រាជធានីភ្នំពេញ ៖ លោកទិត សុធា អនុប្រធានអង្គភាពព័ត៌មាន និងប្រតិកម្មរហ័សបានបង្ហាញហេតុការណ៍នៃការស្លាប់របស់លោកអ៊ិន រតនា មន្ត្រីប៉េអឹម និងលោកឈុត វុទ្ធី សកម្មជនការពារធនធានធម្មជាតិឡើងវិញ បន្ទាប់ពីបិទការស៊ើបអង្កេតជាបណ្តោះអាសន្នកាលពីថ្ងៃទី៥ ឧសភា ២០១២ និងធ្វើសន្និសីទបង្ហាញអ្នកកាសែតក៏ដូចជាសាធារណជននៅទីស្តីការគណៈរដ្ឋមន្ត្រី ដោយបញ្ជាក់ថា គណៈកម្មការចំរុះស៊ើបអង្កេតបានរកឃើញថា រ៉ាន់ បូរ័ត្ន ពិតជាបានធ្វើឱ្យរៀលកៃកាំភ្លើងអាកាត្រូវអ៊ិន រតនា មន្ត្រីប៉េអឹមស្លាប់ប្រាកដមែន បន្ទាប់ពីអ៊ិន រតនា ទប់កំហឹងមិនបានបាញ់សំដៅទ្វាររថយន្តឡង់គ្រីស្ស័រធ្លាយទៅត្រូវជង្គង់ឈុត វុទ្ធី រាលដាលដល់ពោះ ហើយក្រោយមកបានស្លាប់នោះ ។
តាមដើមហេតុនៃករណីប្រទូស្តរ៉ាយនេះត្រូវបានលាតត្រដាងថា ដំបូងឡើយលោកឈុត វុទ្ធី បានបើករថយន្តឡង់គ្រីស្ស័រដឹកនារីអ្នកកាសែតឌឹ ឃេមបូឌា ដេលី ២នាក់ ចូលទៅកន្លែងស្តុកឈើ និងធ្វើវល្លិរមៀត ពេលនោះឈ្មោះរ៉ាន់ បូរ័ត្ន ជាសន្តិសុខការពារក្រុមហ៊ុនធ្វើវល្លិរមៀត បានឃាត់មិនឱ្យអ្នកកាសែតទៅណានោះទេ ប្រសិនបើមិនព្រមប្រគល់ម៉ាស៊ីនថត ឬលុបរូបថតចេញពីម៉ាស៊ីន ។ ការប្រកែកគ្នាដោយពាក្យសម្តីថ្លោសៗបានកើតឡើង…ឈ្មោះអ៊ិន រតនា មន្ត្រីប៉េអឹមដែលនៅក្នុងហេតុការណ៍នេះដែរ បានលូកមាត់ទៅកាន់ឈុត វុទ្ធី ថា «បើប្រគល់ម៉ាស៊ីនថតឱ្យគេ (រ៉ាន់ បូរ័ត្ន) ត្រូវឱ្យមេមម៉ូរីផង» ។ ភ្លាមនោះការប្រកែកគ្នាបានវិលមករកអ៊ិន រតនា ជាមួយឈុត វុទ្ធី វិញ ហើយបន្លឺពាក្យសម្តីកាន់តែថ្លោសៗ… អ៊ិន រតនា ជាអ្នកស្ពាយកាំភ្លើងអាកាស្រាប់ក៏បាញ់១គ្រប់ផូងសំដៅទ្វាររថយន្តធ្លាយត្រូវជង្គង់ឈុត វុទ្ធី រាលដាលដល់ពោះ…ឃើញបែបនេះរ៉ាន់ បូរ័ត្ន ស្ទុះទៅដណ្តើមកាំភ្លើងពីអ៊ិន រតនា ដើម្បីបញ្ឈប់ការបាញ់ ព្រោះខ្លាចប៉ះពាល់អាយុជីវិតអ្នកកាសែត ឬអ្នកនៅក្នុងរថយន្តឡង់គ្រីស្ស័រច្រើននាក់ទៀត ។ ប៉ុន្តែចៃដន្យអាក្រក់ស្រាប់តែកាំភ្លើងរៀលកៃស្របពេលកាណុងបែរទៅចំទ្រូងអ៊ិន រតនា បណ្តាលឱ្យផ្ទុះ២គ្រាប់ ដេកដួលក្នុងថ្លុកឈាម ។ អ៊ិន រតនា ៥នាទីក្រោយមកបានស្លាប់ ចំណែកឈុត វុទ្ធី ១០នាទីក្រោយមកក៏បានស្លាប់ដែរ ។
សូមបញ្ជាក់ថា ព្រះរាជអាជ្ញាអមសាលាដំបូងខេត្តកោះកុង បានសម្រេចចោទប្រកាន់ជាផ្លូវការទៅលើជនសង្ស័យឈ្មោះរ៉ាន់ បូរ័ត្ន ពីបទមនុស្សឃាតដោយអចេតនាលើសំណុំរឿងនៃការស្លាប់របស់សកម្មជនការពាព្រៃឈើ លោកឈុត វុទ្ធី និងលោកអ៊ិន រតនា មន្រ្តីប៉េអឹមខេត្តកោះកុង ដោយបញ្ជូនជនដៃដល់រូបនេះទៅឃុំខ្លួនបណ្តោះអាសន្ននៅពន្ធនាគារខេត្ត។
ការសម្រេចចោទប្រកាន់លើជនសង្ស័យរ៉ាន់ បូរ័ត្ន យ៉ាងដូច្នេះ ធ្វើឡើងកាលពីវេលាថ្ងៃត្រង់ថ្ងៃទី៤ ឧសភា ២០១២នេះ បន្ទាប់ពីតំណាងអយ្យការបានសាកសួរជនសង្ស័យចាប់តំាងពីរសៀលថ្ងៃទី៣ រហូតដល់ព្រឹកថ្ងៃសុក្រទី៤ឧសភានេះ រួចមក ។
គួរបញ្ចាក់ថា នៅមុនមួយថ្ងៃនៃការចុះស្រាវជ្រាវ និងបើកការស៊ើបអង្កេតការស្លាប់របស់សកម្មជនការពារព្រៃឈើ និងមន្រ្តីកងរាជអាវុធហត្ថពីសំណាក់គណៈកម្មការចម្រុះដឹកនំាដោយលោកឧត្តមសេនីយ៍ឯកម៉ក់ ជីតូ កាលពីថ្ងៃទី២ ឧសភា ជនសង្ស័យម្នាក់ដែលគេអះអាងថា ជាអ្នកបាញ់សម្លាប់មន្ត្រីប៉េអឹម និងប្រធានអង្គការការពារបរិស្ថានក្នុងបុព្វហេតុរារាំងដំណើរអ្នកកាសែតបរទេស២នាក់ មិនឱ្យចូលទៅក្នុងជំរំស្តុកឈើប្រណីតនោះ ត្រូវបានកម្លាំងប៉េអឹមឃាត់ខ្លួនកាលពីវេលាម៉ោងជាង៣រសៀលថ្ងៃទី១ ឧសភា ២០១២ នៅជិតក្រុមហ៊ុនកាប់ឈើតែម្តង គឺដេប៉ូទី១ ហៅវាល៣ ។
ខ្មាន់កាំភ្លើងដែលសង្ស័យថា សម្លាប់មន្ត្រីប៉េអឹម និងប្រធានអង្គការការពារបរិស្ថាន ដែលឃាត់ខ្លួននេះឈ្មោះរ៉ាន់ បូរ័ត្ន អាយុ៣១ឆ្នាំ ជាបុគ្គលិកក្រុមហ៊ុនកាប់ឈើទទួលបន្ទុកការងារសន្តិសុខ ។ ខ្មាន់កាំភ្លើងឈ្មោះរ៉ាន់ បូរ័ត្ន បាននិយាយថា ក្នុងហេតុការណ៍បាញ់ប្រហារនាំឱ្យស្លាប់២នាក់នោះ គឺមានសាក្សីដែលបានឃើញព្រឹត្តិការណ៍នេះចំនួន៤នាក់ទៀតជាអ្នកធ្វើការក្នុងក្រុមហ៊ុនកាប់ឈើដែរ រ៉ាន់ បូរ័ត្ន មិនទាន់និយាយអ្វីទូលំទូលាយនៅឡើយទេក្នុងរឿងនេះ ។
គួររំលឹកថា មន្ត្រីប៉េអឹមការពារជំរំស្តុកឈើម្នាក់ត្រូវបានគេបាញ់ស្លាប់ដេកដួលនៅនឹងកន្លែង និងប្រធានអង្គការការពារបរិស្ថានម្នាក់ទៀត ក៏ត្រូវគេបាញ់ស្លាប់នៅក្នុងរថយន្តផងដែរ បង្កឱ្យមានការភ្ញាក់ផ្អើល និងរន្ធត់យ៉ាងខ្លាំង គឺមន្ត្រីប៉េអឹមដេកស្លាប់ក្បែររថយន្តឡង់គ្រីស្ស័រ ស៊េរីចាស់ ពណ៌ក្រហម រីឯប្រធានអង្គការការពារបរិស្ថាន ដែលជាអ្នកបើកបរស្លាប់ក្នុងរថយន្តនេះតែម្តង ខណៈដឹកអ្នកកាសែតបរទេសម្នាក់អ្នកកាសែតកម្ពុជាម្នាក់ទៅថតយករូបភាពនៅជំរំស្តុកឈើប្រណីត ក្នុងព្រៃសោង ខេត្តកោះកុង ។
ហេតុការណ៍នេះ បានកើតឡើងកាលពីវេលាម៉ោង១២ និង៣០នាទីរសៀលថ្ងៃទី២៦ មេសា ២០១២ នៅកណ្តាលទ្រូងព្រៃ ស្ថិតក្នុងភូមិកោះប៉ោ ឃុំប៉ាក់ខ្លង ស្រុកមណ្ឌលសីម៉ា ។ មន្ត្រីប៉េអឹមដែលស្លាប់ឈ្មោះអ៊ិន រតនា អាយុ៣១ឆ្នាំ ជាអ្នកយាមកាមនៅជំរំស្តុកឈើប្រណីត ដេកស្លាប់ក្បែររថយន្តឡង់គ្រីស្ស័រ ស៊េរីចាស់ ពណ៌ក្រហម ពាក់ស្លាកលេខ NGO101,2-100 ដោយមានកាំភ្លើងអាកានៅក្នុងដៃផង ហើយនៅ ដើមទ្រូងមានត្រូវគ្រាប់២គ្រាប់ ។
ចំណែកអ្នកស្លាប់នៅក្នុងរថយន្តឡង់គ្រីស្ស័រ ឈ្មោះឈុត វុទ្ធី អាយុប្រមាណ៤០ឆ្នាំ ដេក ស្លាប់ក្នុងរថយន្ត ដោយគ្រាប់កាំភ្លើងទម្លុះ ជញ្ជាំងត្រូវ១គ្រាប់ ហើយអង្គុយក្នុងរថយន្ត ក្បែរនោះ គឺនារីអ្នកកាសែត ជនជាតិខ្មែរបម្រើ ការឱ្យកាសែតឌឹ ឃេមបូឌា ដេលី ឈ្មោះផន បុប្ផា អាយុ២៧ឆ្នាំ មិនមានរងរបួសអ្វីទេ និង អ្នកកាសែតស្រីបរទេសម្នាក់ទៀត ជនជាតិអ៊ុយ ក្រែនឈ្មោះអូឡេស៊ីយ៉ា ឡូភី អាយុ២៧ឆ្នាំ ក៏មិនមានរងរបួសអ្វីដែរ ពេលកើតហេតុ បាញ់ ប្រហារនារីទាំង២នាក់ បានរត់ទៅសំងំពួនក្នុង ព្រៃទាំងរាងកាយញ័រចំប្រប់ ។ ពួកគេទាំង៣ នាក់ បានចូលទៅក្នុងទ្រូងព្រៃ ដើម្បីប្រមាញ់ យករូបភាពជំរំស្តុកឈើប្រណីតនៅកន្លែងកើត ហេតុដែលស្ថិតនៅចម្ងាយប្រមាណ៤០គីឡូម៉ែត្រពីក្រុងខេមរភូមិន្ទ ៕
ចែករំលែកព័តមាននេះ