ប្រមុខសង្ឃទីបេដាឡៃឡាម៉ា បានចោទប្រកាន់ថាពួកភ្នាក់ងារសម្ងាត់ចិនប៉ុនប៉ងធ្វើឃាតព្រះអង្គដោយបញ្ជូនពួកនារីដែលមានសំលៀកបំពាក់និងសក់មានជាតិពុល ។
ពេលសម្ភាសន៍ពីរឿងនេះជាមួយកាសែតអង់គ្លេស SUNDAY TELEGRAPH សម្តេចសង្ឃដាឡៃឡាម៉ា ឆ្លើយថាមែនហើយពួកនារីទាំងនោះមានសក់និងសំលៀកបំពាក់មានលាយជាតិពុលមកស្កាត់ជួបព្រះអង្គ ដោយនិយាយថាពួកនាងមានជំងឺហើយចង់ឱ្យព្រះអង្គសូត្រមន្តជួយឱ្យជំងឺពួកនាងបានជាសះស្បើយក្នុងបំណងឱ្យព្រះអង្គយកដៃស្ទាបពួកគេ ។ ព្រះអង្គបន្តទៀតថាពួកគេជាប្រភេទនៃភ្នាក់ងារស៊ើបកាណ៍ដែលយើងបានទទួល ។ យើងពុំប្រាកដ១០០%ទេ ព្រោះពុំអាចធ្វើការត្រួតពិនិត្យបាន ។
មានព្រះជន្ម៧៦ព្រះវស្សា ដាឡៃឡាម៉ាជ័យលាភីពានរង្វាន់ណូបែលសន្តិភាពឆ្នាំ១៩៨៩ ត្រូវទទួលនាថ្ងៃទី១៤ឧសភានៅឯព្រះវិហារសាំងប៉ូលទីក្រុងឡុងដ៍ នូវពានរង្វាន់ TEMPL-ETON ជាពានរង្វាន់ផ្តល់ចំពោះបណ្តាសកម្មភាពមនុស្សធម៌ ឬសកម្មភាពជួយគ្នាទៅវិញទៅមក និងការយោគយល់គ្នាអន្តរ-សាសនា ។
ចិនបានត្រួតត្រាតំបន់ទីបេចាប់តាំងពីឆ្នាំ១៩៥០ មក ។ អាជ្ញាធរចិនតែងចោទប្រកាន់ពួកទីបេនិរទេសខ្លួន ហើយជាពិសេសដាឡៃឡាម៉ា ថាអុជអាលឱ្យមានការបះបោររបស់ប្រជាជនទីបេប្រឆាំងនយោបាយរបស់ខ្លួន៕
ចែករំលែកព័តមាននេះ