កាសែតជប៉ុនNIIHON KEIZAI ចេញផ្សាយថ្ងៃទី៦ឧសភាអះអាងថាមេដឹកនាំវ័យក្មេងកូរ៉េខាងជើងលោកគីមជុងអ៊ុនមានបំណងមកកាន់ក្រុងប៉េកាំងនាឆ្នាំនេះ ទោះបីជាមានបរិយាកាសតានតឹងក្រោយការបាញ់បង្ហោះកាំជ្រួចមួយរបស់ក្រុងព្យុងយ៉ាងក៏ដោយ ។
កូរ៉េខាងជើងក៏អាចកំពុងតែរៀបចំធ្វើដែរនូវការសាកល្បងនុយក្លេអ៊ែរ ក្រោយការសាកល្បងនាឆ្នាំ២០០៦និងឆ្នាំ២០០៩ដែលញ៉ាំងឱ្យមានទណ្ឌកម្មយ៉ាងតឹងតែងនានាពីសំណាក់ក្រុមប្រឹក្សាសន្តិសុខអ.ស.ប ។
លោកគីមយ៉ុងអ៊ីលទទួលបន្ទុកខាងទំនាក់ទំនងអន្តរជាតិរបស់បក្សពលករកូរេខាងជើង បានមកបំពេញទស្សនកិច្ចនៅក្រុងប៉េកាំងកាលពីដំណាច់ខែមេសាដើម្បីជម្រាបជូនប្រធានាធិបតីចិនលោកហ៊ូជីនតាវពីគម្រោងទស្សនកិច្ចរបស់លោកគីមជុងអ៊ុន ក្នុងទីក្រុងប៉េកាំង ។ យោងតាមកាសែតជប៉ុននោះថា លោកហ៊ូបានយល់ស្របតាមសំណើនោះ ។ មេដឹកនាំកូរ៉េខាងជើងហាក់ដូចជាចង់ឱ្យមានការខិតជិតគ្នាកាន់តែខ្លាំងថែមទៀត ជាមួយសម្ព័ន្ធមិត្តតែមួយគត់នោះរបស់ខ្លួន ។
កាសែត NIHON KEIZAI បន្តថា ជនលេខមួយចិនបានប្រាប់ដល់ក្រុងព្យុងយ៉ាងពីបំណងចង់ឃើញកូរ៉េខាងជើងផ្អាកការសាកល្បងនុយក្លេអ៊ែរថ្មីទៀតហើយយកល្អងាកមកធ្វើការកែទម្រង់សេដ្ឋកិច្ចវិញ ៕
ចែករំលែកព័តមាននេះ