រាជធានីភ្នំពេញ ៖ កិច្ចប្រជុំមន្ដ្រីជាន់ខ្ពស់ការងារអាស៊ានលើកទី៨ (8th SLOM) ត្រូវបានរៀបចំឡើងដោយក្រសួងការងារ និងបណ្ដុះបណ្ដាលវិជ្ជាជីវៈនៃព្រះរាជាណាចក្រកម្ពុជានៅថ្ងៃទី៦-៧ ឧសភា ២០១២ នៅសណ្ឋាគារអាំងទែរកង់ទីណង់តាល់ដែលកិច្ចប្រជុំនេះក្រសួងការងារកម្ពុជាធ្វើជាប្រធាន និងជាម្ចាស់ផ្ទះ ដោយអនុវត្ដទៅតាមវេណនៃការធ្វើជាប្រធានអាស៊ានឆ្នាំ២០១២របស់ប្រទេសកម្ពុជា។
កិច្ចប្រជុំលើកទី៨ធ្វើឡើងក្នុងគោលបំណងអនុវត្ដន៍នូវសេចក្ដីសម្រេចនានារបស់ប្រមុខរដ្ឋាភិបាលអាស៊ានបានកំណត់ភារកិច្ចជូនរដ្ឋមន្ដ្រីការងារនៃបណ្ដាប្រទេសជាសមាជិកអាស៊ានឱ្យអនុវត្ដន៍ផ្ទាល់ពីបញ្ហាពាក់ព័ន្ធក្នុងវិស័យការងារដូចជាបញ្ហាទេសន្ដរប្រវេសន៍, សន្ដិសុខសង្គម, សុខភាព និងសុវត្ថិភាពនៅកន្លែងធ្វើការ, ទំនាក់ទំនងវិជ្ជាជីវៈ, ការបណ្ដុះបណ្ដាលវិជ្ជាជីវៈ, ការអភិវឌ្ឍន៍ធនធានមនុស្ស, ការងារ និងមុខរបរ, ការទទួលស្គាល់ជំនាញ និងស្ដង់ដារជាតិសមត្ថកិច្ចភាពជាដើម។
កិច្ចប្រជុំនេះ គឺជាការជួបជុំគ្នារវាងឧត្ដមមន្ដ្រីនៃវិស័យការងារមកពីបណ្ដាប្រទេសជាសមាជិក អាស៊ាន ដើម្បីស្ដាប់របាយការណ៍ពិនិត្យតាមដាន និងអនុម័តយល់ព្រមទៅលើការអនុវត្ដនៃសកម្មភាពការងារ និងគម្រោងការងាររបស់ក្រុមការងារនិងគណៈកម្មការជំនាញដែលស្ថិតនៅក្រោមការដឹកនាំនិងត្រួតពិនិត្យរបស់ខ្លួន។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ