ប្រទេសចិនបាននិយាយនៅថ្ងៃសៅរ៍សប្តាហ៍កន្លងទៅថា ខ្លួននឹងកាត់បន្ថយប្រាក់បម្រុងសម្រាប់ធនាគារ បន្ទាប់ពីមានការខកចិត្តចំពោះទិន្នន័យសេដ្ឋកិច្ចដែលបង្កើនការភ័យខ្លាចពីការធ្លាក់ចុះសេដ្ឋកិច្ចជាតិខ្លាំង ។ធនាគារកណ្តាលចិននិយាយថា ខ្លួននឹងកាត់
បន្ថយតម្រូវការប្រាក់បម្រុងធនាគារចំនួន០,៥ភាគរយដែលនឹងមានប្រសិទ្ធភាពចាប់ពីថ្ងៃ១៩ ឧសភាតទៅ នេះបើយោងតាមគេហទំព័រធនាគារផ្សព្វផ្សាយ ។
សកម្មភាពនេះកើតឡើងដូចការរំពឹងទុកបន្ទាប់ពីប្រទេសចិនបានចេញរបាយការណ៍ស្តីពីកំណើនផលិតផលឧស្សាហកម្មកាលពីថ្ងៃសុក្រសប្តាហ៍មុនថា ធ្លាក់ចុះក្នុងខែមេសា ដែលមិនធ្លាប់មានក្នុងរយៈពេល៣ឆ្នាំចុងក្រោយ ហើយតួលេខផ្សេងៗក៏ធ្វើឲ្យស្រងាកចិត្តផងដែរ បន្ថែមសម្ពាធដល់គោលនយោបាយសម្រាលរូបិយវត្ថុរបស់រដ្ឋាភិបាលក្រុងប៉េកាំង ។ រដ្ឋាភិបាលក្រុងប៉េកាំង ធ្លាប់បានកាត់បន្ថយ អត្រាប្រាក់បម្រុងធនាគារចំនួនពីរលើករួចទៅហើយគិតចាប់តាំងពីខែធ្នូ ស្របពេលព្យាយាមស្វែងរកការពង្រីកប្រាក់កម្ចីដើម្បីកំណើនសេដ្ឋកិច្ច ប៉ុន្តែអ្នកសេដ្ឋកិច្ចថា មានគោលនយោបាយ ឧបត្ថម្ភបន្ថែម ។ កំណើនសេដ្ឋកិច្ចចិនក្នុងត្រីមាសទីមួយឆ្នាំ២០១២ មានចំនួន៨,១ភាគរយ វាជាតួលេខមួយទាបបំផុតក្នុងរយៈពេល៣ឆ្នាំចុងក្រោយ ។
គោលដៅរបស់រដ្ឋាភិបាលចង់បានកំណើនសេដ្ឋកិច្ចប្រចាំឆ្នាំ៧,៥ភាគរយ ធ្លាក់ចុះជាងការចង់បានលើកមុន៩,២ភាគរយទាបជាងកំណើនសេដ្ឋកិច្ចឆ្នាំ២០១១ដែលមាន១០,៤ភាគរយ ។បន្ទាប់ពីវិធានការខាងលើចូលជាធរមាន ហើយនោះ ទុនបម្រុងកាតព្វកិច្ចសម្រាប់ធនាគារធំៗនឹងធ្លាក់ចុះមកត្រឹម២០ភាគរយ ។ ចំណែកធនាគារតូចៗត្រូវរក្សាទុនបម្រុងកាតព្វកិច្ច១៦,៥ភាគរយ ។
លោកZhou Hao អ្នកសេដ្ឋកិច្ចនៃក្រុមហ៊ុនANZ Global Marketsនិយាយថា នេះពិតជាសកម្មភាពគោលនយោបាយដ៏ត្រឹមត្រូវរបស់ធនាគារកណ្តាលចិន ។
អ្នកវិភាគបានគិតទុកមុនកាលពីដើមខែនេះ ជាពិសេសបន្ទាប់ពីអតិផរណាបានធូរស្រាល ជួយឲ្យរដ្ឋាភិបាលមានចន្លោះក្នុងការសម្រាលគោលនយោបាយរូបិយវត្ថុតាមរយៈការកាត់បន្ថយទុនបម្រុងកាតព្វកិច្ច ។ប្រទេសចិនបាននិយាយនៅថ្ងៃសុក្រ ទី១១ ឧសភាថា តម្លៃទំនិញដែលជាមូលហេតុចម្បងនៃអតិផរណា កើនឡើង៣,៤ភាគរយក្នុងខែមេសា តែធូរស្រាលជាងខែមីនា ដែលមានអតិផរណាដល់៣,៦ភាគរយ ។
លោកLian Ping ប្រធានអ្នកសេដ្ឋកិច្ចនៃធនាគារ Communication និយាយថា មិនថា ពាណិជ្ជកម្មបរទេស ការវិនិយោគ ចំណូលពន្ធ និងកំណើនឥណទាន ពួកវាបានបង្ហាញនូវបាតុភូតនៃការធ្លាក់ចុះយឺត ។ធនាគារកណ្តាលទម្លាក់ទុនបម្រុងកាតព្វកិច្ច នាពេលនេះ នឹងជួួយពង្រឹងសេដ្ឋកិច្ចដែលរង្គោះរង្គើ ។ ប្រទេសចិនបានប្រកាសពីការកើនឡើងនៃការនាំចូលចំនួន០,៣ភាគរយក្នុងខែមេសា ស្របពេលការនាំចេញកើនឡើង៤,៩ភាគរយ ៕
ចែករំលែកព័តមាននេះ