តម្លៃមាសនៅថ្ងៃពុធ ទី៩ ឧសភា បានធ្លាក់ចុះដល់កម្រិតទាបបំផុតមួយក្នុងឆ្នាំ២០១២ នេះស្របពេលភាពមិន ប្រាកដប្រជាលើគោលនយោបាយតំបន់អឺរ៉ុប និងជោគវាសនាអនាគតសេដ្ឋកិច្ចគ្រប់សង្កត់ លើទីផ្សារហិរញ្ញវត្ថុពិភពលោក ។
តម្លៃមាសធ្លាក់ចុះមកត្រឹម១.៥៩៤,២ដុល្លារក្នុងមួយអោន(មួយអោនស្មើ២៨ក្រាម) ដែលជាអត្រាតម្លៃមួយទាបបំផុតគិតចាប់ពីថ្ងៃ៣០ ធ្នូ ឆ្នាំ២០១១មក ដែលអត្រាតម្លៃទាបបំផុតក្នុងឆ្នាំ២០១១ គឺ១.៥៦៦,៨ដុល្លារក្នុងមួយអោន ។ តម្លៃមាសធ្លាក់ចុះ៣ថ្ងៃជាប់គ្នា ស្របពេល វិបត្តិប្រាក់បំណុលអឺរ៉ុបបានចាប់ផ្តើមលេចមុខនៅកណ្តាលឆាកជាថ្មី ។ អត្រាការប្រាក់កម្ចីកើនឡើងក្នុងប្រទេសអ៊ីតាលី និងអេស្ប៉ាញ ។ វា បានបន្ថែមសម្ពាធលើទីផ្សារឲ្យរស់ឡើងពេល ដែលអ្នកគាំទ្រលើការចំណាយត្បិតត្បៀតតាមផែនការបង្កើតឡើង ដើម្បីគ្រប់គ្រងប្រាក់បំណុលត្រូវបានគេដកចេញពីការងារក្នុងពេលមានការបោះឆ្នោតចុងសប្តាហ៍មុន ។
លោក George Gero អនុប្រធានក្រុមហ៊ុនRBC Global Futures ថ្លែងថា អ្នកវិនិយោគបារម្ភថា ស្ថានភាពដែលមិនទាន់ដោះស្រាយបាននៅឡើយនឹងជះឥទ្ធិពលដល់ការស្តារសេដ្ឋកិច្ចអឺរ៉ុប និងប្រហែលជាប៉ះពាល់ដល់សេដ្ឋកិច្ចពិភពលោក ។ បន្ថែមពីលើនេះ តម្លៃប្រាក់ដុល្លារកើនឡើងធៀបជាមួយរូបិយប័ណ្ណផ្សេងៗ។ មាស និងទំនិញ ផ្សេងៗត្រូវបានគេគិតជាប្រាក់ដុល្លារ ហេតុនេះ ក៏ធ្វើឲ្យអត្រាតម្លៃរបស់វាកើនឡើងដែរ ក្នុងពេលធ្វើពាណិជ្ជកម្មដោយប្រើប្រាស់រូបិយប័ណ្ណផ្សេងដូចជាប្រាក់យ៉េនជា ដើម។
តម្លៃប្រាក់ធ្លាក់ចុះមកត្រឹម២៩,១៩៧ដុល្លារក្នុងមួយអោន ចំណែកតម្លៃស្ពាន់ធ្លាក់ចុះមកត្រឹម ៣,៣៣៩៥ដុល្លារក្នុងមួយអោន ចំណែកប្លាទីនធ្លាក់ចុះមកត្រឹម១.៤៩៩,២ដុល្លារក្នុងមួយអោន ហើយប៉ាស្លាឌីយ៉ូមធ្លាក់មកត្រឹម៦១៣,៦៥ដុល្លារក្នុងមួយអោន ។
ចំណែកតម្លៃគ្រាប់ធញ្ញជាតិនិងសណ្តែកធ្លាក់ចុះយ៉ាងខ្លាំងដោយសារបញ្ហាតំបន់អឺរ៉ុប ។ ដូចជាស្រូវសាលីធ្លាក់មកត្រឹម៦ដុល្លារ ក្នុងមួយបាសស៊ែល(1 Bushel ប្រហែល២៧គីឡូក្រាម) ចំណែកពោតមានតម្លៃ៦,០៧២៥ដុល្លារក្នុងមួយបាសស៊ែល ហើយសណ្តែកមានតម្លៃ១៤,៣០២៥ដុល្លារក្នុងមួយបាសស៊ែល ៕
ចែករំលែកព័តមាននេះ