រាជធានីភ្នំពេញ ៖ អំណោយជាគ្រឿងឧបភោគ បរិភោគ ថវិកា និងសម្ភារផ្ទះបាយមួយចំនួនជារបស់អនុសាខាកាកបាទក្រហមខណ្ឌដង្កោ និងមានការចូលរួមពីសហគមន៍មូលនិធិនគរកាយវត្តព្រះពុទ្ធសាសនាកម្ពុជា ត្រូវលោកនុត ពុធដារ៉ា ប្រធានកិត្តិយសអនុសាខាកាកបាទក្រហមកម្ពុជា និងជាអភិបាលខណ្ឌដង្កោ និងភរិយា រួមជាមួយមន្ត្រីក្រោមឱវាទនាំយកទៅចែកជូនដល់ប្រជាពលរដ្ឋក្រីក្រ ចាស់ជរា ពិការ១០គ្រួសារ ដែលកំពុងជួបការខ្វះខាត ។
ពិធីនោះធ្វើឡើងកាលពីវេលាព្រឹកថ្ងៃទី១២ ខែឧសភា ឆ្នាំ២០១២ នៅសង្កាត់ស្ពានថ្ម ខណ្ឌដង្កោ រាជធានីភ្នំពេញ ដោយមានការចូលរួមពីលោកថេង សុថុល ប្រធានអនុសាខាកាកបាទក្រហមខណ្ឌដង្កោ ព្រះតេជគុណ ខឹម សម្បត្តិ រាជាគណៈថ្នាក់កិត្តិយស ព្រះវិន័យធរ អនុគណខណ្ឌឫស្សីកែវ ចៅអធិការវត្តញាណរង្សី និងជាប្រធានសហគមន៍មូលនិធិនគរកាយវត្តព្រះពុទ្ធសាសនាកម្ពុជា ព្រមទាំងសប្បុរសជនជាច្រើនរូបទៀត ។
អំណោយដែលនាំយកទៅចែកជូនដល់បងប្អូន លោកយាយលោកតា ដែលជាចាស់ជរា ពិការ និងជនក្រីក្រនាពេលនោះរួមមាន អង្ករ៥០គីឡូក្រាម ថវិកា១០ម៉ឺនរៀល មី២០កញ្ចប់ ស្ករស២គីឡូក្រាម ព្រមទាំងសម្ភារផ្ទះបាយជាច្រើនមុខទៀត ។ មិនតែប៉ុណ្ណោះ លោកនុត ពុតដារ៉ា និងភរិយា ព្រមទាំងព្រះតេជគុណខឹម សម្បត្តិ និងមន្ត្រីរួមដំណើរបានទៅសាកសួរសុខទុក្ខលោកអ៊ុំ អ៊ុត ចៅសង្កាត់ស្ពានថ្ម ដែលពេលនេះកំពុងមានជំងឺ និងបានឧបត្ថម្ភថវិកាចំនួន៥០ម៉ឺនរៀល ។
លោកនុត ពុធដារ៉ា ថ្លែងថា អំណោយទាំងនេះ ថ្មីដ្បិតតែតិចតួចស្តួចស្តើងមែន ប៉ុន្តែបានមកពីការស្វះស្វែងរកពីសប្បុរសជននានា ទាំងព្រះសង្ឃ និងគ្រហស្ថ ហើយអនុសាខាកាកបាទក្រហមកម្ពុជាខណ្ឌដង្កោ ដោយមានការចូលរួមចំណែកពីព្រះតេជគុណខឹម សម្បត្តិ ប្រធានសហគមន៍មូលនិធិនគរកាយវត្តព្រះពុទ្ធសាសនាកម្ពុជា នាំមកចែកជូនដល់បងប្អូន លោកយាយ លោកតាទាំងអស់នៅក្នុងសង្កាត់ស្ពានថ្ម និងសង្កាត់ផ្សេងៗទៀតនៅទូទាំងខណ្ឌ ។
លោកនុត ពុធដារ៉ា បន្តថា កន្លងមកគឺជាការអនុវត្តតាមការណែនាំរបស់អនុសាសន៍របស់សម្តេចអគ្គមហាសេនាបតីតេជោ ហ៊ុន សែន ដែលមិនទុកឱ្យប្រជាពលរដ្ឋណាម្នាក់ស្លាប់ដោយអត់បាយទេ ឯលោកជំទាវកិត្តិព្រឹទ្ធបណ្ឌិតប៊ុន រ៉ានីហ៊ុនសែន ក៏បានណែនាំឱ្យអាជ្ញាធរគ្រប់លំដាប់ថ្នាក់ស្រាវជ្រាវ និងពិនិត្យមើលយ៉ាងយកចិត្តទុកដាក់ពីជីវភាពប្រជាពលរដ្ឋទីទ័លក្រ ចាស់ជរាពិការ ។
កន្លងមកក្នុងនាមជាប្រធានកាកបាទក្រហមកម្ពុជា លោកជំទាវតែងតែជួយដល់បងប្អូនជាបន្តបន្ទាប់ ជាពិសេសប្រជាពលរដ្ឋដែលជួបគ្រោះធម្មជាតិផ្សេងៗដូចជា ទឹកជំនន់ និងខ្យល់ព្យុះ ព្រមទាំងភ្លើងឆេះផ្ទះជាដើម ។
ព្រះតេជគុណខឹម សម្បត្តិ មានសង្ឃដីកាថា អំណោយដែលបានចូលរួមជាមួយអនុសាខាកាកបាទក្រហមខណ្ឌដង្កោនេះ គឺជាអំណោយបានមកពីពុទ្ធបរិស័ទ សប្បុរសជននានាប្រគេនដល់ព្រះអង្គ ប៉ុន្តែព្រះអង្គមិនទុកទេ គឺយកអំណោយទាំងនេះចែកជូនដល់ជនក្រីក្រជាការងារមនុស្សធម៌ចូលរួមចំណែកជាមួយកាកបាទក្រហម ។ ម៉្យាងទៀតប្រជាពលរដ្ឋទោះបីជាខ្លួនទីទ័លក្របែបនេះក្តីក្នុងនាមជាអ្នកកាន់ព្រះពុទ្ធសាសនាបងប្អូនតែងតែយកចង្ហាន់ទៅវត្តប្រគេនព្រះសង្ឃ ហើយពេលនេះព្រះអង្គបាននាំអំណោយទៅឧបត្ថម្ភដល់បងប្អូនវិញជាការសងគុណ និងជាការចែករំលែកពេលបងប្អូនកំពុងជួបការលំបាកខ្វះខាត ហើយការងារទាំងនេះក៏ជាការចូលរួមចំណែកជាមួយអាជ្ញាធរមូលដ្ឋាន និងកាកបាទក្រហមផងដែរ ៕
ចែករំលែកព័តមាននេះ