បណ្តាសាក្សីនិងប្រភពព័ត៌មានសន្តិសុខរាយការណ៍កាលពីថ្ងៃទី១៣ឧសភាថា ការប្រយុទ្ធគ្នានានារវាងបណ្តាសមាជិកសហគមន៍អេឡាហ្វីត ដែលគាំទ្រប្រធានាធិបតីស៊ីរីលោកបាចាអាល់អាសាដ និងសមាជិកសហគមន៍ស៊ុននីត បណ្តាលឱ្យមនុស្សស្លាប់យ៉ាងតិច៣នាក់ នៅទីក្រុងទ្រីប៉ូលីរបស់លីបង់ ។
ការប៉ះទង្គិចគ្នានានាដោយកាំភ្លើងបាញ់គ្រាប់រ៉ុក្កែត និងកាំភ្លើងស្វ័យប្រវត្តិចាប់ផ្តើមពីយប់ថ្ងៃទី១២មកទី១៣ឧសភាក្នុងតំបន់ពួកអាឡា ហ្វីតនិងក្នុងបណ្តាសង្កាត់ជិតខាងដែលមានពួកស៊ុននីតភាគច្រើននៃទីក្រុងកំពង់ផែនោះ ស្ថិតនៅចម្ងាយ៧០គ.មខាងជើងក្រុងបៃរូត ។
សហគមន៍ពួកអាឡាហ្វីតតូចមួយរស់នៅក្រុងទ្រីប៉ូលី ដែលទទួលជនភៀសខ្លួនស៊ីរីជាច្រើនចាប់តាំងពីចាប់ផ្តើមការបះបោរប្រឆាំងលោកបាចាអាល់អាសាដមក ខណៈដែលពួកស៊ុននីតដែលមានភាគច្រើននៅក្រុងទ្រីប៉ូលីជាអ្នកប្រឆាំងយ៉ាងខ្លាំងចំពោះអំពើបង្ក្រាបការបះបោររបស់រដ្ឋអំណាចស៊ីរី ។ ការប៉ះទង្គិចគ្នា ទាំងនោះញ៉ាំងឱ្យមានការភ័យខ្លាចចំពោះការរាលដាលនៃអំពើហិង្សានៅលីបង់់ ខណៈដែលក្នុងប្រទេសនោះស៊ីរីនៅតែមានឥទ្ធិពលខ្លាំង ក្រោយពីការដកកងទ័ពចេញពីប្រទេសនោះក្រោមការគាបសង្កត់របស់អន្តរជាតិកាលពីឆ្នាំ២០០៥មក ។
ទីភ្នាក់ងារព័ត៌មានផ្លូវការលីបង់រាយការណ៍ថា ទាហានលីបង់ម្នាក់រងការបាញ់ប្រហារពីខ្មាន់កាំភ្លើងដៃត្រង់ស្ថិតក្នុងចំណោមអ្នកស្លាប់ ។ ក្នុងសេចក្តីប្រកាសមួយកងទ័ពប្រកាសពីការបញ្ជូន កងកម្លាំងបន្ថែមទៅកាន់ទីក្រុងនោះ ហើយកងយោធាតាមប្រមាញ់ពួកជនប្រដាប់អាវុធដើម្បីស្តារភាពស្ងប់ស្ងាត់ឡើងវិញ ។ សេចក្តីប្រកាសនោះបញ្ជាក់ថាទាហាន២នាក់ត្រូវរបួសក្នុងការប្រយុទ្ធគ្នា៕
ចែករំលែកព័តមាននេះ