សហព័ន្ធប្រណាំងរថយន្តអន្តរជាតិហៅកាត់ FIAបានបញ្ជាក់អះអាងនៅថ្ងៃទី១៤ឧសភាថា ខ្លួនបានបង្កើតគណៈកម្មការមួយដើម្បីស៊ើបអង្កេតលើករណីអគ្គិភ័យនៅក្នុងចំណតរបស់ក្រុម Williams។ កាលពីថ្ងៃទី១៣ឧសភាបន្ទាប់ពីកីឡាកររបស់ខ្លួនដណ្តើមបានជ័យជម្នះក្លាយជាជើងឯកកម្មវិធី Spanish Grand Prix មកចំណតក្រុម Williams ត្រូវភ្លើងឆេះដែលបណ្តាលឱ្យមនុស្សជាង៣០នាក់រងរបួសក្នុងនោះម្នាក់រងរបួសធ្ងន់ ។
នៅក្នុងសេចក្តីថ្លែងការណ៍មួយ សហព័ន្ធប្រណាំងរថយន្តអន្តរជាតិបាននិយាយថា មានមនុស្សសរុប៣១នាក់ត្រូវបានបញ្ជូនទៅកាន់មជ្ឈមណ្ឌលព្យាបាលក្នុងទីលានប្រណាំង Circuit de Catalunya ហើយបន្ទាប់មក៧នាក់ក្នុងចំណោមនោះបញ្ជូនបន្តទៅកាន់មន្ទីរពេទ្យមួយក្នុងតំបន់ក្នុងខណៈរបួសមានសភាពធ្ងន់ ។
ក្នុងចំណោមអ្នករងរបួសភាគច្រើនជាសមាជិកក្នុងក្រុម Williams។ ពួកគេរងរបួសខណៈព្យាយាមពន្លត់អណ្តាតភ្លើងដែលឆេះសន្ធោសន្ធៅ។ ទោះជាយ៉ាងណាក្តី អគ្គិភ័យបានរលត់ទៅវិញយ៉ាងឆាប់រហ័សក្រោយពីមានការជួយពីអាជ្ញាធរអេស្ប៉ាញ។
ក្រុមWilliams ថ្លែងអំណរគុណយ៉ាងជ្រាលជ្រៅជូនចំពោះក្រុមប្រណាំងផ្សេងក៏ដូចជាសហព័ន្ធប្រណាំងរថយន្តអន្តរជាតិដែលបានខ្នះខ្នែងជួយដល់ខ្លួនទាន់ពេលវេលា ។
ទោះជាយ៉ាងនេះក្តី អនុប្រធានក្រុមប្រណាំង Force India លោក Bob Fearnleyបានរិះគន់លើបុគ្គលិកប្រចាំទីលានប្រណាំងដែលមានការធ្វេសប្រហែសនិងធ្វើសកម្មភាពយឺតយ៉ាវ។ លោកថា៖«គ្មានការហ្វឹកហាត់ គ្មានវិធីសាស្ត្រនៃការជួយសង្គ្រោះ។ ខ្ញុំបានទៅមើលថាតើកីឡាករក្នុងក្រុមខ្ញុំសុខសប្បាយដែរឬយ៉ាងណា? យើងចាំបាច់ត្រូវសម្លឹងជាសំខាន់ទៅលើការហ្វឹកហាត់បុគ្គលិកទីលានប្រណាំង» ៕
ចែករំលែកព័តមាននេះ