លោកប្រធានាធិបតីភូមា បានជំរុញឱ្យប្រជាជនខ្លួនដែលធ្វើអន្តោប្រវេសន៍ ឬនិរទេសខ្លួនចូលស្រុកវិញ ស្របពេលប្រទេសត្រូវការបុគ្គលិកជំនាញដើម្បីជួយបម្រើការងារកំណែទម្រង់ឱ្យបានរលូននោះ ។
មានប្រជាជនភូមារាប់លាននាក់បានភៀសខ្លួនចេញពីប្រទេសដែលមានសេដ្ឋកិច្ចមហាពុករលួយ និងនយោបាយក្រោមចុងកាណុងកាំភ្លើងយោធា នាំឱ្យប្រទេសជាតិកង្វះខាតអ្នកជំនាញ ដើម្បីជួយចាត់ចែងសេដ្ឋកិច្ចដ៏ធំសម្បើម និងការផ្លាស់ប្តូរនយោបាយ។
ហេតុនេះលោកប្រធានាធិបតី Tehin Sein បានស្នើឱ្យប្រជាជនភូមាដែលភៀសខ្លួនទៅនៅប្រទេសផ្សេងៗដោយមូលហេតុនយោបាយវិលត្រឡប់មកប្រទេសវិញ ។
លោកប្រធានាធិបតីថ្លែងថា សំណើត្រូវបានពង្រីកជាដរាបដល់ប្រជាជនភូមា ដែលបានចាកចេញពីប្រទេសទៅកាន់បរទេសដោយសារមូលហេតុផ្សេងៗឱ្យត្រឡប់ចូលស្រុកវិញ ។ រដ្ឋនឹងផ្តល់ជំនួយចាំបាច់ទៅឱ្យពួកគេវិញប្រសិនបើពួកគេមានបញ្ហាលំបាកក្នុងការប្រកបរបរក្នុងស្រុក។
មានអ្នកភៀសខ្លួនជាច្រើនបានត្រឡប់ចូលប្រទេសវិញដោយសារការធ្វើកំណែទម្រង់សេដ្ឋកិច្ច និងនយោបាយដ៏គួរឱ្យភ្ញាក់ផ្អើលចាប់តាំងពីលោក Thein Sein ចូលកាន់តំណែងជាប្រធានាធិបតី ។ អ្នករត់ភៀសខ្លួនក្នុងចំណោមប្រជាជនជាង៦០លាននាក់នោះ រួមមានបុគ្គលិកជំនាញមួយចំនួនបានទទួលភាពជោគជ័យក្នុងជីវិតរស់នៅឯបរទេស ។
មេដឹកនាំបក្សប្រឆាំងលោកស្រីអ៊ួង សាន់ស៊ូជី បានចូលអង្គុយកៅអីសភា បន្ទាប់ពីគណបក្សរបស់លោកស្រីឈ្នះក្នុងការបោះឆ្នោតកាលពីខែមេសា ហើយមានអ្នកទោសនយោបាយរាប់រយនាក់ត្រូវបានដោះលែងឱ្យមានសេរីភាព បើទោះជាមានមនុស្សមួយចំនួនស្ថិតនៅក្នុងមន្ទីរឃុំឃាំងក្តី ។
សហភាពអឺរ៉ុបបានឆ្លើយតបចំពោះការធ្វើកំណែទម្រង់នោះ ដោយពន្យារពេលមួយឆ្នាំលើការធ្វើពាណិជ្ជកម្មនានា ដោយគ្មានការដាក់ទណ្ឌកម្មសេដ្ឋកិច្ច ។ ចំណែកសហរដ្ឋអាមេរិកតែងរក្សាការដាក់ទណ្ឌកម្មរបស់ខ្លួនលើប្រទេសភូមា សង្ឃឹមថានឹងប្រើវាជាកម្លាំងរុញច្រានរបបនយោបាយរបស់ប្រទេសមួយនេះឱ្យបញ្ចប់អំពើហិង្សាលើជនជាតិភាគតិច ៕
ចែករំលែកព័តមាននេះ