តម្លៃទំនិញភាគច្រើនបានធ្លាក់ចុះកាលពីសប្តាហ៍មុនស្របពេលអ្នកពាណិជ្ជកម្មចាប់យកនូវសញ្ញាពីទិន្នន័យទន់ខ្សោយរបស់សេដ្ឋកិច្ចពិភពលោក ជាពិសេសរបាយការណ៍ថ្ងៃសុក្រដ៏ស្រងាកចិត្តរបស់សហរដ្ឋអាមេរិក ។
ចំនួនការងារបង្កើតឡើងបញ្ជាក់ថា សេដ្ឋកិច្ច សហរដ្ឋអាមេរិកបានរងការប៉ះពាល់កាលពីខែកន្លងទៅ។ ចំនួនការងារដែលបង្កើតឡើងក្នុងខែមេសា ក្នុងប្រទេសមហាអំណាចសេដ្ឋកិច្ចពិភពលោកមានចំនួនតែ១១៥.០០០កន្លែងជាចំនួនមួយទាបក្នុងទីផ្សារការងារដែលបានរំពឹងទុក ។
ទីផ្សារទំនិញមួយចំនួនក៏មិនសូវមានសន្ទុះ ក្នុងពេលថ្ងៃឈប់សម្រាករបស់ទ្វីបអាស៊ី ក្នុងនោះមានប្រទេសចិន និងជប៉ុន។
ចំណែកអង្គការ ILO ថា តម្លៃប្រេងពិភពលោកដាំក្បាលចុះនៅថ្ងៃសុក្រ ដែលមិនធ្លាប់មានក្នុងរយៈពេល៣ខែ ។ វាប្រហែលបណ្តាលមកពីក្តីបារម្ភពីតម្រូវការថាមពលក្នុងប្រទេសផលិតប្រេងធំបំផុតនានាក្នុងពិភពលោក។បន្ទាប់ពីរបាយការណ៍ចំណូលក្នុងវិស័យមិនមែនកសិកម្មគួរឲ្យសង្វេគចេញមក វាបានបន្ថែមនូវក្តីបារម្ភខ្លាចថា ការស្តារសេដ្ឋកិច្ចអាមេរិកមិនទៅមុខ ។តែសម្រាប់អ្នកវិនិយោគកំពុងតែផ្អែកលើការចូលធ្វើអន្តរាគមន៍របស់ធនាគារកណ្តាលដើម្បីជួយពង្រីកតម្រូវការ។ នេះបើតាមសម្តីរបស់ លោក David Morrison អ្នកវិភាគរបស់ក្រុមហ៊ុន GFT ។
លោក David Morrisonថា ក្តីកង្វល់គឺថា អ្នកវិនិយោគនឹងបែរក្បាលចេញពីទ្រព្យប្រកបដោយគ្រោះថ្នាក់ រហូតធនាគារកណ្តាលបង្ហាញនូវឆន្ទះរបស់ពួកគេក្នុងការសម្រាលគោលនយោបាយរូបិយវត្ថុ ។តម្លៃប្រេងឆៅថ្ងៃចន្ទប្រហែលជាធ្លាក់ចុះ ព្រោះអ្នកវិនិយោគមួម៉ៅទៅលើការធ្លាក់ចុះសេដ្ឋកិច្ចជាថ្មីរបស់ប្រទេសអេស្ប៉ាញ និងការភ័យខ្លាចកាន់តែខ្លាំងថា តំបន់អឺរ៉ុបដែលជាតំបន់មហាអំណាចសេដ្ឋកិច្ចធំទីបួនប្រហែលជាត្រូវការកញ្ចប់ជំនួយដ៏ធំ ។
តម្លៃប្រេងធ្លាក់ចុះថែមទៀតនៅថ្ងៃព្រហស្បតិ៍សប្តាហ៍មុនបន្ទាប់ពីទម្លាក់ តួលេខសេដ្ឋកិច្ចតំបន់អឺរ៉ុប និងបន្ទាប់ពីមានការធ្លាក់ចុះនូវវិស័យសំខាន់នៃសេដ្ឋកិច្ចអាមេរិកក្នុងខែមេសា ។ ជាងនេះទៅទៀត កាលពីថ្ងៃសុក្រសប្តាហ៍មុនតម្លៃមាសធ្លាក់ចុះមកត្រឹម១.៦៤៣,៧៥ក្នុងមួយអោន(មួយអោនស្មើ២៨ក្រាម) ពីតម្លៃមុន១.៦៦៣,៥ដុល្លារ។ ប្រាក់ធ្លាក់ចុះមកត្រឹម២៩,៩ដុល្លារក្នុងមួយអោន ពីតម្លៃដើម៣១,១៤ក្នុងមួយអោន ។
ក្នុងទីក្រុងឡុងតម្លៃប្លាទីន ធ្លាក់ចុះមកត្រឹម១.៥៣០ដុល្លារក្នុងមួយអោន ។ តម្លៃដែកក៏ធ្លាក់ចុះដោយសារ ការភ័យខ្លាចនៃការធ្លាក់ចុះសេដ្ឋកិច្ច ព្រោះតែក្តីបារម្ភអំពីភាពយឺតយ៉ាវនៃការដំណើរការទៅមុខ នៅតំបន់អឺរ៉ុប ចិន សេដ្ឋកិច្ចអាមេរិកកើនឡើងតិចតួច ដែលសុទ្ធសឹងបន្ថែមទម្ងន់ដល់ទីផ្សារ ។កាលពីថ្ងៃសុក្រសប្តាហ៍មុន តម្លៃស្ពាន់ធ្លាក់ចុះ មក៨.១៧៣ដុល្លារក្នុងមួយតោន ។ អាលុយមី ញ៉ូមធ្លាក់មកត្រឹម២.០៧៤ដុល្លារក្នុងមួយតោន សំណប៉ាហាំងធ្លាក់ចុះមកត្រឹម២១.៥៧៥ដុល្លារក្នុងមួយតោន នីកែលធ្លាក់ចុះមកត្រឹម១៧.៤៥៦ដុល្លារក្នុងមួយតោន ចំណែកសង្ក័សី ធ្លាក់ចុះមកត្រឹម១.៩៩១ដុល្លារក្នុងមួយតោន ។
តម្លៃកាកាវនៅតែទទួលបានផលចំណេញ បើទោះជាទីផ្សារផ្គត់ផ្គង់រឹតត្បិតក៏ដោយ។ ក្នុងទីផ្សារក្រុងឡុងតម្លៃកាកាវកើនឡើងដល់១.៥៤២ដុល្លារក្នុងមួយតោន ចំណែកក្នុងទីផ្សារក្រុងញូវយ៉ក កើនឡើងដល់២.៣១៤ដុល្លារក្នុងមួយតោន ។ តម្លៃកាហ្វេហាក់ដូចជាប្រែប្រួល ក្នុងការធ្វើពាណិជ្ជកម្ម ដោយកាហ្វេមានតម្លៃ១,៧៧ដុល្លារក្នុងមួយផោន។ ចំណែកតម្លៃស្ករក៏បន្តធ្លាក់ចុះតាមសេដ្ឋកិច្ចពិភពលោកដែរ។ បើតាមការព្យាកររបស់អង្គការស្ករអន្តរជាតិថា នៅទូរទាំងពិភពលោកការផលិតស្ករកើនឡើងដល់ជាង៦លានតោនសម្រាប់ឆ្នាំ២០១១ និង២០១២ គឺកើនឡើងជាងការព្យាករលើកមុនដល់៥,៣១៧លានតោន។ តម្លៃស្ករសបានធ្លាក់ចុះមកត្រឹម៥៦៨ដុល្លារ ក្នុងមួយតោន ៕
ចែករំលែកព័តមាននេះ