នាយករដ្ឋមន្ត្រីចិនលោកវេនជាបាវគូសបញ្ជាក់កាលពីថ្ងៃទី១៣ឧសភាថាចិន ជប៉ុន និងកូរ៉េខាងត្បូងបានព្រមព្រៀងគ្នាធ្វើការចរចាស្តីពីការបង្កើតតំបន់ផ្លាស់ប្តូរសេរីនាដំណាច់ឆ្នាំនេះ ។
លោកវេនជាបាវអះអាងបែបនេះក្នុងសន្និសីទសារព័ត៌មានមួយបន្ទាប់ពីកិច្ចប្រជុំកំពូលត្រីភាគីជាមួយនាយករដ្ឋមន្ត្រីជប៉ុន លោកយូស៊ីហ៊ីកូណូដា និងប្រធានាធិបតីកូរ៉េខាងត្បូងលោកលីម្យុងបាក់ ។ ដោយចាត់ទុកកិច្ចព្រមព្រៀងនោះថាជាការសម្រេចចិត្តខាងយុទ្ធសាស្ត្រសំខាន់មួយនាយករដ្ឋមន្ត្រីចិនធ្វើការកត់សម្គាល់ថាប្រទេសទាំង៣ត្រូវធ្វើការខិតខំប្រឹងប្រែងរួមដើម្បីបង្កើតតំបន់ផ្លាស់ប្តូរសេរីនោះក្នុងពេលដ៏ឆាប់ខាងមុខ។ លោកគូសបញ្ជាក់ថា ភាគីទាំង៣ក៏ឈានដល់ការចុះហត្ថលេខាផងដែរ ក្នុងឱកាសនៃកិច្ចប្រជុំនោះលើកិច្ចព្រមព្រៀងមួយដែលសំដៅជំរុញ សម្រួល និងការពារវិនិយោគទុន ។ លោកអះអាងថានោះនឹងជាឯកសារច្បាប់ដ៏សំខាន់ដំបូងលើកិច្ចសហប្រតិបត្តិការត្រីភាគីក្នុងវិស័យសេដ្ឋកិច្ច ។
នាយករដ្ឋមន្ត្រីចិនគូសបញ្ជាក់ទៀតថា ភាគីទាំង៣ក៏បានព្រមព្រៀងគ្នាដែរ ធ្វើឱ្យស៊ីជម្រៅដល់កិច្ចសហប្រតិបត្តិការខាងពន្ធដារនិងហិរញ្ញវត្ថុព្រមទាំងជំរុញការពង្រីកផ្សារភាគហ៊ុន អាស៊ី ។ទំនាក់ទំនងពាណិជ្ជកម្មនិងសេដ្ឋកិច្ចត្រូវបានគូសបញ្ជាក់ក្នុងឱកាសនៃកិច្ចប្រជុំនោះហើយពាណិជ្ជកម្មរវាងចិន ជប៉ុន និងកូរ៉េខាងត្បូងមានការកើនឡើងយ៉ាងឆាប់រហ័សរយៈពេលប៉ុន្មានឆ្នាំចុងក្រោយនេះ ។ ពាណិជ្ជកម្មត្រីភាគីមានការកើនឡើង៤ដង បើប្រៀបធៀបនឹងទំហំត្រឹម១៣០ពាន់លានដុល្លារកាលពីឆ្នាំ១៩៩៩ ឡើងដល់៦៩០ពាន់លានដុល្លារក្នុងឆ្នាំ២០១១ ៕
ចែករំលែកព័តមាននេះ