ្មោះសំ ដារ៉ា អាយុ២២ឆ្នាំស្លាប់ ឯអ្នកបើករងរបួសធ្ងន់ដោយកៀបជាប់នឹងចង្កូត និងអ្នកដំណើរចំនួន៩នាក់ទៀតរងរបួសធ្ងន់និងស្រាល ។
សាក្សីឃើញផ្ទាល់ភ្នែកនិយាយថា គ្រឿងចក្រអេស្កាវ៉ាទ័រកង់កៅស៊ូបើកយឺតៗពីកើតឆ្ពោះទៅលិច និងរថយន្តក្រុងបើកមកពីក្រោយក្នុងល្បឿនលឿន ។ ពេលដល់ក្បែរគ្នាគេឃើញក្រុងរថយន្តបន្ថែមល្បឿនប្រុងវ៉ាអេស្កាវ៉ាទ័រ តែប្រទះរថយន្តយក្ស២គ្រឿងមកពីមុខ។ ដោយទាល់ច្រករថយន្តក្រុងងាកចង្កូតមកវិញបុកចំគូទអេស្កាទ័រពេញទំហឹងពីក្រោយដែលមានប៉ែលសម្រាប់ឈូសដីផង បណ្ដាលឲ្យរថយន្តរួញផ្នែកខាងមុខកៀបជាប់អ្នកបើកបរនិងព្រូ រីឯអ្នកដំណើរស្រែកលាន់ទ្រហឹងក្នុងរថយន្ត ។គ្រាន់តែរយៈពេល៤ថ្ងៃក្នុងខែឧសភានេះមានគ្រោះថ្នាក់ចំនួន៤ករណី បង្កដោយរថយន្តក្រុមហ៊ុនដឹកអ្នកដំណើរជាមួយយានយន្តផ្សេងៗទៀត និងអ្នកថ្មើរជើងផង ។
សមត្ថកិច្ចចរាចរនិយាយថា កាលពីថ្ងៃទី១១ ឧសភា មានរថយន្តដឹកអ្នកដំណើរ២គ្រឿងបង្កគ្រោះថ្នាក់ចរាចរណ៍ ដែល១គ្រឿងប៉ះទង្គិចជាមួយរថយន្តនីស្សាន់នៅចំណុចច្រមុះជ្រូកផ្លូវឡាអេ ក្នុងក្រុងបាត់ដំបង តែមិនបង្កគ្រោះថ្នាក់ដល់មនុស្សទេ។ ឯ១គ្រឿងទៀតបានប៉ះទង្គិចគ្នាជាមួយគោយន្តកន្ត្រៃនៅក្នុងឃុំកកោះស្រុកម៉ោងឫស្សី បណ្ដាលឲ្យរបួសអ្នកដំណើរជិត១០នាក់ ហើយរថយន្តរអិលធ្លាក់ចេញពីផ្លូវជាតិ ។
នៅថ្ងៃទី១៤ ឧសភា រថយន្តដឹកអ្នកដំណើរ១គ្រឿងទៀតបុកអ្នកថ្មើរជើងម្នាក់ស្លាប់នៅចំណុចមុខសណ្ឋាគារ«បាណន់»ក្នុងក្រុងបាត់ដំបង ។ សមត្ថកិច្ចនិយាយថា ករណីនេះដោយសារតែជនរងគ្រោះត្រូវរថយន្តមួយគ្រឿងទៀតបើកកៀរ ហើយខ្ទាតមកប៉ះរថយន្តដឹកអ្នកដំណើរ រីឯរថយន្តបង្កបើកគេចបាត់ ។ រយៈពេល៤ថ្ងៃមានរថយន្តក្រុមហ៊ុនដឹកអ្នកដំណើរ៤គ្រឿងជួបគ្រោះថ្នាក់ចរាចរណ៍ ដែលបង្កឲ្យមនុស្ស២នាក់ស្លាប់ និងមនុស្សជិត២០នាក់ទៀតរងរបួសធ្ងន់និងស្រាល ។
លោកសាត គីមសាន ប្រធានការិយាល័យចរាចរណ៍ជើងគោកខេត្តឲ្យដឹងថា គ្រោះថ្នាក់ចរាចរទាំងនេះគឺបណ្ដាលមកពីការបើកបរមានការធ្វេសប្រហែស មិនគោរពច្បាប់បើកបរ មិនគោរពសិទ្ធិគ្នាពេលបើកបរ និងខ្វះការត្រួតពិនិត្យផ្នែកបច្ចេកទេសយានយន្ត ។
លោកបញ្ជាក់ថា ក្នុងករណីខាងលើនេះ កំហុសមួយផ្នែកបង្កដោយភាគីរថយន្តដែលបើកលឿនហួសហេតុពេក ដែលជាហេតុមិនអាចគ្រប់គ្រងចង្កូតបានពេលជួបគ្រាអាសន្ន ។ ដូច្នេះដើម្បីជៀសវាងគ្រោះថ្នាក់មានតែអ្នកបើកបរយានយន្តត្រូវតែគោរពច្បាប់៕
ចែករំលែកព័តមាននេះ